រាជធានីភ្នំពេញ៖ លោក​ឧត្តមសេនីយ៍ឯក ជួន ណា​រិ​ន្ទ បានបញ្ជាទៅលោកស្នងការរងផែនធនធាន​មនុស្ស ហៅអធិការងនគរបាលខណ្ឌចំការមន មកធ្វើការតាមវិន័យនគរបាលជាតិ បន្ទាប់ពីប្រើពាក្យសម្ដីមិនសមរម្យ។

លោក​ឧត្តមសេនីយ៍ឯក ជួន ណា​រិ​ន្ទ អគ្គស្នងការ​រង ជា​ស្នងការ​នគរបាល​រាជា​ធានី​ភ្នំពេញ បាន​បង្ហោះ​ព័ត៌មាន​លើ​បណ្តាញ​សង្គម តាម​រយៈ​ផេ​ក​ផ្ទាល់ខ្លួន​របស់​លោកនៅរាត្រីថ្ងៃ​ទី​៣០ ខែសីហា ឆ្នាំ​២០២៥ ដោយ​បញ្ជាក់​ថាលោកសូមគោរពជម្រាបជូន បងប្អូនមហាជន មេត្តាជូនជ្រាបថា ករណីលោកអធិការងនគរបាលខណ្ឌចំការមន​ ប្រើពាក្យសម្ដីមិនសមរម្យទៅលើក្មួយៗ​ កាលពីយប់មិញ ដោយលោកសូមអព្យាស្រ័យផងដោយមិនបានឆ្លើយតបបងប្អូនអ្នកលេងតាមបណ្ដាញសង្គម​ ពីព្រោះរូបលោកជាប់រវល់ដឹកនាំបញ្ជាជំនាញតាមស្រាវជ្រាវរកឃាតករជារឿងសំខាន់។​

លោក​ឧត្តមសេនីយ៍ឯក ជួន ណា​រិ​ន្ទ បានគូសបញ្ជាក់ថាចំពោះរូបលោកអធិការរង​ លោកបានបញ្ជាទៅលោកស្នងការរងផែនធនធាន​មនុស្ស ហៅមកធ្វើការតាមវិន័យនគរបាលជាតិ។

ជាមួយគ្នានេះលោក​ឧត្តមសេនីយ៍ឯក សង្ឃឹមជឿជាក់ថា បងប្អូនមហាជននឹងជឿជាក់មកលើលោកមិនដែលលើកលែងឱ្យមន្ត្រីដែលមានភាពអសកម្មនោះឡើយ​ ហើយក៏មិនគាំទ្រអ្នកដែលបង្កអសន្តិសុខក្នុងសង្គមជាតិផងដែរ។

​«សូម បងប្អូនចូលរួមគាំទ្រជាមួយសមត្ថកិច្ចយើងខ្ញុំ​ ដើម្បីភាពសុខសាន្តប្រជាពលរដ្ឋ​ និងប្រទេសជាតិយើង។ សូម គោរពអរគុណ និង អរគុណ»។ នេះជាប្រសាសន៍របស់លោក​ឧត្តមសេនីយ៍ឯក ជួន ណា​រិ​ន្ទ៕