រាជធានីភ្នំពេញ ៖ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានឆ្លើយតបថា អ្វីដែលក្រុមជ្រុលនិយមខ្លះ លើកឡើងថា…
រាជធានីភ្នំពេញ ៖ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានឆ្លើយតបថា អ្វីដែលក្រុមជ្រុលនិយមខ្លះ លើកឡើងថា ច្បាប់ដកសញ្ជាតិជាអំពើប្រល័យពូជសាសន៍ គឺជាការលើកឡើងដោយគ្មានមូលដ្ឋានច្បាស់លាស់ និងដើម្បីតែបម្រើរបៀបវារៈនយោបាយ ដែលបុគ្គលនោះចង់បាន ។
ថ្លែងនៅក្នុងសន្និសីទសារព័ត៌មាន អំពីលទ្ធផល នៃសម័យប្រជុំរដ្ឋសភា លើកទី៤ នីតិកាលទី៧ នៅព្រឹកថ្ងៃសុក្រ ទី១១ ខែកក្កដា ឆ្នាំ២០២៥ នៅវិមានរដ្ឋសភា ឯកឧត្តម កើត រិទ្ធ ក៏បានចោទសួរទៅក្រុមអ្នកលើកឡើងវិញថា «ប្រសិនបើការដកសញ្ជាតិជាអំពើប្រល័យពូជសាសន៍ ចុះចំពោះបណ្ដាប្រទេសទាំង១៥០ ដែលមានច្បាប់ដកសញ្ជាតិ តើប្រទេសទាំងនោះ បានប្រព្រឹត្តអំពើប្រល័យពូជសាសន៍ ឬយ៉ាងណា ?» ។
ជាមួយគ្នានោះដែរ ឯកឧត្តមរដ្ឋមន្ត្រីក្រសួងយុត្តិធម៌ ក៏បានលើកទឹកចិត្តទៅកាន់ក្រុមជ្រុលនិយមមួយចំនួន ដែលរស់នៅអាម៉េរិក បារាំង និងអូស្ត្រាលី ជាដើម ដែលលើកឡើងថា ការដកសញ្ជាតិជាអំពើប្រល័យពូជសាសន៍នោះ គួរទៅសិក្សាស្រាវជ្រាវពីច្បាប់ នៅក្នុងប្រទេស ដែលខ្លួនរស់នៅឱ្យបានគ្រប់ជ្រុងជ្រោយ ថាតើនៅក្នុងប្រទេសនោះ មានច្បាប់ដកសញ្ជាតិឬទេ ? ដើម្បីអាចជម្រះចោលនូវ «មោហៈទស្សនៈ» របស់ខ្លួន។
ឯកឧត្តម កើត រិទ្ធ បានគូសបញ្ជាក់ថា ច្បាប់កំណត់ដកសញ្ជាតិ ពលរដ្ឋខ្មែរណា ដែលគប់គិតជាមួយបរទេស បំផ្លាញជាតិ ឬធ្វើសកម្មភាពប៉ះពាល់ធ្ងន់ធ្ងរដល់វិស័យសន្តិសុខជាតិ, សេចក្ដីសុខសាន្តរបស់ប្រជាជន និងឧត្តមប្រយោជន៍របស់ប្រទេសជាតិ គឺជាការលើកកម្ពស់ជាតិសាសន៍ តាមរយៈការបន្សុទ្ធទឹកចិត្តស្នេហាជាតិរបស់ប្រជាជនចំពោះជាតិមាតុភូមិ ៕
ចែករំលែកព័តមាននេះ