ទីក្រុងវ៉ាស៊ីនតោន៖ រដ្ឋាភិបាលរបស់លោកត្រាំអនុញ្ញាតឱ្យអ៊ុយក្រែនវាយប្រហារឆ្ងាយៗចូលទៅក្នុងដីរុស្ស៊ីហើយ។ នេះបើយោងតាមលោកម៉ាត់ វីតថេខឺ (Matt Whitaker) ជាឯកអគ្គរដ្ឋទូតអាមេរិកប្រចាំអង្គការណាតូ។ លោកត្រាំខិតខំបញ្ចប់សង្គ្រាមអ៊ុយក្រែន និងបានរៀបចំកិច្ចជំនួបកំពូលជាមួយលោកពូទីននៅអាឡាស់ស្កាកាលពីពាក់កណ្ដាលខែសីហា។ ប៉ុន្តែលោកពូទីនប្រកាន់ជំហររឹងមាំមិនព្រមដកថយទាល់តែសោះ។ លោកមិនព្រមធ្វើសម្បទានសូម្បីតែបន្តិចនៅក្នុងលក្ខខណ្ឌដែលលោកបានទាមទារទោះបីមានការអំពាវនាវឱ្យមានបទឈប់បាញ់យ៉ាងណាក្ដី។ មិនតែប៉ុណ្ណោះលោកក៏មិនព្រមជួបមុខលោកហ្សេឡិនស្គីទៅទៀត។
លោកត្រាំសង្ឃឹមថាការផ្ដល់មធ្យោបាយឱ្យអ៊ុយក្រែនវាយប្រហារឆ្ងាយៗចូលទឹកដីរុស្ស៊ីអាចនឹងបង្ខំឱ្យលោកពូទីនចូលតុចរចា។ ថ្លែងប្រាប់ទូរទស្សន៍ហ្វក់ (Fox) កាលពីពេលថ្មីៗនេះ លោកវីតថេខឺប្រាប់ថាយើងចាប់ផ្ដើមផ្ដល់លទ្ធភាពឱ្យអ៊ុយក្រែនវាយប្រហារឆ្ងាយៗ។ ច្បាស់ណាស់ថាអ៊ុយក្រែននឹងប្រើប្រាស់អាវុធទាំងនោះ។ ដូច្នេះ សេណារីយោសង្គ្រាមអាចនឹងខុសគ្នាពីជំនាន់លោកបៃដិន។
គេមិនទាន់ដឹងច្បាស់ថាតើអាវុធប្រភេទណាខ្លះដែលអាមេរិកអនុញ្ញាតឱ្យអ៊ុយក្រែនប្រើប្រាស់នោះទេ។ ប៉ុន្តែកាលពីពេលកន្លងមក អ៊ុយក្រែនធ្លាប់បានស្នើសុំបែបនេះជាច្រើនដងមកហើយ។ កាលពីជំនាន់លោកបៃដិន រហូតដល់ជិតបញ្ចប់អាណត្តិទើបលោកអនុញ្ញាតឱ្យអ៊ុយក្រែនបាញ់មីស៊ីលរយៈចម្ងាយឆ្ងាយម៉ាកអាត់តាខំ (ATACMS) ចូលទឹកដីរុស្ស៊ី។ មីស៊ីលនេះមានវង់ប្រតិបត្តិការ១៩០ម៉ាយ ឬជាង៣រយគីឡូម៉ែត្រ។
ដោយសារស្នើសុំអាវុធវាយប្រហារឆ្ងាយៗពីក្រុមបស្ចិមប្រទេសរាងពិបាក អ៊ុយក្រែនងាកទៅផលិតដ្រូនក្នុងស្រុកដើម្បីហោះទៅវាយប្រហារទីតាំងឆ្ងាយៗក្នុងទឹកដីរុស្ស៊ី។ នៅក្នុងការផ្ដល់បទសម្ភាសជាមួយទូរទស្សន៍ហ្វក់ លោកវីតថេខឺថ្លែងថាលោកត្រាំកំពុងប្រើប្រាស់យុទ្ធសាស្ត្រមុខ២នៅក្នុងបញ្ហាអ៊ុយក្រែន។ ទី១-ប្រើធម៌ត្រជាក់ក្នុងការបញ្ចុះបញ្ចូលភាគីជម្លោះទាំង២ចូលតុចរចា និងទី២-បើមើលទៅពិបាកចរចាគ្នាពេក លោកនឹងដាក់សម្ពាធទៅលើរុស្ស៊ីដោយផ្ដល់អាវុធទៅឱ្យអ៊ុយក្រែន។
ថ្មីៗនេះ ក្រសួងការបរទេសអាមេរិកថ្លែងថាខ្លួនយល់ព្រមលក់មីស៊ីលបាញ់បានឆ្ងាយម៉ាកអ៊ីអ័រអេអឹម (ERAM)ចំនួន៣៣៥០គ្រាប់ទៅឱ្យអ៊ុយក្រែនគិតជាទឹកប្រាក់៨២៥លានដុល្លារ។ លោកវីតថេខឺថ្លែងថាអាមេរិកត្រៀមលក់អាវុធតម្លៃមួយពាន់លានដុល្លារក្នុងមួយខែៗទៅឱ្យអ៊ុយក្រែន។ ក្រុមប្រទេសសមាជិកអង្គការណាតូជាអ្នកចេញលុយទិញអាវុធទាំងនោះ។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ