រាជធានីភ្នំពេញ ៖ ក្រុមវារីវប្បករ ឬហៅថា អ្នកចិញ្ចឹមត្រី បានស្នើសុំឲ្យសហគមអ្នកផ្គត់ផ្គង់ត្រីក្នុងទីផ្សារ ងាកមកទិញត្រី ដែលជាផលិតផលចែកចាយលើទីផ្សារ ដែលការកាត់បន្ថយការធ្វើចំណាកស្រុករបស់កសិករ ដើម្បីស្វែងរកការងារធ្វើ…
រាជធានីភ្នំពេញ ៖ ក្រុមវារីវប្បករ ឬហៅថា អ្នកចិញ្ចឹមត្រី បានស្នើសុំឲ្យសហគមអ្នកផ្គត់ផ្គង់ត្រីក្នុងទីផ្សារ ងាកមកទិញត្រី ដែលជាផលិតផលចែកចាយលើទីផ្សារ ដែលការកាត់បន្ថយការធ្វើចំណាកស្រុករបស់កសិករ ដើម្បីស្វែងរកការងារធ្វើ ។
ការលើកឡើងរបស់ក្រុមអ្នកចិញ្ចឹមត្រី នៅក្នុងស្រុក គឺស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់ការចិញ្ចឹមត្រីក្នុងស្រុក ដើម្បីផ្គត់ផ្គង នៅលើទីផ្សារប្រសើរជាងការនាំចូលពីក្រៅប្រទេស ។ លើសពីនេះការលើកឡើងរបស់ក្រុមវារីវប្បករនេះ បន្ទាប់ពីសមាគមអ្នកផ្គត់ផ្គង់ត្រី ប្រឆាំងនឹងវិធានការរបស់រដ្ឋបាលជលផល ព្រោះខ្លាចរដ្ឋបាលជលផលអនុវត្តច្បាប់តឹងរឹង ដើម្បីប្រយោជន៍វារីវប្បករ ក្នុង ស្រុករាប់ម៉ឺនគ្រួសារ ធ្វើឱ្យប៉ះពាល់ ដល់ប្រយោជន៍របស់ក្រុមខ្លួន ដែលមានគ្នាត្រឹមតែ ៥ ឬ ៦នាក់ប៉ុណ្ណោះ ។
ថ្លែងនៅមាត់ស្រះលោក យស់ នូច ជាអ្នកចិញ្ចឹមត្រី រស់នៅភូមិពន្លៃ ឃុំបាបោងស្រុកពាមរក៍ ខេត្តព្រៃវែង បានលើកថា លោកបានឃើញក្រុមហ៊ុននាំចូល នាំត្រីពីប្រទេសជិតខាង ស្នើឲ្យក្រសួងកសិកម្ម រុក្ខាប្រមាញ និងនេសាទ សុំឲ្យនាំចូលត្រីឲ្យបានច្រើន ។
ត្រង់ចំណុចនេះ ក្នុងនាមជាកសិករ និងអ្នកចិញ្ចឹមត្រី បានបដិសេធចំពោះសហគមន៍ផ្តត់ផ្គង់ត្រី ក៏ដូចជាក្រុមហ៊ុម ដែលស្នើឲ្យមានការនាំចូលត្រី ពីខាងក្រៅឲ្យបានច្រើន ព្រោះវាធ្វើឲ្យប៉ះពាល់ការងារ និងជីវភាពរបស់អ្នកចិញ្ចឹមត្រី ដូចជាពួកគាត់ ។
លោកបញ្ជាក់ថា ៖”ខ្ញុំសូមជំទាស់ដាច់ខាត ចំពោះការស្នើសុំនេះ ការចិញ្ចឹមត្រី ក្នុងស្រុកកំពុងតែរីកចម្រើន ត្រីយើងចិញ្ចឹមបានច្រើនហើយ មិននាំគ្នាប្រមូលចែកចាយលក់ក្នុងស្រុក បែរជានាំគ្នានាំត្រីចូលពីខាងក្រៅ” ។
កសិកររូបនេះ បានអះអាងថា ការនាំចូលត្រីពីខាងក្រៅ ដើម្បីផ្គត់ផ្គង់ក្នុងស្រុក ប្រៀបដូចជាយកមកសម្លាប់កសិករក្នុងស្រុកអ៊ីចឹង ។
លោក យស់ នូច បានលើកឡើងទៀតថា ការនាំចូលត្រីពេលខាងក្រៅ បានតែផលប្រយោជន៍ពីក្រុមហ៊ុនបីបួនតែប៉ុណ្ណោះ ហើយវាធ្វើឱ្យប៉ះពាល់ដល់កសិករទូទាំងប្រទេស ដូច្នេះ ខ្ញុំគិតថា មិនបាច់នាំចូលច្រើននោះទេ ដោយងាកមកទិញត្រីក្នុងស្រុក ទៅធ្វើការចែកចាយ ទៅបានហើយបើខ្វះទើបយើងធ្វើការផលិតបន្ថែមទៀត ។
លោកក៏ចង់ឃើញសហគមផ្គត់ផ្គង់ត្រី លើកទឹកចិត្តដល់កសិករ ក្នុងការចិញ្ចឹមត្រី ឲ្យបានច្រើន ដើម្បីឱ្យគាត់មានការងារធ្វើ និងទទួលបានប្រាក់ចំណូល សមរម្យសម្រាប់ផ្គត់ផ្គង់ជីវភាពក្នុងគ្រួសារ។ ព្រោះកសិករខ្មែរយើង ឥតមានការងារធ្វើច្រើនទំនេរច្រើន បើសហគមន៍ជំរុញពួកគាត់ឲ្យចិញ្ចឹមត្រី ឲ្យបានច្រើន នោះពួកគាត់មិនបាច់ធ្វើចំណាកស្រុក ដើម្បីទៅស្វែងរកការងារធ្វើនៅក្រៅប្រទេសនោះទេ ។
នៅក្នុងទិវាមច្ឆជាតិនៅខេត្តកំពង់ចាម កន្លងមក សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានជំរុញឱ្យអ្នកចិញ្ចឹមត្រីពង្រើក ការចិញ្ចឹមត្រីរបស់ខ្លួនបន្ថែមទៀត ដើម្បីធានាសន្តិសុខស្បៀង និងតម្រូវការប្រើប្រាស់ក្នុងស្រុក ព្រោះបច្ចុប្បន្នត្រីធម្មជាតិ បានថយចុះគួរឱ្យកត់សម្គាល់ ដែលមិនអាចផ្គត់ផ្គង់គ្រប់តាមតម្រូវការ ។
សម្តេចធិបតី នាយករដ្ឋមន្ត្រីនៃកម្ពុជា បានចាត់ទុកការរៀបចំទិវាមច្ឆជាតិ ១កក្កដា ២០២៤ គឺការបំផុសនូវចលនា និងជំរុញការចិញ្ចឹមត្រីនៅកម្ពុជា ដើម្បីធានានូវសន្តិសុខស្បៀង និងការហូបចុករបស់ប្រជាពលរដ្ឋ ដែលបានកើនឡើងជាបន្តបន្ទាប់ ៕
ចែករំលែកព័តមាននេះ