រាជធានីភ្នំពេញ ៖ យុវជនចំនួន៥នាក់បានជិះម៉ូតូ៣គ្រឿងត្រលប់មកពីមើលការប្រគុំតន្ត្រីខនសឺតទៅផ្ទះជួលវិញ ក៏ត្រូវក្រុមក្មេងស្ទាវទំនើង១ក្រុមមានគ្នាជាង១០នាក់ជិះម៉ូតូចំនួន៧គ្រឿងដេញតាមកាប់ បណ្ដាលឲ្យរបួសធ្ងន់១នាក់និងស្រាល១នាក់ ។ បន្ទាប់មកក្រុមក្មេងស្ទាវទាំងនោះបានព្យាយាមគេចខ្លួន ប៉ុន្តែត្រូវបានកម្លាំងនគរបាលខណ្ឌពោធិ៍សែនជ័យ និងនគរបាលព្រហ្មទណ្ឌនៃស្នងការនគរបាលរាជធានីភ្នំពេញ ចេញអន្តរាគមន៍ធ្វើការឃាត់ខ្លួនបាន៦នាក់ ។
ហេតុការណ៍នោះបានកើតឡើង នៅវេលាម៉ោងជាង២យប់រំលងអាធ្រាត្រឈានចូលថ្ងៃទី២៩ ខែមីនា ឆ្នាំ២០២៦ នៅតាមផ្លូវបេតុង ស្ថិតនៅក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវនគរបាលឃាត់ខ្លួនបាននោះរួមមាន១,ឈ្មោះ អិម ណារិទ្ធ អាយុ១៨ឆ្នាំ ២,ឈ្មោះ ប៉ែន សុជូរ អាយុ១៨ឆ្នាំ ៣,ឈ្មោះ រ៉ន សវណ្ណរ៉ា អាយុ១៨ឆ្នាំ ៤,ឈ្មោះ ស៊ូ សុជាតិ អាយុ១៨ឆ្នាំ ៥,ឈ្មោះ មុំ សាមិត្ត អាយុ១៨ឆ្នាំ ៦,ឈ្មោះ ព្រុំ សុខជីង អាយុ១៨ឆ្នាំ ។ ក្រោយពេលឃាត់ខ្លួននគរបាលដកហូតម៉ូតូម៉ាកស៊ុយហ្ស៊ុយគីនិច ពណ៍ក្រហម ពាក់ស្លាកលេខ ភ្នំពេញ1KZ 9815 ,ម៉ូតូម៉ាក YAMAHA SIRIUS ពណ៍ក្រហមលាយខ្មៅ គ្មានស្លាកលេខ និងកាំបិតខ្វែវអត់ដង ១ដើម ។
ចំណែកជនរងគ្រោះដែលរងរបួសធ្ងន់ឈ្មោះថន វុទ្ធី ភេទប្រុស អាយុ២១ឆ្នាំ មានទីលំនៅភូមិត្រពាំងព្រីង ឃុំព្រៃអំព ស្រុកគីរីវង់ ខេត្តតាកែវ រងរបួសដៃនិងបែកក្បាលយ៉ាងដំណំ រីឯម្នាក់ទៀតរងរបួសស្រាលមិនស្គាល់ឈ្មោះ ។
នគរបាលបានប្រាប់ថា នៅមុនពេលកើតហេតុ ក្រុមជនសង្ស័យខាងលើមានគ្នាជាង១០នាក់និងបានជិះម៉ូតូចំនួន៧គ្រឿងត្រលប់មកពីដើរលេងនៅកោះពេជ្រ ចំណែកជនរងគ្រោះមានគ្នា៥នាក់ជិះម៉ូត៣គ្រឿងចេញពីមើលខនសឺតនៅភូមិកើតហេតុត្រលប់ទៅផ្ទះវិញ ។ លុះពេលទៅដល់ត្រង់ចំណុចលើតហេតុ ស្រាប់តែក្រុមជនសង្ស័យជិះម៉ូតូតាមកាប់ពីក្រោយ ពេលនោះជនរងគ្រោះភ័យក៏ដួលម៉ូតូ ហើយក៏ត្រូវជនសង្ស័យកាប់បណ្ដាលឲ្យរងរបួសតែម្ដង ។ ក្រោយពេលកើតហេតុនគរបាលខាងលើបានចុះទៅអន្តរាគមន៍ឃាត់ជនសង្ស័យបានចំនួន៦នាក់ ចំណែកបក្ខពួកច្រើននាក់ទៀតគេចខ្លួនបាត់អស់ ៕
ចែករំលែកព័តមាននេះ