ទីក្រុងប្រ៊ុចសែល៖ ថ្ងៃនេះមានករណីដ៏គួរឱ្យភ្ញាក់ផ្អើលមួយនៅប៉ែកអឺរ៉ុបនៅពេលមានការវាយប្រហារតាមប្រព័ន្ធព័ត៌មានវិទ្យា (អ៊ីនធឺណិត) បណ្ដាលឱ្យរអាក់រអួលប្រព័ន្ធកុំព្យូទ័រនៅព្រលានយន្តហោះធំៗមួយចំនួនរួមទាំងអាកាសយានដ្ឋានហ៊ីតស្រ៊ូរបស់អង់គ្លេស (Heathrow), អាកាសយានដ្ឋាននៅប្រ៊ុចសែល និងប៊ែឡាំងផងដែរ។ ជើងហោះហើរជាច្រើនខ្សែត្រូវពន្យារពេលចេញដំណើរ ឬត្រូវលុបចោលតែម្ដង។
ក្រុមហ៊ុនសន្តិសុខព័ត៌មានវិទ្យារបស់អាមេរិកាំងឈ្មោះកូលីន អ៊ែរ៉ូស្ពេស (Collins Aerospace) ដែលទទួលរ៉ាប់រងការពារប្រព័ន្ធកុំព្យូទ័រនៅតាមក្រុមហ៊ុន ឬព្រលានយន្តហោះនៅទូទាំងពិភពលោកកំពុងមានបញ្ហារអាក់រអួលផ្នែកបច្ចេកទេស។ ការវាយប្រហារតាមប្រព័ន្ធព័ត៌មានវិទ្យាលើកនេះធ្វើឱ្យប្រព័ន្ធដំណើរការស្វ័យប្រវត្តិកម្មត្រូវគាំងនៅមួយកន្លែងមិនអាចបើកប្រតិបត្តិការបាន។ ដូច្នេះនៅតាមព្រលានយន្តហោះត្រូវតែប្រើវិធីបុរាណដើម្បីឆែកឈ្មោះអ្នកដំណើរឡើងយន្តហោះដោយបុគ្គលិកផ្ទាល់។
ព្រលានយន្តហោះនៅទីក្រុងប្រ៊ុចសែលប្រាប់ថាអនុវត្តវិធីបែបនេះធ្វើឱ្យប៉ះពាល់ការហោះហើរ។ ពេលខ្លះត្រូវពន្យារពេល និងពេលខ្លះត្រូវលុបចោលជើងហោះហើរ។ ក្រុមហ៊ុនសន្តិសុខព័ត៌មានវិទ្យាខាងលើកំពុងធ្វើការយ៉ាងដុតដៃដុតជើងដើម្បីដោះស្រាយបញ្ហានេះឱ្យបានឆាប់រហ័សបំផុតតាមដែលអាចធ្វើទៅបាន។ ចំពោះអ្នកដែលត្រូវចេញដំណើរនៅថ្ងៃសៅរ៍នេះត្រូវជូនដំណឹងទៅក្រុមអាកាសចរណ៍មុនពេលធ្វើដំណើរទៅព្រលានយន្តហោះដើម្បីកុំឱ្យខកជើង។
អាកាសយានដ្ឋានទីក្រុងប៊ែឡាំងថ្លែងថាដោយសារមានបញ្ហារអាក់រអួលផ្នែកបច្ចេកទេសទូទាំងទ្វីបអឺរ៉ុបដូច្នេះ អ្នកដំណើរត្រូវសំកុករង់ចាំរយៈពេលយូរទម្រាំបានឡើងយន្តហោះម្ដងៗ។ យើងកំពុងខិតខំដោះស្រាយបញ្ហានេះឱ្យបានឆាប់រហ័ស។ សំណាងល្អ អាកាសយានដ្ឋានដ្ឋានទីក្រុងហ្វ្រាងហ្វឺត (Frankfurt) ដែលធំជាងគេនៅអាល្លឺម៉ង់អាចគេចផុតពីការវាយប្រហារលើកនេះ។ ចំណែកអាកាសយានដ្ឋានទីក្រុងហ្ស៊ូរីច (Zurich) ប្រទេសស្វីសក៏សុខសប្បាយផងដែរ។ មានន័យថាបើកដំណើរការជាប្រក្រតី។ នេះបើតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ