ទីក្រុងប្រ៊ុចសែល៖ ប៉ូឡូញ និងអង្គការណាតូប្រញាប់ចល័តយន្តហោះចម្បាំងរបស់ខ្លួនជាបន្ទាន់នៅក្នុងស្ថានភាពអាសន្នបន្ទាប់ពីរុស្ស៊ីវាយប្រហារអ៊ុយក្រែនភាគខាងលិចខ្លាំងៗជាហេតុធ្វើឱ្យពួកគេបារម្ភថាស្រួលមិនស្រួលយន្តហោះ ឬដ្រូនរបស់រុស្ស៊ីអាចនឹងហោះចូលដែនអាកាសរបស់ខ្លួនទៀត។ ព្រឹត្តិការណ៍នេះកើតឡើង១ថ្ងៃបន្ទាប់ពីណាតូ និងអេស្តូនីចោទប្រកាន់ថារុស្ស៊ីរំលោភដែនអាកាសរបស់ខ្លួន។
ភាពតានតឹងរវាងណាតូ និងរុស្ស៊ីកាន់តែឡើងកម្ដៅខ្លាំងបន្ទាប់ពីមានករណីយន្តហោះចម្បាំងរុស្ស៊ីបីគ្រឿងជាប្រភេទយន្តហោះមិច (MiG) បានហោះចូលដែនអាកាសអេស្តូនីដែលអេស្តូនីចាត់ទុកថាជាទង្វើដ៏កម្រោល។ ដូច្នេះ មាត្រា៤នៃធម្មនុញ្ញរបស់អង្គការណាតូបានយកមកប្រើប្រាស់រហូតដល់ទៅ២ដងនៅក្នុងខែកញ្ញានេះ។ ករណីប៉ូឡូញចល័តយន្តហោះចម្បាំងជាថ្មីម្ដងទៀតរឹតតែធ្វើឱ្យគេបារម្ភថារុស្ស៊ីចាប់ផ្ដើមបង្កការគំរាមកំហែងចំពោះយោធភូមិភាគខាងកើតរបស់អង្គការណាតូ។
កងទ័ពប៉ូឡូញថ្លែងថាខ្លួនចាប់ផ្ដើមស្ទុះស្ទាចល័តយន្តហោះភ្លាមៗ។ ចំណែកប្រព័ន្ធការពារដែនអាកាស និងប្រព័ន្ធរ៉ាដាក៏ត្រូវដាក់ឱ្យប្រុងជើងការកម្រិតខ្ពស់ផងដែរកាលពីយប់មិញ។ អង្គការណាតូឥឡូវនេះចាប់ផ្ដើមបង្កើនការប្រុងប្រយ័ត្នខ្ពស់បន្ទាប់ពីប្រទេសអេស្តូនីដែលជាសមាជិករបស់ខ្លួនបានប្រើប្រាស់មាត្រា៤របស់ណាតូដើម្បីពិគ្រោះយោបល់ជាមួយរដ្ឋជាសមាជិកណាតូដទៃទៀតព្រោះតែសកម្មភាពយោធារបស់រុស្ស៊ីថ្មីៗនេះ។
អ្នកវិភាគអំពីស្ថានការណ៍សឹកយល់ថារុស្ស៊ីកំពុងធ្វើតេស្តអង្គការណាតូដើម្បីចង់ដឹងថាតើពួកគេមានប្រតិកម្មបែបណា។ យោធាប៉ូឡូញចេញសេចក្ដីថ្លែងការណ៍ថានៅវេលាម៉ោង៣:៣០ទៀបភ្លឺ រុស្ស៊ីវាយប្រហារពីចម្ងាយចូលទឹកដីអ៊ុយក្រែន។ ដូច្នេះ ប៉ូឡូញក៏ចល័តយន្តហោះចម្បាំងដើម្បីការពារដែនអាកាសរបស់ខ្លួន។ យោធាអ៊ុយក្រែនអះអាងថាខ្លួនបាញ់ទម្លាក់ដ្រូនរបស់រុស្ស៊ី៥៥២គ្រឿង និងមីស៊ីលបណ្ដែត២៩គ្រាប់កាលពីយប់មិញ។
រហូតដល់ម៉ោង៥ទៀបភ្លឺទើបសភាពការណ៍ស្ងប់ស្ងាត់ឡើងវិញ។ គួរកត់សម្គាល់ថាមូលហេតុដែលប៉ូឡូញប្រុងប្រយ័ត្នដល់ថ្នាក់នេះបន្ទាប់ពីអេស្តូនីរាយការណ៍ថាយន្តហោះមិច៣១ (MiG-31) របស់រុស្ស៊ីបីគ្រឿងហោះចូលដែនអាកាសរបស់ខ្លួននៅលើឈូងសមុទ្រហ្វាំងឡង់រយៈពេល១២នាទី។ ម៉្យាងទៀត កាលពីប៉ុន្មានថ្ងៃមុននេះ ប៉ូឡូញខ្លួនឯងក៏រងការបំពានដែនអាកាសផងដែរពីសំណាក់ដ្រូនរបស់រុស្ស៊ីជាងម្ភៃគ្រឿង។
ប្រតិកម្មចំពោះករណីចុងក្រោយនេះ ក្រសួងការពារជាតិរុស្ស៊ីថ្លែងថាយន្តហោះរបស់ខ្លួនមិនបានហោះចូលដែនអាកាសអេស្តូនីទេ។ ក្រសួងអះអាងថាយន្តហោះមិច៣១ទាំងនោះគ្រាន់តែហោះតាមធម្មតាពីការ៉េលីយ៉ា (Karelia) ឆ្ពោះទៅកាលីនីនក្រាត (Kaliningrad) និងអនុវត្តត្រឹមត្រូវទៅតាមបទបញ្ញត្តិជាធរមានរបស់អាកាសចរណ៍អន្តរជាតិ។
បន្ទាប់ពីអេស្តូនីរាយការណ៍អំពីភាពមិនប្រក្រតីនោះ លោកត្រាំក៏បានបញ្ចេញប្រតិកម្មជាបណ្ដើរៗផងដែរ។ លោកថាលោកមិនចង់ឃើញព្រឹត្តិការណ៍នេះកើតឡើងទេ។ លោកយល់ថាបើបណ្ដោយបែបនេះតទៅទៀតអាចនឹងមានរឿងធំជាមិនខាន។ អ្នកជំនាញយល់ថាបើក្រុមបស្ចិមប្រទេសមិនប្រើធម៌ក្ដៅលើរុស្ស៊ីដោយដាក់ទណ្ឌកម្មឱ្យបានខ្លាំងក្លាទេ រុស្ស៊ីនឹងរំលោភចូលដែនអាកាសរបស់រដ្ឋជាសមាជិកអង្គការណាតូជាបន្តទៀត។ នេះបើតាមប្រភពពីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ