ខេត្តសៀមរាប ៖ ទឹកលិចលើកំណាត់ផ្លូវតុលាការ ហួសទៅដល់មុខគណបក្សជ្រាវ និងហួសទៅ ដល់មុខសាលាបឋមសិក្សាជ្រាវ និងផ្លូវកៅស៊ូ ទៅផ្សារមេម៉ាយ ដែលស្ថិតនៅក្នុងភូមិសាស្ត្រ.សង្កាត់ជ្រាវ ក្រុងសៀមរាប…
ខេត្តសៀមរាប ៖ ទឹកលិចលើកំណាត់ផ្លូវតុលាការ ហួសទៅដល់មុខគណបក្សជ្រាវ និងហួសទៅ ដល់មុខសាលាបឋមសិក្សាជ្រាវ និងផ្លូវកៅស៊ូ ទៅផ្សារមេម៉ាយ ដែលស្ថិតនៅក្នុងភូមិសាស្ត្រ.សង្កាត់ជ្រាវ ក្រុងសៀមរាប កំពុងប្រឈមនឹងស្ថានភាពទឹកជំនន់លិចផ្ទះប្រជាពល រយៈពេល៣ថ្ងៃជាប់គ្នាមកហើយ បង្កឱ្យមានការលំបាកយ៉ាងខ្លាំងដល់ការធ្វើដំណើររបស់បងប្អូនប្រជាពលរដ្ឋ និងប៉ះពាល់ដល់ទ្រព្យសម្បត្តិជាច្រើន ក្នុងការលិចលង់លើកំណាត់ផ្លូវនេះ ចាប់តាំងពីថ្ងៃទី២៨ ដល់ ៣០ ខែសីហា ឆ្នាំ២០២៥ នៅមិនទាន់រកដំណោះស្រាយបាននៅឡើយពីអាជ្ញាធរមូលដ្ឋាន ឬមន្ត្រីពាក់ព័ន្ធ ។
ប្រជាពលរដ្ឋដែលរស់នៅតាមដងផ្លូវនោះ បានឱ្យដឹងនៅថ្ងៃទី៣០ ខែសីហា ឆ្នាំ២០២៥នេះថា ទឹកជន់លិចកើតឡើងជាញឹកញាប់ រាល់ពេលមានភ្លៀងធ្លាក់ខ្លាំងម្តងៗ និងពិបាកក្នុងការធ្វើដំណើរ និងប្រើប្រាស់ផ្លូវជាច្រើនថ្ងៃ ។ ទឹកហូរកាត់រយៈពេលយូថ្ងៃធ្វើឱ្យផ្លូវខូច និងបំផ្លាញទ្រព្យសម្បត្តិសាធារណៈ ជាពិសេស ទ្រព្យសម្បត្តិរបស់បងប្អូនប្រជាពលរដ្ឋនេះតែម្តង។
ក្នុងឱកាសនេះដែរ ប្រជាពលរដ្ឋរស់នៅក្នុងសង្កាត់ជ្រាវទាំងអស់ បានស្នើសុំឱ្យអាជ្ញាធរ និងមន្ត្រីពាក់ព័ន្ធពិចារណាជួយរកវិធីដោះស្រាយ ដោយបើកផ្លូវទឹក ឬកាយប្រឡាយឱ្យបានធំ និងច្រើនកន្លែងសមស្រប ដើម្បីឱ្យទឹកអាចហូរចេញបានលឿន ចៀសវាងការបង្កឱ្យផ្លូវខូចកាន់តែខ្លាំង និងការខូចខាតដល់ទ្រព្យសម្បត្តិសាធារណៈ រួមទាំងរបស់របរបងប្អូនប្រជាពលរដ្ឋ ។ ពលរដ្ឋបានបញ្ជាក់ថា ប្រសិនបើមានការជួយរំដោះទឹកឱ្យបានលឿន នឹងអាចកាត់បន្ថយការលំបាកក្នុងជីវភាពប្រចាំថ្ងៃ និងការបាត់បង់សេដ្ឋកិច្ចរបស់គ្រួសារជាច្រើននៅតំបន់នោះ ផងដែរ ដូចជាៈ ដំណាំដាំដុះជាដើម ។
សូមបញ្ជាក់ថា ៖ ពលរដ្ឋបានឱ្យដឹងអំពីកំណាត់ផ្លូវនេះបានរងការខូចខាតជាច្រើនឆ្នាំមកហើយ ពលរដ្ឋសង្កេតឃើញថា មានការជួសជុលផងដែរ ដូចជាយកថ្មមកចាក់បំពេញផ្លូវ , ឈួសកៀរប្រភេទដីក្រហម មានកន្លែងខ្លះចាក់ស៊ីម៉ង់បំពេញ មិនបានយូរប៉ុន្មាន មានក្បាលថ្ម និងក្រឡុកកើតមកវិញលើផ្លូវនេះ លើសពីមុននៅក្នុងកណ្តាលក្រុងសៀមរាបនឹងគេដែរ។
ចែករំលែកព័តមាននេះ