រាជធានីភ្នំពេញ ៖ អាចជួយទំនុកបំរុងអ្នកនៅឆ្ងាយបាន ប៉ុន្តែពេលខ្លះអាចមើលរំលងជនទីទាល់ក្រពិតប្រាកដ ដែលនៅជិត និងថែរក្សាអ្នករាល់ថ្ងៃ នេះជាសម្តីពិតរបស់លោក ហួត ឈួរ ក្រឡាបញ្ជី នៃអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី១៩ ខែសីហា ឆ្នាំ២០២២ ក្នុងកម្មវិធីតូចមួយដែលលោកមានចិត្តសប្បុរសធម៌ មើលឃើញជនក្រីក្រទីទាល់នៅជិតខ្លួន និងបានជួយឧបត្ថមគ្រឿងឧបភោគបរិភោគ និងថវិកាតាមលទ្ធភាពដែលខ្លួនមាន ដល់ស្ត្រីជាបុគ្គលិកអ្នកអនាម័យកម្លាំងសមត្ថកិច្ចនគរបាលយាមការពារប្រចាំការគោលដៅសាលាដំបូងរាជធានីភ្នំពេញ សន្តិសុខ និងអ្នករត់ម៉ូតូឌុបសរុបចំនួន១៥នាក់ ក្នុងនោះ ម្នាក់ៗទទួលបានអង្ក២៥គីឡូ ទឹកត្រី១ យួរទឹកស៊ីអ៊ីវ១ យួរ មី១កេស និងថវិកាចំនួន៥ម៉ឺនរៀល សម្រាប់ដោះស្រាយជីវភាពប្រចាំថ្ងៃ ។
ក្នុងឱកាសនោះ លោក ហួត ឈួរ បានឲ្យដឹងថា នេះជាសន្តានចិត្ត និងការចែករំលែកធនធានផ្ទាល់ខ្លួនរបស់លោក ក្នុងនាមក្រុមការងារចុះជួយមូល ដ្ឋានភូមិ ឃុំ ស្រុក នៅខេត្តបាត់ដំបង ដែលនៅឆ្ងាយអាចជួយបាន ចុះហេតុអ្វីត្រូវមើលរំលង ជនទីទាល់ក្រនៅជិត ដែលថែរក្សារ និងការពារ ខ្លួនរាល់ថ្ងៃ ។ ដូចពាក្យចាស់ពោលថា « កូននៅឆ្ងាយមកលេងម្តងៗ សរសើរថាកូនល្អណាស់ ចំណែកកូននៅជិតថែទាំព្រឹកល្ងាច មិនសូវមើលឃើញក្នុងផ្លូវល្អទេ » ។
ទាំងអស់នេះបានធ្វើឲ្យលោកមានការចាប់អារម្មណ៍ទៅលើជនក្រីក្រដូចជាស្ត្រីអ្នកធ្វើអនាម័យ មន្ត្រីនគរបាល សន្តិសុខ និងអ្នករត់ម៉ូតូឌុបទាំង ១៥នាក់ ដែលកំពង់ប្រឹងប្រែងបំពេញតួនាទីរបស់ខ្លួនរាល់ថ្ងៃ ទើបលោកចំណាយថវិការផ្ទាល់ខ្លួនទិញគ្រឿងឧបភោគ បរិភោគ ជូនពួកគាត់ភ្លាមៗ ដោយពុំបានគ្រោងទុក ។
ក្នុងនោះដែរ ស្ត្រីអ្នកអនាម័យ មន្ត្រីនគរបាល សន្តិសុខ និងអ្នករត់ម៉ូតូឌុបទាំង១៥នាក់ បានថ្លែងអំណរគុណដល់លោកក្រឡាបញ្ជីចិត្តធម៌ ដែលជាម្ចាស់ទាន សូមឲ្យមានសុខភាពល្អ កម្លាំងមាំមួន អាយុយឺនយូ ប្រកបមុខរបរ និងការងារទទួលបានជោគជ័យជារៀងរហូត ៕
ចែករំលែកព័តមាននេះ