រាជធានីភ្នំពេញ ៖ ក្រសួងអប់រំ យុវជន និងកីឡា បានឱ្យដឹងថា បុគ្គលិកអប់រំណាប្រើប្រាស់ទូរស័ព្ទដៃក្នុងមណ្ឌលកំណែនឹងត្រូវទទួលខុសត្រូវចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត ។ តាមរយៈសេចក្ដីណែនាំរបស់ក្រសួងអប់រំ…
រាជធានីភ្នំពេញ ៖ ក្រសួងអប់រំ យុវជន និងកីឡា បានឱ្យដឹងថា បុគ្គលិកអប់រំណាប្រើប្រាស់ទូរស័ព្ទដៃក្នុងមណ្ឌលកំណែនឹងត្រូវទទួលខុសត្រូវចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត ។
តាមរយៈសេចក្ដីណែនាំរបស់ក្រសួងអប់រំ យុវជន និងកីឡា នៅថ្ងៃទី៣១ ខែសីហា ឆ្នាំ២០២៥ បានបញ្ជាក់ថា «ក្នុងគោលដៅធ្វើឱ្យការប្រឡងធានាបាននូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានក្រសួងអប់រំ យុវជន និងកីឡា សូមធ្វើការណែនាំចំពោះគណៈកម្មការនានាក្នុងដំណើរការកំណែនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ២៨ សីហា ២០២៥ ដូចជា ៖ មិនត្រូវថត និងផ្សព្វផ្សាយប្រធានវិញ្ញាសា សន្លឹកកិច្ចការបេក្ខជន និងអត្រាកំណែតាមគ្រប់រូបភាព ។ មិនត្រូវយកប្រធានវិញ្ញាសា និងអត្រាកំណែចេញពីមណ្ឌលកំណែ ។
ក្រសួងបានបន្ដថា ត្រូវប្រគល់ជូនគណៈកម្មការកណ្តាលនៃមណ្ឌលកំណែនូវ ៖ ប្រធានវិញ្ញាសា ក្រោយពេលធ្វើអត្រាកំណែចប់, អត្រាកំណែ នៅរៀងរាល់បញ្ចប់ការងារតាមពេល ។ ក្រសួងអប់រំបានគូសបញ្ជាក់ថា ៖«ចំពោះបុគ្គលិកអប់រំ ដែលយកចូល និងប្រើប្រាស់ទូរស័ព្ទដៃនៅក្នុងមណ្ឌលកំណែនឹងត្រូវទទួលខុសត្រូវចំពោះមុខច្បាប់ និងមិនអនុញ្ញាតឱ្យចូលរួមក្នុងដំណើរការប្រឡងជារៀងរហូត» ។
ជាមួយគ្នានោះដែរ ក្រសួងក៏សង្ឃឹមថា គណៈកម្មការនានាក្នុងដំណើរការកំណែនឹងអនុវត្តសេចក្តីណែនាំនេះឱ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់ ។
សូមរំលឹកថា គិតត្រឹមម៉ោង១៣:១០រសៀល ថ្ងៃទី៣០ ខែសីហា ឆ្នាំ២០២៥ ហឹបសន្លឹកកិច្ចការទាំងអស់របស់បេក្ខជននៃការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ២៨ សីហា ២០២៥ ត្រូវបានដឹកពីបណ្ដាខេត្តមកដល់មណ្ឌលកំណែវិទ្យាល័យព្រះស៊ីសុវត្ថិ ព្រមទាំងត្រូវបានរក្សាទុកយ៉ាងត្រឹមត្រូវ និងសុវត្ថិភាព ក្រោមការត្រួតពិនិត្យយ៉ាងម៉ត់ចត់ ពីសំណាក់គណៈមេប្រយោគទូទាំងប្រទេសប្រចាំរាជធានី-ខេត្ត អប្បមាទទូទាំងប្រទេស និងអង្គភាពប្រឆាំងអំពើពុករលួយ៕
ចែករំលែកព័តមាននេះ