រាជធានីភ្នំពេញ ៖ កម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ បានល្បាត ប្រទះឃើញជនសង្ស័យ៤នាក់កាន់ដំបងដែកដងឆ័ត្រ១ដើម ហើយជិះម៉ូតូ២អត់ស្លាកលេខ២គ្រឿងថែមទៀត ។ ដោយមានការសង្ស័យនគរបាលក៏បានដេញតាមឃាត់ខ្លួនបាន បន្ទាប់មកបាននាំយកទៅសាកសួរ…
រាជធានីភ្នំពេញ ៖ កម្លាំងប៉ុស្តិ៍នគរបាលរដ្ឋបាលពងទឹក នៃអធិការដ្ឋាននគរបាលខណ្ឌដង្កោ បានល្បាត ប្រទះឃើញជនសង្ស័យ៤នាក់កាន់ដំបងដែកដងឆ័ត្រ១ដើម ហើយជិះម៉ូតូ២អត់ស្លាកលេខ២គ្រឿងថែមទៀត ។ ដោយមានការសង្ស័យនគរបាលក៏បានដេញតាមឃាត់ខ្លួនបាន បន្ទាប់មកបាននាំយកទៅសាកសួរ ទើបដឹងថាជាក្រុមចោរ ដែលកន្លងមកក្រុមនេះបានឆក់ទូរស័ព្ទ និងធាក់ប្លន់ម៉ូតូជាបន្តបន្ទាប់ ។ ខណៈនោះនគរបាលក៏ឆែកឃើញស្លាកលេខម៉ូតូ២បន្ទះ ដែលក្រុមនេះដោះទុកនៅក្រោមកែបម៉ូតូ ងាយស្រួលគេចខ្លួនក្រោយពេលធ្វើសកម្មភាពរួច ដើម្បីកុំឲ្យជនរងគ្រោះនិងសមត្ថកិច្ចចំណាំភិនភាគបាន ។
ការឃាត់ខ្លួននោះបានធ្វើឡើងក្រោមការបញ្ជានិងដឹកនាំដោយលោកវរៈសេនីយ៍ឯក ជឹម សុីថា អធិនគរបាលខណ្ឌដង្កោ កាលពីវេលាម៉ោង០២និង៣០នាទីយប់ឈានចូលថ្ងៃទី២៨ ខែមីនា ឆ្នាំ២០២៦ ។ ដោយនគរបាលបានដេញតាមចាប់តាំងពីត្រង់ចំណុចមុខវត្តស្លែង ស្ថិតនៅក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ។ រហូតដល់ចំណុចភ្លើងស្តុបតាំងរនាម មហាវិថីសុី ជីនពីង ស្ថិតនៅក្នុងភូមិតាំងនាម សង្កាត់ប្រទះឡាង ខណ្ឌកំបូល រាជធានីភ្នំពេញ ទើបឃាត់បាន។
ចោរប្លន់ទាំង៤នាក់ដែលត្រូវនគរបាលឃាត់ខ្លួនបានខាងលើនោះរួមមាន១-ឈ្មោះ គឹម សីហា អាយុ១៨ឆ្នាំ ជនជាតិខ្មែរ ស្នាក់នៅផ្ទះជួល ភូមិស្នួលខ្ពស់ សង្កាត់កំបូល ខណ្ឌកំបូល ។ ២-ឈ្មោះ យឹម សុធា អាយុ១៨ឆ្នាំ ជនជាតិខ្មែរ ស្នាក់នៅផ្ទះជួល ភូមិស្នួលខ្ពស់ សង្កាត់កំបូល ខណ្ឌកំបូល រាជធានីភ្នំពេញ ។
៣-ឈ្មោះ ញឹម រិទ្ធី អាយុ១៨ឆ្នាំ ជនជាតិខ្មែរ ស្នាក់នៅ ផ្ទះជួលសង្កាត់កំបូល ខណ្ឌកំបូល ។ ៤-ឈ្មោះ គយ សម្ភស្ស អាយុ១៨ឆ្នាំ ជនជាតិខ្មែរ ស្នាក់នៅផ្ទះជួល ភូមិអង្គបឹងចក សង្កាត់កំបូល ខណ្ឌកំបូល ។
នគរបាលដកហូតយកបានម៉ូតូហុងដាឌ្រីមសេ១២៥ចំនួន០២គ្រឿង ,ស្លាកលេខម៉ូតូចំនួន០២បន្ទះមានលេខភ្នំពេញ1IZ-3252 និងលេខភ្នំពេញ1AT-0568 ,ព្រមទាំងដំបងដែកដងឆ័ត្រប្រវែង១១០សង្ទីម៉ែត្រ១ដើម ។
នគរបាលបានប្រាប់ឲ្យដឹងថា កាលពីវេលាម៉ោង០២និង៣០នាទីយប់ឈានចូលថ្ងៃទី២៨ ខែមីនា ឆ្នាំ២០២៦ កម្លាំងនគរបាលប៉ុស្តិ៍នគរបាលរដ្ឋបាលពងទឹកបានចេញល្បាតទប់ស្កាត់បទល្មើសនៅក្នុងមូលដ្ឋាន ក៏ស្រាប់តែប្រទះឃើញជនសង្ស័យចំនួន៤នាក់កាន់ដំបងដែកដងឆ័ត្រ និងជិះម៉ូតូ២គ្រឿងអត់ស្លាកលេខនៅតាមផ្លូវ ។ ដោយមានការសង្ស័យកម្លាំងនគរបាលខាងលើក៏ហៅឃាត់ឲ្យឈប់ដើម្បីត្រួតពិនិត្យ ស្រាប់ជនសង្ស័យទាំង៤នាក់នោះមិនព្រមឈប់ឡើយ ហើយបានបន្ថែមល្បឿនគេចខ្លួន ភ្លាមៗនោះនគរបាលក៏បានដេញតាមរហូតដល់ចំណុចភ្លើងស្តុបតាំងរនាម មហាវិថីសុី ជីនពីង ស្ថិតនៅភូមិតាំងនាម សង្កាត់ប្រទះឡាង ខណ្ឌកំបូល រាជធានីភ្នំពេញ ទើបឃាត់បាន។
នគរបាលបានប្រាប់ឲ្យដឹងបន្តទៀតថា ខណៈនោះបានឆែកមើលក្រោមកែបម៉ូតូទាំង២គ្រឿងក៏ឃើញមានស្លាកលេខម៉ូតូ២បន្ទះ ដែលជនសង្ស័យដោះទុកពេលចេញធ្វើសកម្មភាព ដើម្បីកុំឲ្យជនរងគ្រោះ ឬមហាជននិងសមត្ថកិច្ចចំណាំបានភិនភាគងាយស្រួលគេចខ្លួន ។ បន្ទាប់មកនគរបាលបាននាំយកជនទាំង៤នាក់នេះទៅធ្វើការសាកសួរនៅប៉ុស្ត៍ពងទឹក ហើយពួកនោះបានឆ្លើយសារភាពថា កន្លងមកពួកខ្លួនធ្លាប់បានបានធ្វើសកម្មភាពឆក់ទូរស័ព្ទ១លើកនៅភូមិសាសាស្ត្រសង្កាត់កំបូល ខណ្ឌកំបូល រាជធានីភ្នំពេញ ប៉ុន្តែមិនបានសម្រេចទេ។ ក្រោយមបានធ្វើសកម្មភាពធាក់ផ្តួលម៉ូតូម៉ាកហុងដាឌ្រីមសេ១២៥ ពណ៌ខ្មៅ របស់មនុស្សប្រុសម្នាក់ នៅតាមផ្លូវបេតុងទៅភ្នំបាសិទ្ធ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ ប៉ុន្តែមិនមានឱកាសយកម៉ូតូដែលធាក់ផ្តួលនោះបានទេ ហើយពេលនេះបានចេញធ្វើសកម្មភាពឆក់ប្លន់ទៀត ប៉ុន្តែមិនទាន់បានធ្វើផងក៏ត្រូវនគរបាលឃាត់ខ្លួនបានតែម្ដង ៕
ចែករំលែកព័តមាននេះ