សង្គ្រាមអ៉ីរ៉ង ៖ ពេលនេះ សង្គ្រាមអ៉ីរ៉ង់ចូលដល់គម្រប់១ខែហើយ និងកំពុងបន្ត មិនដឹងថា តើត្រូវបញ្ចប់តាមរបៀបណា ទោះបីមុននេះ ប្រធានាធិបតីអាមេរិកលោកដូណាល់ត្រាំ ធ្លាប់លើកពីការកម្ទេចអស់ហើយបណ្ដាមីស៊ីល…
សង្គ្រាមអ៉ីរ៉ង ៖ ពេលនេះ សង្គ្រាមអ៉ីរ៉ង់ចូលដល់គម្រប់១ខែហើយ និងកំពុងបន្ត មិនដឹងថា តើត្រូវបញ្ចប់តាមរបៀបណា ទោះបីមុននេះ ប្រធានាធិបតីអាមេរិកលោកដូណាល់ត្រាំ ធ្លាប់លើកពីការកម្ទេចអស់ហើយបណ្ដាមីស៊ីល កងនាវាចម្បាំងនិងបណ្ដាទីតាំងយោធាអ៉ីរ៉ងសំខាន់ៗក៏ដោយចុះ។ ចំណែកខាងអ៉ីរ៉ង់វិញ នៅតែឃើញអាចតបតចំពោះអ៉ីស្រាអែល និងកងទ័ពអាមេរិកយ៉ាចាស់ដៃ និងវាយប្រហារបណ្ដាប្រទេសជាប់ជិតខាង ដែលមានមូលដ្ឋានយោធាអាមេរិកបានខ្លាំងក្លានៅឡើយ ។ ម្យ៉ាងទៀតអ៉ីរ៉ងអាចបិទខ្ទប់ច្រកសមុទ្រហ័រមូស ដែលនាំឲ្យតម្លៃប្រេងនិងឧស័ន្មឡើងកាន់តែខ្ពស់ បង្កើនក្ដីបារម្ភដល់ពិភពលោកទាំងមូល ។
ចំពោះសង្គ្រាមដ៏បំផ្លិចបំផ្លាញ និងចំណាយសែនខ្ពស់នេះពិសេសសម្រាប់អាមេរិក ដែលអូសបន្លាយពេលយូរតទៅទៀត នាំឲ្យផ្ទុះបាតុកម្មតវ៉ាប្រឆាំងលោកត្រាំប្រឆាំងនយោបាយអន្តោប្រវេសន៍របស់លោក និងសង្គ្រាមប្រឆាំងអ៉ីរ៉ង់ក្នុងពាសពេញសហរដ្ឋអាមេរិក ។ ពួកបាតុករបានលើកគ្នាដើរហែក្បូន ចូលរួមដោយពួកតារាល្បីៗ ហើយនាំគ្នាស្រែកពាក្យដូចជាគ្មានពួកតាំងខ្លួនជាស្ដេច គ្មានICE គ្មានសង្គ្រាម ។ ពីមីនីប៉ូលិសដល់ហ្វីឡាដែលហ្វីយ៉ាឬបូស្តុន ពួកបាតុករបានដើរហែក្បួន ជាមួយប៉ង់កាតចារពាក្យប្រឆាំងសង្គ្រាមនិងលើករូបភាពជានិមិ្មត្តរូបសន្តិភាពក្រោយរយៈពេល១ខែនៃសង្គ្រាមនៅមជ្ឈឹមបូព៌ា និងជិតដល់ថ្ងៃបោះឆ្នោតពាក់កណ្ដាលអាណត្តិប្រធានាធិបតីនាខែវិច្ឆិកា។
ចលនាNO KINGS( គ្មានស្ដេច) ប្រកាសពីការរៀបចំបាតុកម្មដ៏ធំនេះ សម្រាប់ថ្ងៃទី៣ប្រឆាំងលោកត្រាំ។ បាតុកម្មប្រឆាំងលោកត្រាំនាថ្ងៃទី២៨មីនា មានមនុស្សចូលរួមក្នុងទូទាំងអាមេរិកដល់យ៉ាងតិច៨លាននាក់ ក្នុងក្បួនបាតុកម្មដល់៣៣០០។ អតីតយុទ្ធជនអាមេរិកម្នាក់អាយុត្រឹម៣៦ឆ្នាំដែលមកចូលរួមធ្វើបាតុកម្មនៅក្រុងអត្លង់តារដ្ឋចចជៀថ្លែងថា យើងយល់ថារដ្ឋធម្មនុញ្ញអាមេរិកកំពុងរងការគំរាមកំហែងច្រើនបែបយ៉ាងណាស់។ សភាពការណ៍មិនមែនធម្មតាទេនិងមិនអាចទទួលយកបាន។ នៅក្រុងវ៉ាស៊ីនតោនពួកបាតុករនិយាយថាលោកត្រាំគ្រាន់តែនិយាយកុហក។ ខ្ញុំគិតថាមនុស្សកាន់តែច្រើនកំពុងផ្ទុះកំហឹងហើយអ្វីៗនឹងមានការផ្លាស់ប្ដូរសន្សឹមៗ ៕
ចែករំលែកព័តមាននេះ