ខេត្តតាកែវ ៖ អភិបាលខេត្តតាកែវ ចុះពិនិត្យទីតាំងត្រៀមបើកការដ្ឋានសាងសង់ «ព្រែកជីកហ្វូណនតេជោ» ដំណាក់កាលទី២ ។ ជាក់ស្តែងបើយោងតាមផេកក្រសួងព័ត៌មានបានប្រកាសនារសៀលថ្ងៃទី៣០ ខែមីនានេះថា ៖…
ខេត្តតាកែវ ៖ អភិបាលខេត្តតាកែវ ចុះពិនិត្យទីតាំងត្រៀមបើកការដ្ឋានសាងសង់ «ព្រែកជីកហ្វូណនតេជោ» ដំណាក់កាលទី២ ។
ជាក់ស្តែងបើយោងតាមផេកក្រសួងព័ត៌មានបានប្រកាសនារសៀលថ្ងៃទី៣០ ខែមីនានេះថា ៖ នាព្រឹកថ្ងៃទី៣០ ខែមីនា ឆ្នាំ២០២៦ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានដឹកនាំក្រុមការងារ រដ្ឋបាលខេត្តតាកែវ ចុះពិនិត្យទីតាំងគ្រោងត្រៀមរៀបចំ ពិធីបើកការដ្ឋានសាងសង់ ព្រែកជីកហ្វូណនតេជោ ក្នុងដំណាក់កាលទី២ ស្ថិតនៅភូមិត្រើយឃ្លោក ឃុំដូងខ្ពស់ ស្រុកបូរីជលសារ នាពេលឆាប់ៗ ខាងមុខនេះ ស្ថិតក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា ។
មានប្រសាសន៍ចុះពិនិត្យមើលទីតាំងជាក់ស្ដែង ឯកឧត្តម វ៉ី សំណាង អភិបាលខេត្ត បានលើកឡើងថា គម្រោងព្រែកជីកហ្វូណនតេជោ គឺជាគម្រោងផ្លូវទឹកដ៏ធំមួយ ដែលមានសារៈសំខាន់ជាយុទ្ធសាស្ត្រសម្រាប់ការដឹកជញ្ជូន និងធ្វើពាណិជ្ជកម្ម ។ គម្រោងនេះត្រូវបានរំពឹងថា នឹងជំរុញសកម្មភាពសេដ្ឋកិច្ច និងដឹកជញ្ជូនក្នុងតំបន់ឱ្យកាន់តែប្រសើរឡើងថែមទៀត ។
ឯកឧត្តម អភិបាលខេត្ត បានគូសបញ្ជាក់ថា ប្រសិនគ្មានអ្វីប្រែប្រួលនោះទេ នៅថ្ងៃទី១១ ខែមេសាខាងមុខ និងមានការបើក ការដ្ឋានសាងសង់ ក្នុងដំណាក់កាលទី២ ក្នុងភូមិសាស្ត្រស្រុកបូរីជលសារ ខេត្តតាកែវ ស្ថិតក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា ។
សូមជម្រាបថា គម្រោងព្រែកជីកហ្វូណនតេជោ ឆ្លងកាត់ខេត្តតាកែវ មានប្រវែងប្រមាណ៥៨គីឡូម៉ែត្រ ដោយឆ្លងកាត់ ស្រុក-ក្រុងចំនួន៦ រួមមាន ៖ ស្រុកអង្គរបូរី ស្រុកព្រៃកប្បាស ស្រុកទ្រាំង ស្រុកបូរីជលសារ ស្រុកកោះអណ្ដែត និងស្រុកគិរីវង់៕
ចែករំលែកព័តមាននេះ