ខេត្តកំពង់ចាម ៖ ទឹកចិត្តរបស់ឪពុកពិតជាមានទំហំធំធេងមិនអាចកាត់ថ្លៃបាន ទោះបីងងុយយ៉ាងណាក៏សុខចិត្តអង្គុយឈ្ងោកយកដៃទាំងទ្វេរដាក់លើកែបម៉ូតូ ហើយសម្រានបន្តិចក្រោយពិសារអាហារថ្ងៃត្រង់រួច ស្របពេលខ្យល់ជំនោរបក់មករៀងត្រជាក់។ ចំណែកកូនស្រីបានអង្គុយក្បែរក្រោមម្លប់ឈើសួនច្បារមាត់ទន្លេក្រុងកំពង់ចាម នៅវេលាម៉ោងជាង១២ថ្ងៃត្រង់ទី២៩ សីហាឆ្នាំ២០២៥ ដោយបំប៉នមើលមេរៀនគណិតវិទ្យា ត្រៀមនិងចូលប្រលងនាថ្ងៃបង្ហើយនេះ។
យុវតីឈ្មោះធីម មករា អាយុ១៧ឆ្នាំ រស់នៅភូមិអូរប៉ិ ឃុំជយោ ស្រុកចំការលើ រៀននៅវិទ្យាល័យ
ប៊ុន រ៉ានី-ហ៊ុន សែន ស្ពឺ បានរៀបរាប់ឲ្យដឹងថា មុនពេលប្រឡងក្នុងគ្រាដែលកំពុងសិក្សានៅស្រុកកំណើតរបស់ខ្លួន ពេលដែលចេញពីផ្ទះមកកាន់សាលារៀន គឺមានមិត្តភក្កិស្រីរៀនជាមួយគ្នាបានឌុបពីផ្ទះទៅកាន់សាលា ហើយមានពេលខ្លះនាងក៏បានជិះម៉ូតូឌុបមិត្តម្ដងម្នាក់ ក្នុងស្មារតីសាមគ្គីភាពហើយតែងតែក្រើនរំលឹកមេរៀនដែលគ្រូបានបង្រៀននៅសាលា ដោយលើកយកចំណុចសំខាន់ៗ ដើម្បីត្រិះរិះពិចារណានិងខិតខំរៀនសូត្រតាមមុខវិជ្ជានីមួយៗ ដោយទទួលបានលទ្ធផលគ្រាន់បើគ្រប់មុខទាំងអស់គឺចំណាត់ថ្នាក់លេខ៦ ប្រចាំឆ្នាំ។
យុវតីរូបនេះបានរៀបរាប់បន្តឱ្យដឹងទៀតថា មុនពេលប្រឡងមួយថ្ងៃត្រូវបានឪពុករបស់ខ្លួនឌុបតាមម៉ូតូមួយគ្រឿង ចេញពីស្រុកកំណើតដើម្បីមកប្រឡងបាក់ឌុបនៅមណ្ឌលវិទ្យាល័យព្រះសីហនុ ក្រុងកំពង់ចាម ផ្នែកវិទ្យាសាស្ត្រ ចំពោះមុខវិជ្ជាដែលត្រូវប្រឡងក្នុងនោះរួមមាន÷ប្រវត្តិវិទ្យា ជីវៈវិទ្យា គីមីវិទ្យា ភាសាអង់គ្លេស អក្សរសាស្ត្រខ្មែរ រូបវិទ្យានិងគណិតវិទ្យា ដែលត្រូវចូលប្រឡងនារសៀលថ្ងៃទី២៩សីហា។
ដោយសារពេលទំនេរម៉ោងនៅសល់រាងច្រើនបន្តិចត្រូវបានឪពុករបស់ខ្លួនឌុបតាមម៉ូតូមួយគ្រឿងមកអង្គុយក្រោមម្លប់ឈើសួនច្បារមាត់ទន្លេក្រុងកំពង់ចាម ក្នុងនោះគឺបានប្រឹងមើលដោយប្រើប្រាជ្ញាលើមុខវិជ្ជាគណិត ដែលនឹងត្រៀមចូលប្រឡងរកគន្លឹះសំខាន់ៗ ដើម្បីឱ្យងាយឆាប់យល់។ចំពោះការរំពឹងលទ្ធផលប្រឡងនេះសង្ឃឹម៦០ទៅ៧០% ពេលប្រឡងជាប់នឹងត្រូវបន្តរៀនផ្នែកឧត្តមសិក្សាលើជំនាញវិទ្យាសាស្ត្រកុំព្យូទ័រ(IT) ធ្វើយ៉ាងណាប្រឹងរៀនពេលចេញបម្រើការងារជួយសម្រាលបន្ទប់ក្រុមគ្រួសារដែលឪពុកម្ដាយជាកសិករខំប្រឹងថែរក្សាបីបាច់ឱ្យរៀនសូត្រតាំងពីតូចរហូតដល់វ័យ១៧ឆ្នាំ។
លោកលី ម៉េងសាន ប្រធានមន្ទីរអប់រំយុវជននិងកីឡាខេត្តមានប្រសាសន៍ឲ្យដឹងនារសៀលថ្ងៃទី២៩សីហាថាចំពោះការប្រឡងរយៈពេល២ថ្ងៃជាថ្ងៃទី ២៨-២៩សីហា ឆ្នាំ២០២៥ ដំណើរការប្រឡងតាមមណ្ឌលចំនួន១៥ នៅក្នុងខេត្តកំពង់ចាម បានដំណើរការទៅដោយរលូនក្នុងនោះមានសិស្ស មិនបានមកប្រឡងចំនួន១០៤នាក់។
សូមបញ្ជាក់ថាសួនច្បារមាត់ទន្លេក្រុងកំពង់ចាមក្រោមការយកចិត្តទុកដើរពីសំណាក់ឯកឧត្តមអ៊ុន ចាន់ដាអភិបាលខេត្តពីមួយឆ្នាំទៅមួយឆ្នាំបានប្រឹងប្រែងអភិវឌ្ឍន៍ហេដ្ឋារចនាសម្ព័ន្ធនានាឱ្យមានការរីកចម្រើនគ្រប់វិស័យ។ ជាក់ស្ដែង មាត់ទន្លេក្នុងរដូវប្រាំងកន្លងមកគឺបានដាំផ្កាស្បៃរឿង រាប់ម៉ឺនគុម្ពបានទាក់ទាញភ្ញៀវទេសចរណ៍ជាតិនិងអន្តរជាតិឲ្យមកថតរូបទុកជាអនុស្សាវរីយ៍គឺមានគ្រប់ជាតិសាសន៍ទៀតផង។
ចែករំលែកព័តមាននេះ