ខេត្តកំពង់ឆ្នាំង ៖ ជនសង្ស័យចំនួន២នាក់ត្រូវកងរាជអាវុធហត្ថខេត្តព័ទ្ធមួយយប់ទល់ភ្លឺទើបចាប់បាននៅវេលាម៉ោង៦ និង១០នាទីព្រឹក ថ្ងៃទី២៧ ខែឧសភា នៅជិតផ្សារពន្លៃ ក្នុងស្រុកបរិបូណ៌ ខណៈពួកគេព្យាយាមជិះម៉ូតូគេចចេញពីការតាមចាប់របស់កងរាជអាវុធហត្ថ ។ ក្នុងចំណោមជនសង្ស័យទាំង២នោះ ម្នាក់ឈ្មោះឡុង ដែលបានបាញ់បុរសម្នាក់ដែលទារលុយជំពាក់នៅប៉ោយប៉ែតកាលពីថ្ងៃទី២៦ ឧសភា ។
លោកឧត្តមសេនីយ៍ត្រីជន ជឿន មេបញ្ជាការកងរាជអាវុធហត្ថខេត្តឱ្យដឹងថា ការតាមចាប់ខ្លួននេះ តាមសំណូមពររបស់មេបញ្ជាការកងរាជអាវុធហត្ថខេត្តបន្ទាយមានជ័យ ដោយលោកប្រាប់ថា មុខសញ្ញាបាញ់ជនរងគ្រោះបណ្តាលឱ្យរបួសធ្ងន់បានគេចខ្លួនទៅស្រុកកំណើតនៅខេត្តកំពង់ឆ្នាំង។ ក្រោយទទួលបានព័ត៌មាននេះលោកបានដឹកនាំកម្លាំង និងបញ្ជាផ្ទាល់ទៅផ្ទះជនសង្ស័យស្ថិតក្នុងភូមិត្រពាំងពោធិ៍ ឃុំខុនរ៉ង ស្រុកបរិបូណ៌។ ពេលទៅដល់ផ្ទះជនសង្ស័យនៅម៉ោង៦និង៣០នាទីល្ងាច ថ្ងៃទី២៦ ឧសភា ។ បន្ទាប់ពីឡោមព័ទ្ធផ្ទះជនសង្ស័យហើយ លោកបានរាយការណ៍ និងឆ្លងយោបល់ពីលោកពេញ វិបុល ព្រះរាជអាជ្ញាអមសាលាដំបូងខេត្ត ព្រមទាំងឱ្យប៉េអឹមចូលទៅសាកសួរឪពុកជនសង្ស័យឈ្មោះសុន ប៉ុន្តែគាត់ប្រាប់ថា មិនឃើញកូនមកផ្ទះទេ។ ពេលប៉េអឹមថយចេញមកវិញ ជនសង្ស័យបានចេញពីផ្ទះបាញ់ចំនួន៣គ្រាប់សំដៅសមត្ថកិច្ចប៉េអឹមភ្លាម ។
លោកបន្តថា សមត្ថកិច្ចរបស់លោកដែលត្រៀមចាំស្រេចខាងក្រៅបានបាញ់គំរាម៥គ្រាប់។ ដោយមេឃងងឹតរកកល់ភ្លៀង និងដើមឈើក្រាស់ៗ ប៉េអឹមមិនហ៊ានសម្រុកចូលទេ ហើយបានស្នើសុំកម្លាំងប៉ូលិសស្រុក១៨នាក់ទៀត សរុបទាំងប៉េអឹមមានជិត៥០នាក់ព័ទ្ធផ្ទះនោះមួយយប់ទល់ភ្លឺក្រោមផ្ទៃមេឃភ្លៀងរលឹម។ លុះម៉ោង៥ និង៥០នាទីទទួលដំណឹងថា ជនល្មើសបានជិះម៉ូតូទៅផ្សារពន្លៃ លោកក៏បញ្ជាឱ្យប៉េអឹមរបស់លោកដែលឈរជើងស្កាត់ផ្លូវនៅទីនោះតាមចាប់ ហើយប្រទះឃើញ និងចាប់បាននៅវេលាម៉ោង៦ និង១០នាទីព្រឹក ថ្ងៃទី២៧ ឧសភា នៅជិតផ្សារពន្លៃ។
ជនសង្ស័យឈ្មោះជឹង សោគីម ហៅឡុង អាយុ២៨ឆ្នាំ ជាអ្នកលក់ស្បែកជើងនៅប្រទេសថៃ។ ជននេះត្រូវប៉េអឹមខេត្តបន្ទាយមានជ័យសំណូមពរឱ្យចាប់ខ្លួន និងម្នាក់ទៀតឈ្មោះអាន ពុទ្ធា អាយុ៣២ឆ្នាំ ជាម្ចាស់ម៉ូតូដែលដឹកជនសង្ស័យរំដោះខ្លួនពីការឡោមព័ទ្ធរបស់សមត្ថកិច្ច។ ក្រោយពេលចាប់ខ្លួន សមត្ថកិច្ចដកហូតបានវត្ថុតាងមានកាំភ្លើងខ្លី២ដើម ម៉ាកGLock លេខKGR៤៧៩ បង់ចំនួន១ គ្រាប់១គ្រាប់ ផលិតនៅប្រទេសអូទ្រីស និងម៉ាក KEVIN លេខHO ៥៦៨៧ បង់១ គ្រាប់៦គ្រាប់ ប្រាក់៥៣៤.២០០រៀល ម៉ូតូសេ១២៥ ស៊េរី២០០៨ មួយគ្រឿង និងកាបូបស្ពាយមួយ។
កាលពីថ្ងៃទី២៦ ឧសភាម៉ោង៩ និង៣០នាទីព្រឹក ឈ្មោះឡុង បានបាញ់ឈ្មោះវី រ៉ា អាយុ២៥ឆ្នាំ បណ្តាលឱ្យធ្លាយពោះបៀមគ្រាប់នៅប្លោកនោម នៅចំណុចជិតផ្លូវរថភ្លើងទល់មុខវត្តបាលិលេយ្យ សង្កាត់ប៉ោយប៉ែត ខេត្តបន្ទាយមានជ័យ រឿងជំពាក់លុយ រួចគេចខ្លួនបាត់។ ឈ្មោះជឹង សោគីម ហៅឡុង ត្រូវសមត្ថកិច្ចបញ្ជូនទៅខេត្តបន្ទាយមានជ័យវិញ ឯឈ្មោះអាន ពុទ្ធា បញ្ជូនទៅតុលាការខេត្តកំពង់ឆ្នាំង ៕ «ស្រែកទារលុយដែលជំពាក់ ដកកាំភ្លើងខ្លីបាញ់ប្រាវ២គ្រាប់ ត្រូវមួយគ្រាប់ធ្លាយប្លោកនោម 
»
ចែករំលែកព័តមាននេះ