ទីក្រុងវ៉ាស៊ីនតោន៖ សេតវិមានបញ្ចេញប្រតិកម្មតបទៅលោកម៉ាក្រុងដែលនិយាយថាលោកត្រាំស្រួលមិនស្រួលអាចនឹងចាញ់បោកពូទីនទៀតជាមិនខាន។ ការថ្លែងដូច្នេះបន្ទាប់ពីប្រធានាធិបតីបារាំងរូបនេះកំពុងរង់ចាំមើលបើមិនឃើញលោកពូទីនចេញមកជួបលោកហ្សេឡិនស្គីដូចការសន្យាទេមានន័យថាលោកពូទីនបោកលោកត្រាំទៀតហើយ។
លោកម៉ាក្រុងថាបើគម្រោងការណ៍ជួបគ្នានោះមិនកើតមានឡើងនៅថ្ងៃចន្ទសប្ដាហ៍ក្រោយដូចដែលលោកត្រាំបានកំណត់ទេ មានន័យថាលោកពូទីនលេងសើចជាមួយលោកត្រាំ។ លោកថ្លែងដូច្នេះនៅក្នុងសន្និសីទសារព័ត៌មានជាមួយអធិការបតីអាល្លឺម៉ង់។ នាយរងអគ្គសេនាធិការកងទ័ពអាមេរិក លោកស្ទីហ្វឹន មីលឡឺ (Stephen Miller) ត្រូវអ្នកសារព័ត៌មានសាកសួរនៅខាងក្រៅសេតវិមានថាតើពាក្យរបស់លោកម៉ាក្រុងជាការពិតដែរឬទេ?
លោកមីលឡឺឆ្លើយតបថានេះជាសំណួរគ្មានន័យ។ លោកថាលោកត្រាំសម្រេចបានកិច្ចព្រមព្រៀងសន្តិភាពចំនួន៧នៅក្នុងរយៈពេល៧ខែនៃការកាន់អំណាចរបស់គាត់។ នៅក្នុងប្រវត្តិសាស្ត្រគ្មានប្រធានាធិបតីណាអាចធ្វើបានលើសពីលោកត្រាំទៀតទេពាក់ព័ន្ធនឹងបុព្វហេតុសន្តិភាព។ លោកត្រាំត្រូវថ្នាក់ដឹកនាំប្រទេសនានានៅលើពិភពលោកគាំទ្រជាបេក្ខភាពពានរង្វាន់ណូបែលសន្តិភាពពិភពលោក។ លោកមីលឡឺថ្លែងបន្តទៀតថាលោកត្រាំក៏កំពុងធ្វើការយ៉ាងដុតដៃដុតជើងដើម្បីបិទបញ្ចប់ការកាប់សម្លាប់គ្នានៅអ៊ុយក្រែនផងដែរ។
គួរកត់សម្គាល់ថាការថ្លែងរបស់លោកម៉ាក្រុងដូចខាងលើនេះធ្វើឡើងបន្ទាប់ពីលោកត្រាំធ្លាប់បានត្អូញត្អែរកាលពីខែកក្កដាថាទម្លាប់របស់លោកពូទីនគឺចូលចិត្តនិយាយល្អៗពីមុខយើង រួចហើយដាក់គ្រាប់បែករត់បាត់។ លោកត្រាំក៏ឆ្លៀតរិះគន់អ៊ុយក្រែនផងដែរចំពោះការវាយប្រហារទៅលើប្រទេសរុស្ស៊ី។ ក្រោយការវាយប្រហាររបស់រុស្ស៊ីទៅលើអ៊ុយក្រែនកាលពីយប់ថ្ងៃពុធ និងព្រឹកថ្ងៃព្រហស្បតិ៍ស្លាប់ជនស៊ីវិលយ៉ាងតិច២៣នាក់ រដ្ឋាភិបាលរបស់លោកត្រាំសុខចិត្តរក្សាភាពស្ងៀមស្ងាត់។
លោកត្រាំព្រមានថារុស្ស៊ីនឹងមានផលវិបាកធ្ងន់ធ្ងរបើលោកពូទីនមិនព្រមចេញមកជួបលោកហ្សេឡិនស្គីនៅក្នុងអំឡុងពេល២សប្ដាហ៍ទេ។ ហេតុនេះ កាលពីយប់មិញ លោកហ្សេឡិនស្គីចង់ឱ្យទាំងអស់គ្នាជួយធ្វើជាសាក្សី និងចងចាំសម្ដីរបស់លោកត្រាំទុក។ ឱសានវាទ២សប្ដាហ៍គឺនៅថ្ងៃចន្ទសប្ដាហ៍ក្រោយនេះហើយ។ ហេតុនេះ លោកម៉ាក្រុងក៏ថ្លែងសារនយោបាយដូចខាងលើនេះឡើងដើម្បីជាការរំលឹក។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ