ទីក្រុងបាងកក៖ គ្រប់គ្នាកំពុងរង់ចាំអ៊ុតស្ថានការណ៍វិវត្តនយោបាយនៅប្រទេសថៃ។ នៅពេលមានពាក្យចចាមអារ៉ាមថាគណបក្សភឿថៃបន្ទាប់ពីតុលាការធម្មនុញ្ញដកតំណែងមេរបស់ខ្លួន (លោកស្រីផែថងថាន) រួចមក គណបក្សនេះអាចនឹងប្រើសន្លឹកបៀរចុងក្រោយគឺរំលាយសភាចោលដើម្បីរៀបចំការបោះឆ្នោតជ្រើសតាំងអ្នកតំណាងរាស្ត្រឡើងវិញ។
ឥឡូវនេះ មានពាក្យចចាមអារ៉ាមថាគណបក្សភឿថៃអាចមានសេណារីយោ២ ទី១-ស្នើបេក្ខភាពរបស់ខ្លួនទៅសភាដើម្បីបោះឆ្នោតផ្ដល់សេចក្ដីទុកចិត្ត និងទី២-បើបេក្ខភាពរបស់ខ្លួនទទួលបានសំឡេងមិនគ្រប់គ្រាន់ទេដែលមានន័យថាភឿថៃមិនអាចបន្តកាន់អំណាចជាបន្តទៀត ភឿថៃនឹងប្រើសន្លឹកបៀរចុងក្រោយគឺរំលាយសភាចោលដើម្បីរៀបចំការបោះឆ្នោតឡើងវិញ។ មានន័យថាមិនឱ្យគណបក្សណាផ្សេងបង្កើតរដ្ឋាភិបាលបាន។ នេះជានយោបាយ «បាយមួយឆ្នាំងបើខ្លួនឯងមិនបានបរិភោគទេ ខ្លួនជាន់កម្ទេចចោលកុំឱ្យអ្នកដទៃបានបរិភោគ»។
ប៉ុន្តែបើភឿថៃចង់ប្រើស្នៀតនេះក៏ប្រហែលជាទៅមិនរួចដែរព្រោះ «ក្រុមប្រឹក្សារដ្ឋ» បានបញ្ជាក់ច្បាស់ៗហើយថាការរំលាយសភាលុះត្រាតែនាយករដ្ឋមន្ត្រីពេញសិទ្ធិទើបធ្វើរឿងនេះបាន។ ដូច្នេះ លោកភូមិថាមដែលជានាយករដ្ឋមន្ត្រីស្ដីទី ឬនាយករដ្ឋមន្ត្រីចាំផ្ទះបច្ចុប្បន្នគ្មានសិទ្ធិនៅក្នុងរឿងនេះទេ។ លោកផាកន នីលប្រាភូន (Pakorn Nilpraphun) ជាអគ្គលេខាធិកាក្រុមប្រឹក្សារដ្ឋថ្លែងប្រាប់អ្នកសារព័ត៌មានមុនកិច្ចប្រជុំពិសេសគណៈរដ្ឋមន្ត្រីថាលុះត្រាតែនាយករដ្ឋមន្ត្រីពេញសិទ្ធិទើបមានសិទ្ធិរំលាយសភា។
អគ្គលេខាធិការរូបនេះចង់សង្កត់ធ្ងន់ថានាយករដ្ឋមន្ត្រីស្ដីទីត្រូវតែបែងចែកឱ្យដាច់ពីគ្នាថាតើកិច្ចការអ្វីខ្លះដែលខ្លួនអាចធ្វើបាន និងអ្វីខ្លះដែលហួសពីដែនសមត្ថកិច្ចរបស់ខ្លួន។ រដ្ឋមន្ត្រីទីស្ដីការគណៈរដ្ឋមន្ត្រី លោកឈូសាក់ ស៊ិរិនីល ( Chousak Sirinil) បញ្ជាក់ថានៅក្នុងកិច្ចប្រជុំពិសេសគណៈរដ្ឋមន្ត្រីនោះគ្មាននិយាយអំពីការរំលាយសភាទេ។ ប៉ុន្តែនិយាយអំពីការតែងតាំងបេក្ខភាពគណៈរដ្ឋមន្ត្រីដើម្បីស្នើសុំសេចក្ដីទុកចិត្តពីសភាបន្ទាប់ពីលោកស្រីផែថងថានត្រូវតុលាការដកតំណែង។
មន្ត្រីខាងលើនេះថ្លែងបន្តទៀតថារដ្ឋាភិបាលមិនទាន់ចង់និយាយអំពីការរំលាយសភាទេ។ បញ្ហានេះអាចនឹងលើកយកមកនិយាយនៅពេលរដ្ឋាភិបាលថ្មីបង្កើតមិនបាន។ លោកចង់មានន័យថាចាំភឿថៃដើរកៀងគរគណបក្សនយោបាយដទៃទៀតដើម្បីស្នើបេក្ខភាពនាយករដ្ឋមន្ត្រីទៅរដ្ឋសភាសិន។ បើសភាច្រានចោលចាំគិតអំពីការរំលាយសភា។
ប៉ុន្តែស្ថានការណ៍ជាក់ស្ដែងមិនដូចអ្វីដែលគាត់និយាយនោះទេព្រោះប្រធានក្រុមប្រឹក្សារដ្ឋបញ្ជាក់រួចហើយថាបើភឿថៃបង្កើតរដ្ឋាភិបាលមិនចេញទេគឺទុកឱ្យគណបក្សផ្សេងជាអ្នកស្នើបេក្ខភាពទៅសភាវិញម្ដង។ ថ្មីៗនេះ លោកអនុទីន ប្រធានគណបក្សភូមិចៃថៃ អះអាងថាលោកប្រមូលបានសំឡេងគាំទ្រគ្រប់គ្រាន់ដើម្បីក្លាយជានាយករដ្ឋមន្ត្រីថ្មី។ លោកសន្យាថាកាន់តំណែងតែបីបួនខែប៉ុណ្ណោះនឹងរៀបចំការបោះឆ្នោតជាថ្មី។ នេះបើយោងតាមសារព័ត៌មានបាងកកប៉ុស្តិ៍ និងប្រភពដទៃទៀត៕
ចែករំលែកព័តមាននេះ