ខេត្តស្ទឹងត្រែង ៖ សាលាបឋមសិក្សាសំអាង ស្ថិតក្នុងឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង បានក្លាយជាទីតាំងដ៏សំខាន់មួយដែលបង្ហាញពីឧត្តមគតិមនុស្សធម៌ និងការប្តេជ្ញាចិត្តផ្នែកអប់រំដ៏ពិតប្រាកដរបស់លោកគ្រូ អ្នកគ្រូ ។…
ខេត្តស្ទឹងត្រែង ៖ សាលាបឋមសិក្សាសំអាង ស្ថិតក្នុងឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង បានក្លាយជាទីតាំងដ៏សំខាន់មួយដែលបង្ហាញពីឧត្តមគតិមនុស្សធម៌ និងការប្តេជ្ញាចិត្តផ្នែកអប់រំដ៏ពិតប្រាកដរបស់លោកគ្រូ អ្នកគ្រូ ។
ក្នុងស្ថានភាពដែលប្រជាជនត្រូវជម្លៀសខ្លួនជាបណ្តោះអាសន្នមកស្នាក់នៅក្នុងមណ្ឌលជនភៀសសឹកខេត្តស្ទឹងត្រែង ដោយសារការឈ្លានពានពីទាហានថៃ វត្តមានលោកគ្រូអ្នកគ្រូមកពីតំបន់រងផលប៉ះពាល់បានប្រមូលផ្តុំគ្នាជាបន្ទាន់ ដើម្បីរៀបចំការបង្រៀនឡើងវិញសម្រាប់កូនចៅប្រជាជនភៀសសឹកទាំងនោះ ។
អាទិភាពក្នុងគ្រាមានវិបត្តិការខិតខំប្រឹងប្រែងរបស់លោកគ្រូ អ្នកគ្រូ ក្នុងតំបន់នេះ គឺជាគំរូមួយដែលបានឆ្លុះបញ្ចាំងពី «បេះដូងគ្រូបង្រៀន» ដ៏ថ្លៃថ្លា ដែលចាត់ទុកការអប់រំជាការសំខាន់បំផុត សម្រាប់ការពារកុមារពីផលប៉ះពាល់ផ្លូវចិត្ត និងបញ្ចៀសការបោះបង់ចោលការសិក្សាក្នុងគ្រាមានអាសន្ន ។
ពួកគាត់បានដើរប្រមូលសិស្សានុសិស្ស ដោយមិនគិតពីកាលៈទេសៈលំបាក ឬការប្រឈមមុខផ្សេងៗ ដើម្បីធានាថា សិទ្ធិកុមារក្នុងការទទួលបានការអប់រំ ត្រូវបានបំពេញ ទោះបីស្ថិតក្នុងជំរុំបណ្តោះអាសន្នក៏ដោយ ។
លោកគ្រូអ្នកគ្រូនៅសាលាបឋមសិក្សាសំអាង (មណ្ឌលជនភៀសសឹក) ខេត្តស្ទឹងត្រែងបានលើកឡើងនាព្រឹកថ្ងៃទី១៩ ធ្នូ ២០២៥ថាការអប់រំក្នុងគ្រាអាសន្ន មិនត្រឹមតែជាការផ្ទេរចំណេះដឹងប៉ុណ្ណោះទេ តែជាការផ្តល់នូវ ស្ថិរភាពផ្លូវចិត្ត និងក្តីសង្ឃឹម ដល់កុមារដែលរងគ្រោះដោយសារជម្លោះ។
ទាក់ទិនក្នុងសកម្មភាពនេះបានបង្ហាញយ៉ាងច្បាស់អំពី មនសិការស្នេហាជាតិ និងមនសិការវិជ្ជាជីវៈខ្ពស់ របស់លោកគ្រូ អ្នកគ្រូ ដែលបានលើកស្ទួយ ចក្ខុវិស័យអប់រំកម្ពុជា ក្នុងការធានាគុណភាពអប់រំ និងសមធម៌សម្រាប់ទាំងអស់គ្នា ដោយមិនប្រកាន់ទីកន្លែង ឬស្ថានភាពសង្គមឡើយ ។ ពួកគាត់បានបំពេញកាតព្វកិច្ចដោយការលះបង់ដ៏ពិតប្រាកដ សម្រាប់អនាគតរបស់កុលបុត្រ
ខ្មែរ ៕
ចែករំលែកព័តមាននេះ