ខេត្តកំពង់ឆ្នាំង ៖ ទោះបីមកដល់ពេលនេះ រឿងរ៉ាវកូនសិស្សថ្នាក់ទី ៦ក ម្នាក់ហក់ធាក់តុគ្រូនិងប្រមាថមើលងាយគ្រូបង្រៀន ត្រូវបានបញ្ចប់ ដោយសិស្សរូបនោះព្រមទទួលកំហុសនិងធ្វើកិច្ចសន្យាឈប់ប្រព្រឹត្ត អំពើបែបនេះក្តី ក៏មហាជននៅតែចង់ដឹងថាដើមចមនៃរឿងរ៉ាវមួយនេះកើតឡើងដោយបែបណា…
ខេត្តកំពង់ឆ្នាំង ៖ ទោះបីមកដល់ពេលនេះ រឿងរ៉ាវកូនសិស្សថ្នាក់ទី ៦ក ម្នាក់ហក់ធាក់តុគ្រូនិងប្រមាថមើលងាយគ្រូបង្រៀន ត្រូវបានបញ្ចប់ ដោយសិស្សរូបនោះព្រមទទួលកំហុសនិងធ្វើកិច្ចសន្យាឈប់ប្រព្រឹត្ត អំពើបែបនេះក្តី ក៏មហាជននៅតែចង់ដឹងថាដើមចមនៃរឿងរ៉ាវមួយនេះកើតឡើងដោយបែបណា កោះសន្តិភាព សូមលំអិតព័ត៌មាននិងបញ្ជាក់ពីស្ថានភាពសាលាដូចខាងក្រោម ៖
លោក ស៊ន សុភាព មានពីលំនៅ ភូមិដំណាក់កំពូល សង្កាត់កំពង់ឆ្នាំង ក្រុងកំពង់ឆ្នាំង និងជាគ្រូបង្រៀនប្រចាំថ្នាក់ទី ៦ ក នៃសាលាបឋមសិក្សាភូមិថ្មី ឃុំកំពង់អូស ស្រុកជល់គីរី បានបញ្ជាក់តាមទូរសព្ទថា សិស្សឈ្មោះវ.ស.វ អាយុ១៣ ឆ្នាំ មានទីលំនៅប្រមាណតែ ១០០ម៉ែត្រពីសាលារៀន ។ សិស្សនេះធ្លាប់មានរឿងម្ដងហើយកាលពីថ្ងៃទី ២៥ ខែឧសភា ឆ្នាំ ២០២៤ ដោយកាលណោះ ដោយសារ លោកគ្រូបានដាក់កិច្ចការផ្ទះឲ្យធ្វើ ប៉ុន្តែពេលមកដល់ថ្នាក់សិស្សរូបនោះមិនបានធ្វើទេ ហើយថែមទាំងបោកកាបតាបរៀនចោល ដោយថាឱ្យលោកគ្រូជាអ្នកកៀបសង្កត់ទៅលើខ្លួន ព្រមទាំងសម្ដែងឥរិយាបថបបួលវ៉ៃជាមួយគ្រូ មួយស្មើទៀតផង ។ រឿងនេះត្រូវបានបញ្ចប់ដោយមានការសម្របសម្រួលគ្នារវាងអាណាព្យាបាលនាយកសាលានិងអាជ្ញាធរមូលដ្ឋាន។
ក្រោយមកនៅថ្ងៃសុក្រ ទី ៩ ខែសីហា ឆ្នាំ២០២៤ នៅពេលដែលលោកគ្រូបង្រៀន ឱ្យសរសេរតាមអាន មាន១០ពាក្យ គាត់សរសេរបានតែ៧ពាក្យ ខុស៣ពាក្យ គឺពាក្យ ព្រហ្មគិត កិត្តិយសនិង សច្ចធម៌ ដូច្នេះគាត់ទទួលបាន តែ៧ពិន្ទុ ស្រាប់តែសិស្សរូបនោះបោកសៀវភៅហើយបានដើរចេញទៅផ្ទះ មុនម៉ោង ដោយមិនបានសួរហេតុផលពីការកាត់ពិន្ទុរបស់គាត់ជាគ្រូបង្រៀនឡើយ។ លុះដល់ទី១២ខែសីហា ជាថ្ងៃដើមសប្តាហ៍ គាត់បានហៅសិស្សរូបនោះឲ្យឡើងមកមុខ ដើម្បីសួរនាំ ពីរឿងចេញមុនម៉ោងកាលពីថ្ងៃទី៩ ស្រាប់តែសិស្សនោះចេញពីតុហើយរត់មកធាក់តុលោកគ្រូតែម្ដង។
សកម្មភាពនេះក៏បានតមាត់គ្នារវាងរូបគាត់ជាគ្រូបង្រៀន និងសិស្សរូបនោះខ្លាំងៗ ។បន្តិចក្រោយមកប្រហែលជាមានសិស្សនៅសាលា បានរត់ទៅប្រាប់ម្ដាយរបស់សិស្សនោះ ទើបម្ដាយបានមកដល់ ហើយចំពេលដែលកូនសិស្សរូបនោះ ហក់ធាក់តុគ្រូ ជាលើកទី ៣ និង បានបបួលលោកគ្រូវ៉ៃ១ស្មើទៀតផង។
លោក ស៊ន សុភាព បានបញ្ជាក់ថា ក្រោយមានបាតុភាពនេះកើតឡើងក៏មានកិច្ចប្រជុំរវាងការិយាល័យអប់រំយុវជននិងកីឡាស្រុកជល់គីរី លោកមេឃុំ មេភូមិ នគរបាលប៉ុស្តិ៍ រដ្ឋបាលឃុំកំពង់អូស ហើយសិស្សរូបនោះបានព្រមទទួលកំហុសនិងបានធ្វើកិច្ចសន្យាមិនឲ្យមានរឿងហ្នឹងកើតឡើងទៀតទេ។
ដោយឡែកសម្រាប់លោក ជាគ្រូបង្រៀន ក៏មានអារម្មណ៍តូចចិត្តខ្លួនឯងខ្លះដែរ ហេតុអីក្មេងម្នាក់ហ្នឹងយើងព្យាយាមអប់រំជាយូរមកហើយ នៅតែអប់រំមិនបាន។ ចំណុចមួយទៀត លោកមិននឹកស្មានសោះថាសិស្សនោះ ហ៊ានហក់ធាក់តុលោកគ្រូ បែបនេះឡើយ ហើយអ្វី ដែលលោកគ្រូគិតថាលោកអាចធ្វើបាននោះគឺ លោកគ្រូបានអត់ធ្មត់ នៅពេលដែលសិស្សប្រើអំពើហិង្សាបែបនេះ លោកគ្រូនៅតែមិនតបត ព្រោះយើងជាគ្រូបង្រៀន យើងតបត្តប្រើអំពើហិង្សាដូចគាត់នោះយើងជាអ្នកអប់រំព្រានប្រដៅសិស្ស បើយើងដូចគាត់ មនុស្សយើងដូចគាត់ជាមិនខានឡើយ។ ចំណុចមួយទៀតដែលលោកចាប់អារម្មណ៍នោះស្ត្រីជាម្ដាយនិងជាស្រីមេម៉ាយក៏មានការលំបាកដែរ។ព្រោះសិស្សរូបនោះសូម្បីតែគាត់ក៏ពិបាកព្រានម្ដាយដែរពេលខ្លះរកវ៉ៃកូនតែកូនរកតដៃវ៉ៃម្ដាយវិញ។ ហើយម្ដាយចេះតែអប់រំតាមបែបលួងលោមទៅ។
យ៉ាងនេះក្តី គាត់ជាសិស្សនិងជាម្ដាយបានធ្វើកិច្ចសន្យានៅចំពោះមុខសមត្ថកិច្ចនគរបាលប៉ុស្តិ៍និងមន្ត្រីការិយាល័យអប់រំស្រុកហ្នឹងអាជ្ញាធរមូលដ្ឋានរួចហើយដែរ។
សូមបញ្ជាក់ថាសាលាបឋមសិក្សាភូមិថ្មី មាន ៦ថ្នាក់ មានសិស្សសរុប៩១ នាក់និងមានបន្ទប់រៀនតែ២ប៉ុណ្ណោះ ។ នេះបើតាមការអះអាងរបស់លោក សូ រដ្ឋានាយកសាលាបឋមសិក្សាភូមិថ្មី។
លោកនាយកសាលា បានបញ្ជាក់ថាផលលំបាកបច្ចុប្បន្នសាលាមានតែ២បន្ទប់ប៉ុណ្ណោះ ហើយរៀន ៦ ថ្នាក់គឺត្រូវផ្លាស់ប្ដូរគ្នារៀន រហូតមក។ ក្រោយមកដោយសារសមាគម មាតាបិតាសិស្ស រៃអង្គាស ប្រាក់គ្នានិងមានការជួយឧបត្ថម្ភពីសប្បុរសជនផងនោះ ក៏បានកសាងបន្ទប់រៀនមួយទៀតនៅក្រោមសាលារៀនចាស់ ដែលជិតរួចរាល់ជាស្ថាពរហើយ។ លោកក៏សូមអំពាវនាវដល់បងប្អូនសប្បុរសធម៌សូមមេត្តាជួយកសាងសាលារៀននេះផង ៕
អត្ថបទពាក់ព័ន្ធ ៖
–ដឹងមូលហេតុហើយ! សិស្សសាលាបឋម១រូបហ៊ានធ្វើទង្វើបែបនេះច្រើនដងដាក់គ្រូ
ចែករំលែកព័តមាននេះ