ទីក្រុងហ្សាកាតា៖ បន្ទាប់ពីតុលាការធម្មនុញ្ញាថៃដកតំណែងលោកស្រីផែថងថានកាលពីម្សិលមិញ មិនរង់ចាំយូរទេ ប្រធានគណបក្សភូមិចៃថៃដែលទទួលបានអាសនៈលំដាប់ទី៣នៅក្នុងការបោះឆ្នោតឆ្នាំ២០២៣នោះក៏កំពុងដើរទាក់ទងគណបក្សនយោបាយដែលមានអាសនៈនៅក្នុងសភាដើម្បីបញ្ជូនឈ្មោះរបស់លោកទៅឱ្យសភាបោះឆ្នោតផ្ដល់សេចក្ដីទុកចិត្តនាពេលខាងមុខ។ លោកអនុទីនស្ថិតនៅក្នុងចំណោមបេក្ខជន៤នាក់ដែលមានសិទ្ធិស្នើបេក្ខភាពទៅសភា។ នេះបើតាមរដ្ឋធម្មនុញ្ញថៃ។
ឥឡូវនេះមិនត្រឹមតែគណបក្សភូមិចៃថៃទេ គណបក្សភឿថៃក៏ដើរទាក់ទងគណបក្សនយោបាយដទៃទៀតដើម្បីស្នើបេក្ខភាពខ្លួនទៅឱ្យសភាអនុម័តផងដែរ។ ប៉ុន្តែអ្វីដែលសំខាន់នៅត្រង់ថាគណបក្សភូមិចៃថៃអាចរកបានសំឡេងគាំទ្រច្រើនគួរសម។ មានន័យថាលោកអនុទីនអាចនឹងមានឱកាសក្លាយជានាយករដ្ឋមន្ត្រីថ្មី។ ថ្លែងប្រាប់អ្នកសារព័ត៌មានកាលពីពេលថ្មីៗនេះ លោកអនុទីនថាបន្ទាប់ពីឮសេចក្ដីសម្រេចរបស់តុលាការភ្លាម លោកបានកោះប្រជុំមន្ត្រីសំខាន់ៗ និងសម្រេចគ្នាថាប្រទេសថៃមិនអាចបណ្ដោយឱ្យជាប់គាំងនយោបាយទេ។ មានន័យថាត្រូវតែរកមេដឹកនាំថ្មីឱ្យបានឆាប់ៗនេះ។
លោកថ្លែងថារដ្ឋាភិបាលមុនមិនអាចដោះស្រាយបញ្ហាជាតិបានទេ។ ប៉ុន្តែយើងមានទំនុកចិត្តថាយើងអាចធ្វើរឿងនេះបាន។ យើងយកចិត្តទុកដាក់ខ្ពស់ចំពោះរឿងជាតិ និងចង់ស្ដារសន្តិភាព និងស្ថិរភាពឡើងវិញ។ លោកអានុទីនសង្កត់ធ្ងន់ថាគណបក្សរបស់លោកបានឯកភាពទទួលយកលក្ខខណ្ឌរបស់គណបក្សប្រជាជន (ថៃ) រួចហើយ។ ជាថ្នូរត្រឡប់មកវិញ គណបក្សប្រជាជនយល់ព្រមបោះឆ្នោតគាំទ្របេក្ខភាពរបស់លោកនៅរដ្ឋសភា។ មន្ត្រីធំៗរបស់គណបក្សទាំង២ទើបតែពិភាក្សាគ្នានៅទីស្នាក់ការគណបក្សប្រជាជន។
យោងតាមលោកអនុទីន សម្ព័ន្ធភាពគណបក្សឯកភាពគ្នាលើចំណុចមួយចំនួនដូចជា៖ ទី១-ធ្វើប្រជាមតិដើម្បីសម្រេចថាត្រូវកែរដ្ឋធម្មនុញ្ញ ឬយ៉ាងណា, ទី២-ដោះស្រាយជម្លោះ (ជាមួយប្រទេសជិតខាង) ដើម្បីស្ដារសន្តិភាព និងចរចាជាមួយប្រទេសជិតខាងដើម្បីកែលម្អទំនាក់ទំនងឡើងវិញ។ លក្ខខណ្ឌមួយទៀតគឺការសន្យាផ្ទេរអំណាចជូនប្រជារាស្ត្រថៃវិញនៅក្នុងរយៈពេល៤ខែនៃការកាន់អំណាច។ រដ្ឋាភិបាលរបស់លោកនឹងរំលាយសភាដើម្បីរៀបចំការបោះឆ្នោតជ្រើសតាំងអ្នកតំណាងរាស្ត្រនៅអាណត្តិថ្មី។
គណបក្សភូមិចៃថៃអះអាងថាអ្នកតំណាងរាស្ត្ររបស់ខ្លួននឹងមិនកាន់តំណែងនៅក្នុងរដ្ឋាភិបាលដែលត្រៀមបង្កើតថ្មីនោះទេ។ លោកអនុទីនប្រកាសថាយើងចង់ដោះស្រាយបញ្ហា និងផ្ទេរអំណាចជូនប្រជារាស្ត្រវិញដើម្បីបោះឆ្នោតជ្រើសរើសមេដឹកនាំថ្មីកាន់តែឆាប់តាមដែលអាចធ្វើទៅបាន។ លោកថ្លែងបន្តទៀតថានៅសល់ចំណុចតិចតួចតែប៉ុណ្ណោះដែលត្រូវនិយាយគ្នាទៀតជាមួយគណបក្សប្រជាជនព្រោះគណបក្សប្រជាជនចង់បានកិច្ចព្រមព្រៀងជាលាយលក្ខណ៍អក្សរ។
សំឡេងគាំទ្រពីគណបក្សប្រជាជនពិតជាមានសារៈសំខាន់ណាស់ព្រោះគណបក្សនេះមានអ្នកតំណាងរាស្ត្រច្រើនជាងគេរហូតដល់១៤៣រូបនៅក្នុងរដ្ឋសភា។ ចំពោះសំណួរថាបើរំលាយសភាឆាប់ពេកបែបនេះមិនល្អទេដឹង? លោកអនុទីនថ្លែងថាគ្មានឡើយពាក្យថាឆាប់ពេក ឬយូរពេកនៅក្នុងនយោបាយ។ លោកសូមមិនបញ្ជាក់ច្បាស់ៗថាតើអ្នកតំណាងរាស្ត្រប៉ុន្មាននាក់ដែលត្រៀមបោះឆ្នោតគាំទ្របេក្ខភាពរបស់លោក។ លោកគ្រាន់តែបង្ហើបដោយខ្លីថាលោកបានកៀងគរសំឡេងគាំទ្រគ្រប់គ្រាន់ហើយដើម្បីបង្កើតរដ្ឋាភិបាលថ្មី។
គេសង្កេតឃើញមន្ត្រីធំៗរបស់គណបក្សនយោបាយដទៃទៀតក៏មានវត្តមាននៅក្បែរលោកអនុទីនផងដែរនៅពេលលោកផ្ដល់បទសម្ភាសជូនអ្នកសារព័ត៌មាន។ ក្នុងនោះមានមន្ត្រីរបស់គណបក្សរួមថៃសាងជាតិ, គណបក្សផាឡាំងប្រឆារ៉ាត់, គណបក្សប្រជាធិបតេយ្យ និងអ្នកតំណាងរាស្ត្ររបស់គណបក្សភឿថៃមួយរូប។ ខាងលើនេះជាការដកស្រង់ប្រភពពីទូរទស្សន៍ភីប៊ីអែស (PBS) និងប្រភពដទៃទៀត៕
ចែករំលែកព័តមាននេះ