ខេត្តកែប ៖ លំនៅឋានប្រជាពលរដ្ឋមួយគ្រួសារនៅភូមិអង្គោល ឃុំអង្គោល ស្រុកដំណាក់ចង្អើរ ត្រូវបានអណ្តាតភ្លើងឆាបឆេះម៉ដ្ឋនិងរថយន្តម៉ាកសាំយ៉ុងមួយគ្រឿង ក៏ត្រូវឆេះនៅសល់តែគ្រោងឆ្អឹង ។ ហេតុការណ៍អគ្គិភ័យឆេះលំនៅឋាននេះបានកើតឡើងនៅវេលាម៉ោង ១០ និង៣០នាទីយប់ថ្ងៃទី១ មិថុនា
ខេត្តកែប ៖ លំនៅឋានប្រជាពលរដ្ឋមួយគ្រួសារនៅភូមិអង្គោល ឃុំអង្គោល ស្រុកដំណាក់ចង្អើរ ត្រូវបានអណ្តាតភ្លើងឆាបឆេះម៉ដ្ឋនិងរថយន្តម៉ាកសាំយ៉ុងមួយគ្រឿង ក៏ត្រូវឆេះនៅសល់តែគ្រោងឆ្អឹង ។ ហេតុការណ៍អគ្គិភ័យឆេះលំនៅឋាននេះបានកើតឡើងនៅវេលាម៉ោង ១០ និង៣០នាទីយប់ថ្ងៃទី១ មិថុនា ។
តាមព័ត៌មានពីមន្ត្រីប៉ូលិសប៉ុស្តិ៍រដ្ឋបាលឃុំអង្កោលឱ្យដឹងថា មនុស្ស៤នាក់បានរងរបួស គឺ ប្តីឈ្មោះង៉ុង សាយ អាយុ៣០ឆ្នាំ ប្រពន្ធឈ្មោះឆឹង ប៊ុន អាយុ២៩ឆ្នាំ កូនស្រីឈ្មោះង៉ុង ណានីន អាយុ១០ឆ្នាំ និងកូនប្រុសទើបតែមានអាយុមួយខួប២ខែ ។ ទាំង៤នាក់នេះសុទ្ធតែត្រូវរងគ្រោះ ដោយអគ្គិភ័យ ។ ប្រភពបន្តថា ដោយឡែកស្ត្រីរងគ្រោះ និងកូនប្រុស២នាក់ត្រូវបានគេដឹកទៅកាន់មន្ទីរពេទ្យខេត្ត និងបុរសជាប្តីត្រូវបានដឹកទៅកាន់មន្ទីរពេទ្យខេត្តតៀងយ៉ាង ប្រទេសវៀតណាម ។
លំនៅឋានប្រជាពលរដ្ឋដែលឆេះនេះ គឺផ្ទះ២ខ្នងប្រក់ក្បឿងក្បាច់ ហើយការកើតមានគ្រោះអគ្គិភ័យនេះ ក៏មិនដឹងពីមូលហេតុអ្វីដែរ រីឯលោកមី លីន មេឃុំអង្គោល បាននិយាយថា ការឆេះលំនៅឋាននេះមិនទាន់ដឹងពីមូលហេតុឱ្យច្បាស់ការណ៍នៅឡើយទេ តែទំនងជាឆេះរថយន្តមុនព្រោះមានរថយន្តមួយគ្រឿងដែលគេផ្ញើនោះឆេះនៅសល់តែគ្រោងឆ្អឹង ។
លោកមេឃុំបានបន្តថា ពេលភ្លើងកំពុងឆេះនោះ បុរសជាម្ចាស់ផ្ទះ បានរត់ចុះមកកាត់អណ្តាតភ្លើងព្រមទាំងអោបកូនទាំង២នាក់ផង ហើយព្យាយាមរុញរថយន្តចេញពីក្រោមផ្ទះរហូតដល់សន្លប់បាត់ស្មារតី។ លោកម៉ី លីន មេឃុំបញ្ជាក់ថា ទ្រព្យសម្បត្តិទាំងអស់នៅក្នុងផ្ទះត្រូវភ្លើងឆេះម៉ដ្ឋ ។ ក្នុងគ្រោះអគ្គិភ័យនេះដែរ អ្នកភូមិបានយកម៉ាស៊ីនខ្នាតតូចសម្រាប់បាញ់ទឹកលាងម៉ូតូជួយបាញ់ពន្លត់ ដើម្បីកុំឱ្យរាលដាលដល់ផ្ទះបាយខាងក្រោយ និងតូបលក់សាំងមួយទៀតដែលនៅក្បែរនោះ ។ ចំណែកឯរថយន្តពន្លត់អគ្គិភ័យស្នងការ និងរថយន្តការពារភ្លើងឆេះព្រៃឧទ្យានកែបមិនបាន ចេញជួយអន្តរាគមន៍ទាន់ទេ ៕
ចែករំលែកព័តមាននេះ