តុលាការ សម្រេចចោទប្រកាន់លោកស្នងការរង ខេត្តកំពង់ស្ពឺ ពីបទទ្វេពន្ធភាព
ខេត្តកំពង់ស្ពឺ ៖ ព្រះរាជអាជ្ញា នៃអយ្យការអមសាលាដំបូងខេត្តកំពង់ស្ពឺ បានសម្រេចចោទប្រកាន់លើឈ្មោះ ង៉ាម រី ហៅ ឃុត វឌ្ឍនា…
ខេត្តកំពង់ស្ពឺ ៖ ព្រះរាជអាជ្ញា នៃអយ្យការអមសាលាដំបូងខេត្តកំពង់ស្ពឺ បានសម្រេចចោទប្រកាន់លើឈ្មោះ ង៉ាម រី ហៅ ឃុត វឌ្ឍនា ហើយ បន្ទាប់ពីបានបញ្ចប់នីតិវិធី នៃការស៊ើបសួរ ពេញមួយថ្ងៃ ។
លោក ទិន សុចិត្រា ព្រះរាជអាជ្ញារង អមអយ្យការសាលាដំបូងខេត្តកំពង់ស្ពឺ និងជាអ្នកនាំពាក្យ បានប្រាប់អ្នកសារព័ត៌មាននៅល្ងាចថ្ងៃទី១៩ ខែមករា ឆ្នាំ២០២៤ នេះថា ព្រះរាជអាជ្ញា បានបញ្ចប់នីតិវិធីស៊ើបសួរលើឈ្មោះ ង៉ាម រី ហៅ ឃុត វឌ្ឍនា ដោយក្នុងនោះ បានធ្វើការចោទប្រកាន់ពីបទ ទ្វេពន្ធភាព ប្រព្រឹត្តនៅភូមិស្រែថ្នល់ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ កាលពីថ្ងៃទី១៨ ខែមករា ឆ្នាំ២០២៤ តាមមាត្រា០៤ និងមាត្រា០៩ នៃច្បាប់ឯកពន្ធភាព ។
យោងតាមច្បាប់ស្តីពីឯកពន្ធភាព ៖
-មាត្រា៤ ៖ ទ្វេពន្ធភាពជាចំណងអាពាហ៍ពិពាហ៍ដែលបុរសមានប្រពន្ធពីរ ឯស្ត្រីមានប្តីពីរ។ ត្រូវចាត់ទុកថាមានពិរុទ្ធក្នុងបទទ្វេពន្ធភាព បុរស ឬស្ត្រីណា ដែលមានចំណងអាពាហ៍ពិពាហ៍ពីមុនមិនទាន់រលាយនៅឡើយ ហើយទៅចុះបញ្ជីអាពាហ៍ពិពាហ៍ថ្មីមួយទៀត។ អ្នកសមគំនិតត្រូវមានទោសដូចគ្នា ។
-មាត្រា០៩ ៖ ជនណាប្រព្រឹត្តល្មើសនឹងមាត្រា៤ នៃច្បាប់នេះ ត្រូវផ្ដន្ទាទោសដាក់ពន្ធនាគារពី៦ខែ ដល់១ឆ្នាំ និងផ្ដន្ទាទោសពិន័យជាប្រាក់ពី ២០០,០០០រៀល ដល់១,០០០,០០០រៀល ឬផ្ដន្ទាទោសណាមួយ នៃទោសទាំងពីរ ។
លោក ទិន សុចិត្រា អ្នកនាំពាក្យរូបនេះ បានបន្ថែមថា ពេលនេះសំណុំរឿងកំពុងស្ថិតក្នុងដៃចៅក្រមស៊ើបសួរ ដើម្បីបន្តស៊ើបសួរលើសំណុំរឿងរបស់ឈ្មោះ ឃុត វឌ្ឍនា ហៅ ង៉ាម រី ។
បើយោងតាមមន្ត្រីពន្ឋនាគារខេត្ត បានប្រាប់ថា នៅល្ងាចថ្ងៃទី១៩ ខែមករា ឆ្នាំ២០២៤នេះ នៅមិនទាន់ដីកាឃុំខ្លួននៅឡើយទេ ។
សូមរំលឹកផងដែរថា លោកឧត្តមសេនីយ៍ត្រី ង៉ាម រី ហៅ ឃុត វឌ្ឍនា មានតួនាទីជាស្នងការរង នៃស្នងការដ្ឋាននគរបាលខេត្តកំពង់ស្ពឺ ទទួលផែនអន្តរាគមន៍។ លោកត្រូវបានឃាត់ខ្លួន កាលពីព្រលប់ថ្ងៃទី១៨ ខែមករា ឆ្នាំ២០២៤ តាមបណ្តឹងរបស់ភរិយាដើមរបស់លោក ។
លោកឧត្តមសេនីយ៍ត្រី ង៉ាម រី ត្រូវភរិយាដើមប្តឹង បន្ទាប់ពីលោកបានក្លែងឯកសារ ហើយរៀបការជាមួយនារីម្នាក់ទៀត ដែលជាអាជីវករលក់បាយនៅក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ ដោយមិនទាន់បានលែងលះដាច់ស្រេច។ នៅក្នុងឯកសារក្លែងលោក ង៉ាម រី បានប្តូរឈ្មោះពី ង៉ាម រី ទៅជា ឃុត វឌ្ឍនា និងបានបញ្ជាក់ភាពពោះម៉ាយ ដោយលោក ហែន កន ចៅសង្កាត់បឹងសាឡាង រាជធានីភ្នំពេញ ។
លោកឧត្តមសេនីយ៍ត្រី ង៉ាម រី ហៅ ឃុត វឌ្ឍនា ត្រូវបានឯកភាពឱ្យរៀបអាពាហ៍ពិពាហ៍ជាមួយនារីម្នាក់ ដែលជាភរិយាក្រោយ ដោយលោកចៅសង្កាត់កណ្តោលដុំ កាលពីថ្ងៃទី៣ ខែមករា ឆ្នាំ២០២៤ ហើយពិធី នឹងចាប់ផ្តើមធ្វើនៅថ្ងៃទី១៨-១៩ ខែមករា ឆ្នាំ២០២៤ នៅចំណុចផ្ទះខាងស្រី ក្នុងភូមិស្រែថ្នល់ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ ។
សូមបញ្ជាក់ផងដែរថា ពិធីមង្គលនេះដែរ ត្រូវបានអាក់ខានទៅវិញ ក្រោយរោងការគ្មានកូនកំលោះ គ្រាដែលភ្ញៀវយ៉ាងច្រើន ត្រូវបានគោរពអញ្ជើញ មកចូលរួមរួចរាល់ លើកលែងតែមន្ត្រីនគរបាល នៅក្នុងអង្គភាព រួមទាំងលោកស្នងការផងដែរ ដែលមិនត្រូវបានអញ្ជើញឱ្យចូលរួមនោះទេ។ រោងការ ដែលសង់ឡើងយ៉ាងត្រដែត នៅលើកំណាត់ផ្លូវជាតិលេខ៤ ក្នុងសង្កាត់កណ្តោលដុំ ត្រូវបានរុះរើយ៉ាងតក់ក្រហល់ទៅវិញ ក្រោយកម្លាំងជំនាញការិយាល័យប្រឆាំងការជួញដូរមនុស្ស និងការពារអនីតិជន បាននាំខ្លួនកូនកំលោះ មកកាន់ស្នងការដ្ឋាននគរបាលខេត្តកំពង់ស្ពឺ ដើម្បីសាកសួរពាក់ពន្ធ័ នឹងបណ្តឹងរបស់ភរិយាដើម ។
ជុំវិញករណីនេះ មហាជននៅតែរង់ចាំមើលថា តើដំណើរការនីតិវិធីរបស់តុលាការ និងការអនុវត្តន៍អភិក្រមរបស់ក្រសួងមហាផ្ទៃ ថាតើចាត់ការយ៉ាងណា ចំពោះលោកឧត្តមសេនីយ៍ត្រីង៉ាម រី ហៅ ឃុត វឌ្ឍនា រូបនេះ ៕
អត្ថបទពាក៉ព័ន្ធ ៖
–«លោកផ្កាយ១ ស្នងការរងខេត្តកំពង់ស្ពឺ ត្រូវបញ្ជូនទៅតុលាការហើយ ក្រោយប្រពន្ធដើម ប្ដឹ.ងរឿងក្លែងលិខិតលួ.ចការប្រពន្ធថ្មី»
ចែករំលែកព័តមាននេះ