ខេត្តស្ទឹងត្រែង ៖ អាជ្ញាធរភូមិ ឃុំ ស្រុក មិនត្រូវចេញលិខិតបញ្ជាក់ទៅលើដីព្រៃឡើយ ហើយត្រូវចូលរួមថែរក្សាព្រៃសហគមន៍ ព្រៃតំបន់គ្រប់គ្រងដោយកសិកម្ម ព្រៃឈើគ្រប់គ្រងដោយបរិស្ថាន និងមិនអោយមានការកាប់បំទន្ទ្រានដីព្រៃឈើរបស់រដ្ឋ…
ខេត្តស្ទឹងត្រែង ៖ អាជ្ញាធរភូមិ ឃុំ ស្រុក មិនត្រូវចេញលិខិតបញ្ជាក់ទៅលើដីព្រៃឡើយ ហើយត្រូវចូលរួមថែរក្សាព្រៃសហគមន៍ ព្រៃតំបន់គ្រប់គ្រងដោយកសិកម្ម ព្រៃឈើគ្រប់គ្រងដោយបរិស្ថាន និងមិនអោយមានការកាប់បំទន្ទ្រានដីព្រៃឈើរបស់រដ្ឋ លោកអភិបាលខេត្ត ថ្លែងបែបនេះ នៅក្នុងពិធីដាំកូនឈើ នាព្រឹកថ្ងៃទី១១ ខែកក្កដា ឆ្នាំ២០២៥ ស្ថិតនៅបរិវេណវិទ្យាល័យព្រះគោ ស្រុកថាឡាបរិវ៉ាត់ ។
លោកអភិបាលខេត្ត បានថ្លែងថា ៖ ពិធីបុណ្យ «រុក្ខទិវា» គឺជាចលនាបំផុសបំផុលការដាំដុះដើមឈើដ៏ធំមួយ និងជាប្រពៃណីដ៏ល្អផូរផង់ឧត្តុង្គឧត្តម នៃព្រះរាជាណាចក្រកម្ពុជាយើង ដែលចលនានេះចាប់មានតាំងពី «សម័យសង្គមរាស្ត្រនិយម» ក្រោមព្រះរាជបូជនីយកិច្ចផ្ដួចផ្ដើម និងដឹកនាំដោយព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯក
ភាពជាតិខ្មែរ ព្រះបរមរតនកោដ្ឋ ព្រះវររាជបិតាកសិកម្មជាតិ។ ហើយបុណ្យនេះ បានបន្តក្រោមព្រះរាជពិធីដ៏ខ្ពង់ខ្ពស់បំផុត ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងមានថ្នាក់ដឹកនាំ ប្រកបដោយគតិបណ្ឌិត របស់សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី បច្ចុប្បន្ន ជាប្រធានព្រឹទ្ធសភា រហូតដល់ពេលនេះ ក្រោមការដឹកនាមប្រកបដោយ ភាពភ្លឺស្វាងច្បាស់លាស់របស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា គឺបានរៀបចំជាបន្តបន្ទាប់ ជាទិវាជាតិ និងតែងតែជ្រើសរើសយកខែ កក្កដា ជារៀងរាល់ឆ្នាំ ។
ក្នុងកម្មវិធីខាងលើនេះ លោកអភិបាលខេត្តបានផ្តាំផ្ញើទៅអាជ្ញាធរភូមិ ឃុំ ស្រុក មិនត្រូវចេញលិខិតបញ្ជាក់ទៅលើដីព្រៃឡើយ ហើយត្រូវចូលរួមថែរក្សាព្រៃសហគមន៍ ព្រៃតំបន់គ្រប់គ្រងដោយកសិកម្ម ព្រៃឈើគ្រប់គ្រងដោយបរិស្ថាន និងមិនអោយមានការកាប់បំទន្ទ្រានដីព្រៃឈើរបស់រដ្ឋ យកធ្វើជាកម្មសិទ្ធិដាច់ខាត ។
ការដាំដើមឈើ មិនត្រឹមតែលើកស្ទួយព្រៃឈើ នៃការដាំដុះឡើងវិញនោះទេ តែជាការរួមចំណែកធ្វើឱ្យប្រសើរឡើងចំពោះសុខភាព និងសុខមា
លភាពរបស់ប្រជាពលរដ្ឋ ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក ទុំ នីរ៉ូ បានគូសបញ្ជាក់ថា នៅក្នុងឆ្នាំ២០២៥នេះ មន្ទីរកសិកម្ម រុក្ខាប្រមាញ់ និងនេសាទខេត្ត ដែលមានខណ្ឌរដ្ឋបាលព្រៃឈើស្ទឹងត្រែង ជាសេនាធិការ បានបណ្តុះកូនឈើចម្រុះចំនួន ២៨,៦០០ដើម ។ រុក្ខទិវាដែលប្រព្រឹត្តទៅនៅថ្ងៃទី១១ កក្កដា ២០២៥នេះ ខណ្ឌរដ្ឋបាលព្រៃឈើបានរៀបចំកូនឈើប្រមាណជា ២ម៉ឺនដើម ក្បុងនោះរួមមាន ៖ ដើមឈើក្រញ៉ូង ដើមឈើបេង ដើមឈើធ្នង់ ដើមក្ងោក ដើមឈើគគី ដើមឈើកកោះ និងដើមព្រីង ។ ក្នុងកម្មវិធីផ្ទាល់ថ្នាក់ដឹកនាំ មន្ត្រីរាជការ កងកម្លាំង លោកគ្រូអ្នកគ្រូ សិស្សានុសិស្សបានដាក់ដាំកូនឈើបាន៩៥០ដើម។ ក្រៅពីនោះ បានធ្វើការចែកចាយជូនប្រជាពលរដ្ឋ និងស្ថាប័នផ្សេងៗទៀតដាំតាមទីសាធារណៈ វត្តអារាមសាលារៀន សួនច្បារ ផ្លូវសាធារណៈព្រមទាំងដាំដុះជាលក្ខណៈគ្រួសារ ជាពិសេសបានបំផុស ចលនាដល់គូរស្រករថ្មីដាំកូនឈើក្នុងម្នាក់ ០១ដើម ក្នុងពេលប្រារព្ធអាពាហ៍ពិពាហ៍ ដើម្បីទុកជា អនុស្សាវរីយ៍ចំណងដៃគូរស្វាមីភរិយាថ្មី ៕
ចែករំលែកព័តមាននេះ