ទីក្រុងវ៉ាស៊ីនតោន៖ ជម្លោះរវាងរដ្ឋាភិបាលលោកត្រាំ និងនាយករដ្ឋមន្ត្រីឥណ្ឌា លោកម៉ូឌី ប្រហែលជាមិនមែនលេងសើច ឬសម្ដែងទេ។ ថ្មីៗនេះ ប្រភពខ្លះបង្ហើបឱ្យដឹងថាលោកត្រាំសម្រេចលុបចោលគម្រោងទស្សនកិច្ចនៅឥណ្ឌា និងលុបចោលគម្រោងចូលរួមកិច្ចប្រជុំកំពូលក្រុមប្រទេសចតុភាគី ឬខ្វត…
ទីក្រុងវ៉ាស៊ីនតោន៖ ជម្លោះរវាងរដ្ឋាភិបាលលោកត្រាំ និងនាយករដ្ឋមន្ត្រីឥណ្ឌា លោកម៉ូឌី ប្រហែលជាមិនមែនលេងសើច ឬសម្ដែងទេ។ ថ្មីៗនេះ ប្រភពខ្លះបង្ហើបឱ្យដឹងថាលោកត្រាំសម្រេចលុបចោលគម្រោងទស្សនកិច្ចនៅឥណ្ឌា និងលុបចោលគម្រោងចូលរួមកិច្ចប្រជុំកំពូលក្រុមប្រទេសចតុភាគី ឬខ្វត (Quad) នៅចុងឆ្នាំនេះ។ ចំណុចស្នូលនៃបញ្ហារកាំរកូសនេះកើតឡើងពីលោកត្រាំមិនពេញចិត្តនឹងឥណ្ឌាទិញប្រេងឆៅពីរុស្ស៊ី។ អាមេរិកចាត់ទុកថាការដែលឥណ្ឌាទិញប្រេងរុស្ស៊ីធ្វើឱ្យរុស្ស៊ីមានលុយកាន់ពេញដៃ, ធ្វើឱ្យទណ្ឌកម្មរបស់បស្ចិមប្រទេសដែលដាក់លើរុស្ស៊ីគ្មានប្រសិទ្ធភាព និងធ្វើឱ្យរុស្ស៊ីបន្តធ្វើសង្គ្រាម។ ដូច្នេះលុយរបស់ឥណ្ឌាប្រៀបដូចជាការដុតបំពក់ភ្នក់ភ្លើងសង្គ្រាមដូច្នោះដែរ។
តាមពិតកាលពីមុននេះ លោកត្រាំ និងលោកម៉ូឌីគាំទ្រគ្នាទៅវិញទៅមក និងមានទំនាក់ទំនងជិតស្និទ្ធនឹងគ្នា។ លោកម៉ូឌីធ្លាប់កោតសរសើរលោកត្រាំថាជាកម្លាំងចលករសំខាន់ក្នុងការលើកកម្ពស់ទំនាក់ទំនងប្រទេសទាំង២។ លោកម៉ូឌីក៏សន្យាថានឹងអនុវត្តនយោបាយដូចលោកត្រាំដែរគឺ «ធ្វើឱ្យប្រទេសឥណ្ឌាអស្ចារ្យម្ដងទៀត»។ ប៉ុន្តែបញ្ហាចាប់ផ្ដើមកើតឡើងជាបណ្ដើរៗបន្ទាប់ពីលោកត្រាំដំឡើងពន្ធគយទៅលើទំនិញឥណ្ឌាទាំងមុនទាំងក្រោយសរុបស្មើនឹង៥០%ពីបទទិញប្រេងឆៅរុស្ស៊ី។
លោកម៉ូឌីប្រកាសថាប្រទេសឥណ្ឌាត្រៀមខ្លួនរួចហើយដើម្បីទប់ទល់នឹងការដំឡើងពន្ធដ៏ខ្ពស់នេះ។ ប៉ុន្តែគេគិតថាស្ថានភាពសេដ្ឋកិច្ចឥណ្ឌាអាចនឹងរងផលប៉ះពាល់ ហើយទំនាក់ទំនងពាណិជ្ជកម្មរវាងអាមេរិក និងឥណ្ឌាក៏មិនដឹងយ៉ាងម៉េចទៀត។ មើលទៅ ប្រទេសទាំង២ប្រហែលរកស៊ីជាមួយគ្នាលែងកើតហើយ។ អីចឹងហើយបានជាឥណ្ឌាចាប់ផ្ដើមងាកមកចាប់ដៃគូសហការជាមួយបណ្ដាប្រទេសនៅទ្វីបអាស៊ីដូចជាជប៉ុន និងចិនជាដើម។
បញ្ហារវាងអាមេរិក និងឥណ្ឌាប្រហែលជាមិនបញ្ចប់ដោយងាយៗទេព្រោះឥណ្ឌាបញ្ជាក់រួចហើយថាខ្លួននឹងមិនបញ្ឈប់ទិញប្រេងពីរុស្ស៊ីជាដាច់ខាត។ ការដាក់សម្ពាធរបស់លោកត្រាំជាវិញ្ញាសាសាកល្បងគោលជំហររបស់ឥណ្ឌាចំពោះរុស្ស៊ី និងធ្វើឱ្យឥណ្ឌាពិបាកសម្រេចចិត្តក្នុងនាមរុស្ស៊ីជាសម្ព័ន្ធមិត្តរបស់ឥណ្ឌាជាយូរមកហើយ។ បើឥណ្ឌាផ្អាកទិញប្រេងពីរុស្ស៊ីអាចនឹងធ្វើឱ្យរុស្ស៊ីអន់ចិត្ត។ ម៉្លោះហើយសុខចិត្តលំបាកតែម្នាក់ឯងចុះ។ ថ្មីៗនេះ លោកម៉ូឌីអំពាវនាវឱ្យប្រជាជនខិតខំពង្រឹងភាពឯករាជ្យ-ម្ចាស់ ឬខ្លួនទីពឹងខ្លួន និងខិតខំប្រើប្រាស់ទំនិញក្នុងស្រុកឱ្យបានច្រើន៕ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ