រាជធានីភ្នំពេញ ៖ អនុប្រធានសាខាគយ និងរដ្ឋាករ ខេត្តកោះកុង និងបក្ខពួក៣នាក់ទៀត ដែលល្បីល្បាញចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ…
រាជធានីភ្នំពេញ ៖ អនុប្រធានសាខាគយ និងរដ្ឋាករ ខេត្តកោះកុង និងបក្ខពួក៣នាក់ទៀត ដែលល្បីល្បាញចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ ត្រី សាច់ បន្លែ គ្រឿងផ្ទះដែលរុះរើ ត្រូវបានអង្គភាពប្រឆាំងអំពើពុករលួយ (អ.ប.ព.) កសាងសំណុំរឿងបញ្ជូនទៅតុលាការ កាលពីថ្ងៃទី១៨ ខែមីនា ឆ្នាំ២០២៦ នេះបើតាមលទ្ធផលកិច្ចប្រជុំលើកទី៨ អាណត្តិទី៤ នៃក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) នៅថ្ងៃទី២៥ ខែមីនា ឆ្នាំ២០២៦នេះ ។
ករណីអនុប្រធានសាខាគយ និងរដ្ឋាករ ខេត្តកោះកុង ឈរជើងនៅចំណុចអណ្តូងទឹក ដែលល្បីល្បាញចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ ត្រី សាច់ បន្លែ គ្រឿងផ្ទះដែលរុះរើ…ហើយនៅថ្ងៃទី១៨ ខែមីនា ឆ្នាំ២០២៦ ACU បានកសាងសំណុំរឿងបញ្ជូនទៅតុលាការ ពាក់ព័ន្ធអំពើរំលោភអំណាច និងសម្អាតប្រាក់ ដែលមានជនសង្ស័យ ៤ រូប រួមមាន ៖
១-ឈ្មោះ ម៉ៅ សាន់សូនា ភេទប្រុស អាយុ ៥៨ឆ្នាំ មុខរបរ អនុប្រធានសាខាគយ និងរដ្ឋាករ ខេត្តកោះកុង ជាប់សង្ស័យក្នុងអំពើ រំលោភអំណាច និងសម្អាតប្រាក់ ។
២-ឈ្មោះ ម៉ៅ ទិត្យា ភេទប្រុស អាយុ ៥៤ឆ្នាំ មុខរបរ បុគ្គលិកជាប់កិច្ចសន្យា នៃសាខាគយ និងរដ្ឋាករ ខេត្តកោះកុង ជាប់សង្ស័យពីបទ សមគំនិតក្នុងអំពើរំលោភអំណាច និងសម្អាតប្រាក់ ។
៣-ឈ្មោះ ពត ស្រីនាង ភេទស្រី អាយុ ៣២ឆ្នាំ មុខរបរ មេផ្ទះ ជាប់សង្ស័យពីបទ សមគំនិតក្នុងការសម្អាតប្រាក់ ។
និង៤-ឈ្មោះ ផល ដុល្លា ភេទ ប្រុស អាយុ ២៧ឆ្នាំ មុខរបរ បុគ្គលិកធនាគារ ជាប់សង្ស័យពីបទ សមគំនិត ក្នុងការសម្អាតប្រាក់។
សូមរម្លឹកឡើងវិញថា លោក ម៉ៅ សាន់សូនា អនុប្រធានសាខាគយ និងរដ្ឋាករខេត្តកោះកុង ទទួលបន្ទុកចល័ត និងមានទីតាំងរោងប្រចាំការឈរជើងឥតលើកស្លាកសម្គាល់ដូចជាកុងត្រូលជជុះនោះ ត្រូវអ្នករកស៊ីដឹកទំនិញ ផ្ដិតមេដៃប្ដឹងចោទប្រកាន់ ថា ជំរិតទារប្រាក់ពីពួកគាត់ ដែលស៊ីឈ្នួលដឹកទំនិញ និងគ្រឿងសមុទ្រ ច្រើនៗពេក ។
គយ និងរដ្ឋាករខេត្តកោះកុង ទទួលបន្ទុកចល័ត និងមានទីតាំងរោងប្រចាំការឈរជើង ឥតលើកស្លាកសម្គាល់ដូចជាកុងត្រូលជជុះនោះ មានទីតាំងនៅជាប់ផ្លូវជាតិលេខ ៤៨ ក្នុងឃុំអណ្ដូងទឹក ស្រុកបូទុមសាគរ ខេត្តកោះកុង ហើយត្រូវបានរងការចោទថា ប្រើរថយន្តស្លាកលេខរដ្ឋ និងរថយន្តគ្នីគ្នា ពាក់ស្លាកលេខស៊ីវិល ម៉ាកប្រូសមកឈរជើងនៅរង្វង់មូលសាយភូថង ដើម្បីប្រដេញឃាត់ស្ទាក់រថយន្តអ្នកដឹកទំនិញទារប្រាក់ គ្មានក្តីមេត្តាសោះ ។
ប្រភពពីពលរដ្ឋ បានឱ្យដឹងថា លោក សាន់សូនា អនុវត្តច្បាប់ល្មើសក្រមសីលធម៌ សម្ដីឈ្លើយអញហែងសម្លុតឱ្យពលរដ្ឋរើទំនិញបើកតង់ បើកទ្វារ និងគំរាម យកប្រាក់ពីពលរដ្ឋអ្នកស៊ីឈ្នួលដឹកទំនិញក្នុងស្រុក ដែលមានជារបស់ប្រើប្រាស់ និងចំណីអាហារ។
ជនជាតិចិនដឹកបន្លែ ក៏បានរអ៊ូរទាំ ប្រាប់អាជ្ញាធរភូមិថា មានលោកគយ នៅចំណុចខាងលើ ដេញស្ទាក់ឃាត់សួររកលិខិតស្នាមទាមទារលុយ រហូតចិនធុញទ្រាន់ពេកឱ្យ ២០ដុល្លារទើបព្រម ។
អ្នកភូមិស៊ីឈ្នួលដឹកគ្រឿងសមុទ្រ ចេញពីឃុំថ្មស ក៏ត្រូវលោកគយនោះចោទថា ជាទំនិញនាំមកពីប្រទេសថៃ ទាំងគ្មានភស្តុតាងពិតប្រាកដ ទារលុយ២០០ដុល្លារ ចុងក្រោយពលរដ្ឋធុញ និងខ្លាចខូចគុណភាពសាច់ ក៏ព្រមឱ្យលោក ១០០ដុល្លារទៅ ។
កាលឆ្នាំ២០២៥ លោក សាន់សូនា ក៏បានដេញស្ទាក់ចាប់រថយន្តអ្នកស៊ីឈ្នួលដឹកប្រេងម៉ាស៊ីន ម៉ូទ័រ សម្បុកអ៊ែរ និងម៉ាស៊ីនវីស៊ីម៉ងត៍ ទិសដៅពីភ្នំពេញ ទៅថ្មស ដោយចោទថា បិទពន្ធក្លែងក្លាយ (ដែលដំបូងឡើយ ឃាត់តាមផ្លូវ លោកគយទារប្រាក់លើទំនិញ២លាន និងរថយន្ត២លានរៀល គេមិនព្រមឱ្យ ក៏អូសទៅកន្លែងកុងត្រូលជជុះ ដែលឥតមានលើកស្លាកសម្គាល់ ហើយទារលុយ១,៥០០ដុល្លារ ជាថ្នូរដោះលែងរថយន្ត បន្ទាប់ពីត.ថ្លៃលោកគយព្រមយក៣០០ដុល្លារ តែដកហូតទំនិញ ។
ហើយគ្រប់អ្នកដឹកទំនិញ លោកបង្គាប់បញ្ជាឱ្យបង់លុយ ២ម៉ឺនរៀល ថ្លៃបាយទឹកក្នុងមួយជើង ទោះឱ្យ១ម៉ឺនប្រាំពាន់ ក៏មិនព្រមដែរ ដែលមានប័ណ្ណវេរលុយផង យកមកបង្ហាញអ្នកកាសែតកោះសន្តិភាព ។
ទោះយ៉ាងនេះក្ដីក្រុមអ្នករកស៊ីបន្តិចបន្តួច ដែលផ្ញើទំនិញតាមឡានកំពុងផ្ដិតមេដៃប្ដឹងលោក ម៉ៅ សាន់សូនា អនុប្រធានសាខាគយខេត្តកោះកុង ទៅអាជ្ញាធរ និងថ្នាក់លើឱ្យចាត់វិធានការតាមនីតិវិធី កុំឱ្យធ្វើទុក្ខបុកម្នេញបន្តទៀត ព្រោះពួកគាត់រកស៊ីរាប់សិបឆ្នាំមកហើយ មិនដែលជួបសកម្មភាពធ្វើលើសជ្រុលហួសហេតុក្នុងកំឡុងពេលជិត១ឆ្នាំ ដែលលោកគយរូបនេះ មកកាន់ការងារនៅភូមិស្រុករបស់ពួកគាត់នោះទេ ។ ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ