ទីក្រុងកៀវ៖ រុស្ស៊ីវាយសង្គ្រប់អ៊ុយក្រែនដោយដ្រូន និងមីស៊ីលបណ្ដាលឱ្យស្លាប់មនុស្សយ៉ាងតិច៣នាក់ និងរបួសរាប់សិបនាក់។ នេះបើតាមការបញ្ជាក់របស់លោកហ្សេឡិនស្គី។ តាមរយៈសេចក្ដីថ្លែងការណ៍នៅលើបណ្ដាញតេឡេក្រាម លោករៀបរាប់ថារុស្ស៊ីបញ្ជូនដ្រូន៥៨០គ្រឿង និងមីស៊ីល៤០គ្រាប់វាយប្រហារហេដ្ឋារចនាសម្ព័ន្ធរបស់អ៊ុយក្រែន, រោងចក្ររបស់ជនស៊ីវិល និងអគារស្នាក់នៅរបស់ជនស៊ីវិល។
មួយយប់ទល់ភ្លឺ លោកហ្សេឡិនស្គីថាអ៊ុយក្រែនរងការវាយប្រហារយ៉ាងសន្ធាប់ពីរុស្ស៊ី។ រាល់ការវាយប្រហារទាំងនេះមិនមែនជាគោលដៅយោធាទេ។ ប៉ុន្តែជាចេតនាបំភិតបំភ័យជនស៊ីវិល និងបំផ្លិចបំផ្លាញហេដ្ឋារចនាសម្ព័ន្ធរបស់អ៊ុយក្រែន។ នៅកណ្ដាលទីក្រុងឌីនីប្រូ (Dnipro) មីស៊ីល១គ្រាប់ដែលពាំនាំទៅជាមួយនូវគ្រាប់បែកចង្កោមបានបាញ់ចំអគារស្នាក់នៅរបស់ជនស៊ីវិល។
នៅឌីនីប្រូដដែលនេះ មនុស្សម្នាក់ស្លាប់ និង២៦នាក់រងរបួស។ នេះបើតាមការបញ្ជាក់បន្ថែមពីអាជ្ញាធរប្រចាំតំបន់នោះ។ ពួកគេបង្ហោះរូបភាពជាច្រើនសន្លឹកនៅលើតេឡេក្រាមបង្ហាញរូបអគារដែលខូចខាត, ដំបូលត្រូវបំផ្លិចបំផ្លាញអស់, កញ្ចក់បង្អួចបែកខ្ចាយ, អ្នកខ្លះស្វះស្វែងរកការជួយផ្នែកសុខាភិបាល និងក្រុមអ្នកជួយសង្គ្រោះកំពុងធ្វើការនៅកន្លែងកើតហេតុ។
មនុស្ស២នាក់ស្លាប់នៅតំបន់ឆឺនីហ៊ីវ (Chernihiv) និងក្មែលនីតស្គី (Khmelnytskyi)។ នៅដំណាក់កាលនេះ រុស្ស៊ីទំនងជាដូរយុទ្ធសាស្ត្រសង្គ្រាមរបស់ខ្លួននៅក្នុងការវាយប្រហារតាមអាកាស។ រុស្ស៊ីឥឡូវនេះច្រើនបញ្ជូនដ្រូនម្ដងៗរាប់រយគ្រឿងទៅវាយប្រហារ។ ដូច្នេះឃើញថារុស្ស៊ីបញ្ជូនកាន់តែច្រើនឡើងៗបើប្រៀបធៀបកាលពីមុនរុស្ស៊ីបញ្ជូនត្រឹមរាប់សិបគ្រឿងតែប៉ុណ្ណោះ។
កាលពីយប់មិញ គេស្ដាប់ឮសំឡេងស៊ីរ៉ែនប្រកាសអាសន្នរហូតដល់១១ម៉ោងនៅតំបន់ខ្លះ។ រុស្ស៊ីវាយប្រហារជា២ដំណាក់កាលធំៗ។ នេះបើយោងតាមអ្នកវិភាគអំពីស្ថានការណ៍សឹក។ កងទ័ពអាកាសអ៊ុយក្រែនអះអាងថាយោធារបស់ខ្លួនបាញ់ទម្លាក់ដ្រូន៥៥២គ្រឿង និងមីស៊ីល៣១គ្រាប់។ ប៉ូឡូញដែលនៅជិតខាងអ៊ុយក្រែន រួមជាមួយក្រុមសម្ព័ន្ធមិត្តរបស់ខ្លួនបានចល័តយន្តហោះចម្បាំងជាច្រើនគ្រឿងដើម្បីបង្ការទុកជាមុន ក្រែងលោដ្រូន ឬមីស៊ីលរុស្ស៊ីហោះចូលដែនអាកាសខ្លួនដូចកាលពីប៉ុន្មានថ្ងៃមុន។
ជាថ្មីម្ដងទៀត លោកហ្សេឡិនស្គីសូមអំពាវនាវទៅក្រុមបស្ចិមប្រទេសផ្ដល់ប្រព័ន្ធការពារដែនអាកាសឱ្យបានច្រើនថែមទៀតដើម្បីទប់ទល់នឹងការវាយប្រហារកាន់តែខ្លាំងឡើងៗ។ ម៉្យាងទៀត លោកក៏សូមអំពាវនាវឱ្យក្រុមប្រទេសទាំងនោះដាក់ទណ្ឌកម្មរុស្ស៊ីឱ្យបានខ្លាំងក្លាបន្ថែមទៀតផងដែរ។ លោកនិយាយដោយមោទកភាពថាអ៊ុយក្រែនមានសមត្ថភាពការពារខ្លួន និងការពារអឺរ៉ុប។ សំខាន់ត្រូវផ្ដល់ខែលការពារដែនអាកាសដែលមានប្រសិទ្ធភាព។ យើងត្រូវតែរួមកម្លាំងគ្នាធ្វើកិច្ចការនេះ។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ