ខេត្តកែប ៖ នៅព្រឹកថ្ងៃទី៤ មិថុនា លោកអ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយ និងជាតំណាងដ៏ខ្ពង់ខ្ពស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បាននាំយកអំណោយមួយចំនួនទៅផ្តល់ជូនដល់ស្ត្រីរងគ្រោះដោយភ្លើងឆេះផ្ទះនៅភូមិអង្កោល ឃុំអង្កោល ស្រុកដំណាក់ចង្អើរ ដែលឆេះផ្ទះអស់កាលពីយប់ថ្ងៃទី១ មិថុនា កន្លងទៅ។ គ្រួសាររងគ្រោះមានគ្នា៤នាក់ ក្នុងនោះម្តាយ និងកូន២នាក់ រងរបួសធ្ងន់កំពុងសម្រាកព្យាបាលនៅក្នុងមន្ទីរពេទ្យខេត្តកំពត ចំណែកឪពុកដឹកយកទៅព្យាបាលនៅខេត្តកៀងយ៉ាង ប្រទេសវៀតណាម ។
ការប្រគល់អំណោយដល់ស្ត្រីឈ្មោះឆឹង ប៊ុនរិទ្ធ អាយុ៣១ឆ្នាំ និងកូនៗទាំង២នាក់ ដែលកំពុងព្យាបាលនៅមន្ទីរពេទ្យខេត្តកំពតនោះ ក៏មានវត្តមានលោកហាស់ សារ៉េត អភិបាលខេត្តកែប រួមដំណើរដោយមន្ត្រីរាជការខេត្តជាច្រើននាក់នោះរួមទាំងថវិកាចំនួន១លានរៀល និងសម្ភារជាច្រើន។ រីឯអំណោយរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ត្រូវបានលោកវេជ្ជបណ្ឌិត អ៊ុយ សំអាត ប្រគល់ដល់គ្រួសាររងគ្រោះនេះដែលមានថវិកាចំនួន៥លានរៀល និងសម្ភារជាច្រើនមុខ ។
លោកវេជ្ជបណ្ឌិត អ៊ុយ សំអាត មានប្រសាសន៍ថា នេះជាគ្រោះថ្នាក់ដែលគ្មានអ្នកណាម្នាក់បានដឹងមុន ប៉ុន្តែអ្វីដែលមានការកក់ក្តៅនោះគឺលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តែងតែមើលឃើញពីទុក្ខលំបាករបស់ប្រជាពលរដ្ឋដែលមានគ្រោះអាសន្ន។ លោកវេជ្ជបណ្ឌិតមានប្រសាសន៍ថា ចំណែកសាខាកាកបាទក្រហមខេត្តកែប ក៏មានអំណោយមួយចំនួនជួយឧបត្ថម្ភដែរ ហើយទោះបីជាអំណោយទាំងអស់នេះមានតិចតួចមិនអាចយកទៅប្រៀបធៀបនឹងទ្រព្យសម្បត្តិដែលបាត់បង់មែន តែនេះជាការសង្គ្រោះបន្ទាន់ ហើយក៏គ្មានអ្នកណាចង់ឱ្យកើតមានទុក្ខសោកបែបនេះដែរ ។ លោកវេជ្ជបណ្ឌិត អ៊ុយ សំអាត និងលោកហាស់ សារ៉េត ក៏បានផ្តាំផ្តើដល់ក្រុមគ្រូពេទ្យ សូមជួយព្យាបាលក្រុមគ្រួសាររងគ្រោះនោះឱ្យបានឆាប់ជាសះស្បើយ ជាពិសេសក្មេងតូចៗ ទើបតែមានអាយុជាង១ខួបដែលត្រូវរលាកយ៉ាងទារុណ ។
គួររំលឹកថា ហេតុការណ៍អគ្គិភ័យឆេះលំនៅឋាននេះបានកើតឡើងនៅវេលាម៉ោង១០និង៣០នាទីយប់ ថ្ងៃទី១ មិថុនា កន្លងមកនេះ។ តាមព័ត៌មានពីមន្ត្រីប៉ូលិសប៉ុស្តិ៍រដ្ឋបាលឃុំអង្កោលឱ្យដឹងថា មនុស្ស៤នាក់បានរងរបួស គឺ ប្តីឈ្មោះង៉ុង សាយ អាយុ៣០ឆ្នាំ ប្រពន្ធឈ្មោះឆឹង ប៊ុន អាយុ២៩ឆ្នាំ កូនស្រីឈ្មោះង៉ុង ណានីន អាយុ១០ឆ្នាំ និងកូនប្រុសទើបតែមានអាយុមួយខួប២ខែ ។ ទាំង៤នាក់នេះសុទ្ធតែត្រូវរងគ្រោះ ដោយអគ្គិភ័យ ។ ប្រភពបន្តថា ដោយឡែកស្ត្រីរងគ្រោះ និងកូនប្រុស២នាក់ត្រូវបានគេដឹកទៅកាន់មន្ទីរពេទ្យខេត្ត និងបុរសជាប្តីត្រូវបានដឹកទៅកាន់មន្ទីរពេទ្យខេត្តតៀងយ៉ាង ប្រទេសវៀតណាម ។
លំនៅឋានប្រជាពលរដ្ឋដែលឆេះនេះ គឺផ្ទះ២ខ្នងប្រក់ក្បឿងក្បាច់ ហើយការកើតមានគ្រោះអគ្គិភ័យនេះ ក៏មិនដឹងពីមូលហេតុអ្វីដែរ រីឯលោកមី លីន មេឃុំអង្គោល បាននិយាយថា ការឆេះលំនៅឋាននេះមិនទាន់ដឹងពីមូលហេតុឱ្យច្បាស់ការណ៍នៅឡើយទេ តែទំនងជាឆេះរថយន្តមុនព្រោះមានរថយន្តមួយគ្រឿងដែលគេផ្ញើនោះឆេះនៅសល់តែគ្រោងឆ្អឹង ។
លោកមេឃុំបានបន្តថា ពេលភ្លើងកំពុងឆេះនោះ បុរសជាម្ចាស់ផ្ទះ បានរត់ចុះមកកាត់អណ្តាតភ្លើងព្រមទាំងអោបកូនទាំង២នាក់ផង ហើយព្យាយាមរុញរថយន្តចេញពីក្រោមផ្ទះរហូតដល់សន្លប់បាត់ស្មារតី។ លោកម៉ី លីន មេឃុំបញ្ជាក់ថា ទ្រព្យសម្បត្តិទាំងអស់នៅក្នុងផ្ទះត្រូវភ្លើងឆេះម៉ដ្ឋ ។ ក្នុងគ្រោះអគ្គិភ័យនេះដែរ អ្នកភូមិបានយកម៉ាស៊ីនខ្នាតតូចសម្រាប់បាញ់ទឹកលាងម៉ូតូជួយបាញ់ពន្លត់ ដើម្បីកុំឱ្យរាលដាលដល់ផ្ទះបាយខាងក្រោយ និងតូបលក់សាំងមួយទៀតដែលនៅក្បែរនោះ ។ ចំណែកឯរថយន្តពន្លត់អគ្គិភ័យស្នងការ និងរថយន្តការពារភ្លើងឆេះព្រៃឧទ្យានកែបមិនបាន ចេញជួយអន្តរាគមន៍ទាន់ទេ ៕
«ព្រះអគ្គីត្របាក់លំនៅឋានឆេះរថយន្តសល់តែឆ្អឹងនិងរងរបួស៤នាក់»
ចែករំលែកព័តមាននេះ