ទីក្រុងបាងកក៖ ឥឡូវនេះ គណបក្សភឿថៃ និងភូមិចៃថៃត្រូវគេសម្លឹងឃើញថាជាគូប្រជែងគ្នានៅក្នុងគម្រោងបង្កើតរដ្ឋាភិបាលថ្មី។ សូមរំលឹកថាគណបក្សឆ្ពោះទៅមុខ (Move Forward) ដែលត្រូវតុលាការធម្មនុញ្ញរំលាយចោលកាលពីឆ្នាំ២០២៤នោះរំលាយតែបក្សទេ ប៉ុន្តែអ្នកតំណាងរាស្ត្រភាគច្រើនបំផុតនៅបន្តសុពលភាពដដែល។ ពួកគេបានទៅជ្រកកោននៅក្នុងគណបក្សប្រជាជនដែលជាគណបក្សប្រឆាំងមានអ្នកតំណាងរាស្ត្រច្រើនជាងគេនៅក្នុងរដ្ឋសភា។
ភឿថៃ និងឆ្ពោះទៅមុខ មុនដំបូងចងសម្ព័ន្ធភាពនឹងគ្នាកាលពីឆ្នាំ២០២៣ដើម្បីត្រៀមបង្កើតរដ្ឋាភិបាលចម្រុះ។ ប៉ុន្តែក្រោយមក សម្ព័ន្ធភាពនេះក៏បែកបាក់ទៅវិញបន្ទាប់ពីបេក្ខភាពរបស់គណបក្សឆ្ពោះទៅមុខ (លោកភីថា) ទទួលបានសំឡេងមិនគ្រប់គ្រាន់។ ដូច្នេះ ភឿថៃក៏ងាកទៅចងសម្ព័ន្ធភាពជាមួយគណបក្សដទៃដូចជាភូមិចៃថៃ, រួមថៃសាងជាតិ, ផាឡាំងប្រឆារ៉ាត់ និងគណបក្សដទៃទៀតដើម្បីបង្កើតរដ្ឋាភិបាលចម្រុះ។
មិនយូរប៉ុន្មាន នាយករដ្ឋមន្ត្រីរបស់គណបក្សភឿថៃលោកសេដ្ឋាត្រូវតុលាការដកតំណែងពីបទតែងតាំងមនុស្សធ្លាប់មានទោសពៃរ៍ធ្វើជាសមាជិកគណៈរដ្ឋមន្ត្រី។ ក្រោយមក តុលាការដកតំណែងលោកស្រីផែថងថានមួយទៀតកាលពីថ្ងៃសុក្រ។ ឥឡូវនេះនៅពេលទឹកលិចដល់ច្រមុះ និងនៅពេលសម្លឹងឃើញថាខ្លួនស្ថិតនៅក្នុងដំណាក់កាល «ទៅមុខមិនរួច ថយក្រោយក៏មិនរួច» គណបក្សភឿថៃកំពុងងាកទៅចាប់ដៃសម្ព័ន្ធមិត្តចាស់របស់ខ្លួនដែលឥឡូវនេះជាគណបក្សប្រជាជន។
នៅក្នុងចំណោមវិធានការមួយចំនួនដែលគណបក្សភឿថៃដាក់ជូនទៅឱ្យគណបក្សប្រជាជនពិនិត្យមើលនោះក៏មានចំណុចខ្លះកុងគ្នានឹងគណបក្សភូមិចៃថៃ។ មែនទែនទៅ ភូមិចៃថៃកាលពីមុនពេលលោកស្រីផែថងថានត្រូវបានតុលាការព្យួរតំណែងកាលពីដើមខែកក្កានោះ ភូមិចៃថៃក៏ស្ថិតនៅក្នុងរដ្ឋាភិបាលចម្រុះជាមួយភឿថៃផងដែរ។ ប៉ុន្តែក្រោយមក ភូមិចៃថៃដកខ្លួនទៅធ្វើជាគណបក្សប្រឆាំងវិញម្ដង និងកំពុងចាប់ដៃជាមួយគណបក្សប្រជាជន។
នៅពេលភឿថៃ និងភូមិចៃថៃបោះដៃទៅរកខ្លួនដូច្នេះ ហើយបើខ្លួនទាក់ទងទាំងសងខាង មានន័យថាគណបក្សប្រជាជនកំពុងដើរយុទ្ធសាស្ត្រចាក់ខ្សែ ឬខ្លួនមួយជិះទូកពីរ។ បញ្ហានេះមិនស្រួលប៉ុន្មានទេ។ ស្រួលមិនស្រួលអាចនឹងក្លាយជាកូនអុកសម្រាប់គេប្រើ ឬជាករណីជិះក្របីចម្លងភក់មួយគ្រាៗនៅពេលដែលគេត្រូវការ។ តើក្រុមអ្នកតំណាងរាស្ត្រទាំងនោះអាចនឹងដើរជាន់ដានចាស់នៅពេលខ្លួនចងសម្ព័ន្ធភាពជាមួយគណបក្សភឿថៃឆ្នាំ២០២៣ ឬយ៉ាងណា? នយោបាយតែកាលណាដើរមិនស្រួលអាចនឹងធ្លាក់ប្រជាប្រិយភាពត្រឹមតែមួយប៉ប្រិចភ្នែក។
ភឿថៃប្រកាសកាលពីព្រឹកមិញថាខ្លួននឹងបញ្ជូនសមាជិកជាន់ខ្ពស់ទៅជួបមន្ត្រីគណបក្សប្រជាជនដល់ទីស្នាក់ការរបស់ពួកគេនៅល្ងាចថ្ងៃអាទិត្យដើម្បីបង្ហាញផែនការរំលាយសភាឱ្យបានឆាប់ និងធ្វើសេចក្ដីព្រាងរដ្ឋធម្មនុញ្ញថ្មី។ ជាថ្នូរត្រឡប់មកវិញ អ្នកតំណាងរាស្ត្រគណបក្សប្រជាជនត្រូវបោះឆ្នោតគាំទ្របេក្ខជនរបស់ភឿថៃដែលបញ្ជូនទៅឱ្យសភាអនុម័តនាពេលខាងមុខ។
ភឿថៃបញ្ជាក់ថាខ្លួនបានឯកភាពតាមលក្ខខណ្ឌរបស់គណបក្សប្រជាជនដែលចង់រំលាយសភាក្រោយពេលបង្កើតរដ្ឋាភិបាលបាន៤ខែដើម្បីរៀបចំការបោះឆ្នោតឡើងវិញ។ ភឿថៃសន្យាថាខ្លួនអាចនឹងរំលាយសភាមុននោះផងក៏ថាបាន។ សំខាន់ឱ្យតែនីតិវិធីដំណើរការបានឆាប់។ គួរកត់សម្គាល់ថាកាលពីមុននេះ គណបក្សប្រជាជនធ្លាប់ប្រកាសថាខ្លួននឹងមិនចូលរួមនៅក្នុងរដ្ឋាភិបាលចម្រុះបច្ចុប្បន្ននេះទេ។ គណបក្សនេះទាមទាររំលាយសភាឱ្យបានឆាប់ព្រោះខ្លួនទទួលបានសំឡេងគាំទ្រខ្លាំងនៅក្នុងការស្ទង់មតិ៕
ចែករំលែកព័តមាននេះ