ទីក្រុងប៉េកាំង៖ ចិន និងឥណ្ឌាកំពុងតែបោះដៃរកគ្នា និងខិតជិតគ្នាកាន់តែខ្លាំងនៅពេលប្រទេសទាំង២ប្រៀបបាននឹងមនុស្សកំពុងជិះនៅលើទូកតែមួយដោយសារការប្រឈមនឹងសង្គ្រាមពាណិជ្ជកម្មដូចគ្នាជាមួយអាមេរិក។ ចិនគ្រាន់បើជាងឥណ្ឌាដោយសារចិនមានសន្លឹកបៀរសម្រាប់តទល់ជាមួយអាមេរិក។ ចិនមានរ៉ែកម្រសម្រាប់តទល់។ បើអាមេរិកហ៊ានដំឡើងពន្ធគយទៅលើទំនិញចិន ចិននឹងបិទការនាំចេញរ៉ែកម្រទៅអាមេរិក ហើយធ្វើឱ្យរោងចក្រអាមេរិកខ្លះត្រូវតែបិទទ្វារ។
ចំណែកឥណ្ឌាត្រូវអាមេរិកដំឡើងពន្ធគយរហូតដល់៥០% សឹងតែរកស៊ីជាមួយគ្នាលែងកើតតែម្ដង។ ហេតុនេះហើយ ឥណ្ឌាចាប់ផ្ដើមងាកទៅចាប់ដៃគូជាមួយបណ្ដាប្រទេសធំៗនៅទ្វីបអាស៊ីដូចជាចិន និងជប៉ុនជាដើម។ បន្ទាប់ពីបញ្ចប់ទស្សនកិច្ចនៅចិន នាយករដ្ឋមន្ត្រីឥណ្ឌា លោកម៉ូឌី នឹងបន្តដំណើរទៅប្រទេសរុស្ស៊ីទៀតដើម្បីពង្រឹងទំនាក់ទំនង។
លោកម៉ូឌី និងប្រធានាធិបតីចិន លោកស៊ីជីនពីង យល់ស្របគ្នាថាប្រទេសទាំង២ជាដៃគូអភិវឌ្ឍជាមួយគ្នា និងមិនមែនជាគូប្រជែងគ្នាយកស្លាប់រស់ទេ។ លោកទាំង២កំពុងខិតខំកែលម្អទំនាក់ទំនងពាណិជ្ជកម្មចំពេលដែលសេដ្ឋកិច្ចពិភពលោកនៅតែមានបញ្ហាប្រឈមដោយសារនយោបាយដំឡើងពន្ធ។ នេះជាលើកទី១នៅក្នុងរយៈពេល៧ឆ្នាំដែលលោកម៉ូឌីធ្វើដំណើរទៅប្រទេសចិនជាថ្មីដើម្បីបំពេញទស្សនកិច្ច២ថ្ងៃ និងចូលរួមអង្គការសហប្រតិបត្តិការសៀងហៃស្ដីពីសន្តិសុខនៅក្នុងតំបន់។
ក្នុងនោះក៏មានវត្តមានរបស់ថ្នាក់ដឹកនាំរុស្ស៊ី (លោកពូទីន), អ៊ីរ៉ង់, ប៉ាគីស្ថាន និងប្រទេសអាស៊ីកណ្ដាលបួនទៀត។ នេះជាផ្នែកមួយនៃយុទ្ធសាស្ត្ររំលេចឱ្យឃើញសាមគ្គីភាពនៃក្រុមប្រទេសនៅអឌ្ឍគោលខាងត្បូង។ ក្រុមអ្នកវិភាគយល់ថាលោកស៊ីជីនពីង និងលោកម៉ូឌីកំពុងរួមកម្លាំងគ្នាទប់ទល់នឹងក្រុមបស្ចិមប្រទេសដែលដាក់សម្ពាធឥណ្ឌាពីបទទិញប្រេងឆៅពីរុស្ស៊ី។
លោកម៉ូឌីប្ដេជ្ញាចិត្តនៅចំពោះលោកស៊ីថានឹងខិតខំពង្រឹងទំនាក់ទំនងជាមួយចិន ហើយនឹងព្យាយាមកាត់បន្ថយឱនភាពពាណិជ្ជកម្ម (គេនាំចូលយើងច្រើនជាងយើងនាំចូលគេ) ជាង៩៩ពាន់លានដុល្លារក្នុងមួយឆ្នាំៗ។ ទន្ទឹមនឹងនោះ លោកម៉ូឌីក៏សង្កត់ធ្ងន់ផងដែរថាចាំបាច់ត្រូវតែថែរក្សាសន្តិភាព និងស្ថិរភាពនៅតាមបណ្ដោយព្រំដែនប្រទេសទាំង២បន្ទាប់ពីមានការប៉ះទង្គិចគ្នាប្រដាប់អាវុធមួយប្រាវរវាងចិន និងឥណ្ឌាកាលពីឆ្នាំ២០២០។
ដោយសារការប៉ះទង្គិចគ្នានោះ ប្រទេសទាំង២បិទជើងហោះហើរដោយត្រង់រយៈពេល៥ឆ្នាំមកហើយ។ ដូច្នេះលើកនេះលោកម៉ូឌីបញ្ជាក់ថាការហោះហើរត្រង់ទៅត្រង់មកនឹងចាប់ផ្ដើមឡើងវិញជាធម្មតា។ ប៉ុន្តែលោកមិនបានបញ្ជាក់ថានឹងចាប់ផ្ដើមនៅពេលណាពិតប្រាកដទេ។ រដ្ឋមន្ត្រីការបរទេសចិន លោកវ៉ាងយី ថ្លែងថាចិនបានឯកភាពបើកការនាំចេញឡើងវិញនូវរ៉ែកម្រ, ជីកសិកម្ម និងម៉ាស៊ីនជីកផ្លូវក្រោមដីទៅឥណ្ឌា។ ខាងលើនេះជាការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ