ADផ្ទាំងផ្សព្វផ្សាយពាណិជ្ជកម្ម

ពុលនំប៉័ងសាច់ និងនំប៉័ងប៉ាតេនៅវៀតណាមកើនឡើងដល់៤៦៩នាក់

2 អាទិត្យ មុន

០៣ ខែ ឧសភា ឆ្នាំ ២០២៤ ម៉ោង ១៧:៤០

ទីក្រុងហាណូយ៖ សំណុំរឿងពុលនំប៉័ងសាច់ និងនំប៉័ងប៉ាតេកំពុងតែផ្ទុះកក្រើកវៀតណាមខាងត្បូងនៅពេលចំនួនអ្នកពុលអាហារប្រភេទនេះចេះតែកើនឡើងជារៀងរាល់ថ្ងៃ និងកាន់តែញឹកញាប់ជាងមុន។ ចំនួនអ្នកពុលនំប៉័ងនៅទីក្រុងឡុងខាញ់ ខេត្តដុងណាយបានកើនឡើងដល់៤៦៩នាក់គិតត្រឹមល្ងាចថ្ងៃសុក្រ។ នៅក្នុងចំណោមនោះ ១១នាក់កំពុងធ្លាក់ខ្លួនឈឺធ្ងន់។ ជនរងគ្រោះ៣២១នាក់ដែលសម្រាកព្យាបាលនៅមន្ទីរពេទ្យទីក្រុងឡុងខាញ់បានគ្រាន់បើជាងមុន។ អ្នកក្រៅពីនេះមិនមានបញ្ហាចោទផ្នែកសុខភាពហើយ…

ទីក្រុងហាណូយ៖ សំណុំរឿងពុលនំប៉័ងសាច់ និងនំប៉័ងប៉ាតេកំពុងតែផ្ទុះកក្រើកវៀតណាមខាងត្បូងនៅពេលចំនួនអ្នកពុលអាហារប្រភេទនេះចេះតែកើនឡើងជារៀងរាល់ថ្ងៃ និងកាន់តែញឹកញាប់ជាងមុន។ ចំនួនអ្នកពុលនំប៉័ងនៅទីក្រុងឡុងខាញ់ ខេត្តដុងណាយបានកើនឡើងដល់៤៦៩នាក់គិតត្រឹមល្ងាចថ្ងៃសុក្រ។ នៅក្នុងចំណោមនោះ ១១នាក់កំពុងធ្លាក់ខ្លួនឈឺធ្ងន់។

ជនរងគ្រោះ៣២១នាក់ដែលសម្រាកព្យាបាលនៅមន្ទីរពេទ្យទីក្រុងឡុងខាញ់បានគ្រាន់បើជាងមុន។ អ្នកក្រៅពីនេះមិនមានបញ្ហាចោទផ្នែកសុខភាពហើយ ហើយពួកគេអាចចាកចេញពីមន្ទីរពេទ្យទៅសម្រាកនៅផ្ទះ។ ក្នុងចំណោមអ្នកឈឺធ្ងន់ទាំង១១នាក់នោះ គ្រាន់តែកុមារមាន៩នាក់។ កុមារ២នាក់ឈឺធ្ងន់ដល់ថ្នាក់បន្តោកឧបករណ៍ជំនួយផ្លូវដង្ហើម (ventilation) និងប្រើប្រាស់វិធីលាងឈាមដើម្បីសម្អាតជាតិពុល។ ពួកគេជាកុមារាទាំង២នាក់ ម្នាក់អាយុ៦ឆ្នាំ និងម្នាក់ទៀតអាយុ៧ឆ្នាំ។

កុមារ៧នាក់ទៀតត្រូវចាក់ថ្នាំតាមសរសៃ, ប្រើថ្នាំអង់ទីប៊ូយ៉ូទិច, ដាក់អុកស៊ីហ្សែន និងកែសម្រួលសង្វាក់បេះដូង។ ក្រុមគ្រួសារប្រាប់ថាកុមារអាយុ៦ឆ្នាំនោះញ៉ាំនំប៉័ងសាច់នៅហាងខាងលើនកាលពីក្បាលព្រលប់ថ្ងៃអង្គារ។ ស្អែកឡើងចាប់ផ្ដើមក្អួតវ៉កៗ និងបត់ជើងហូរដូចទឹក។ នៅដំណាក់កាលនោះ ក្រុមគ្រួសារមិនទាន់ដឹកទៅពេទ្យទេ។ ទុកទាល់តែឈឺធ្ងន់មែនទែននៅថ្ងៃព្រហស្បតិ៍ទើបប្រញាប់យកទៅសង្គ្រោះបន្ទាន់នៅពេលកុមារនោះក្អួតកាន់តែខ្លាំង និងចាប់ផ្ដើមប្រកាច់ចាប់លែងឈ្នះ។

ពេលដឹកទៅដល់មន្ទីរពេទ្យក្រុងឡុងខាញ់ កុមារនោះចាប់ផ្ដើមស្រឺតបាត់មាត់បាត់ក, សម្បុរស្បែកឡើងពណ៌ស្វាយ។ បេះដូងចង់គាំងនៅសល់ដង្ហើមផ្តឹកៗ។ ពេទ្យក៏បញ្ជូនបន្តទៅមន្ទីរពេទ្យកុមារជាតិខេត្តដុងណាយ។ សូម្បីតែឥឡូវនេះក៏ដោយ ក៏កុមារនោះមិនទាន់ដឹងខ្លួនពីសន្លប់នៅឡើយទេ។ គ្រូពេទ្យពិនិត្យឃើញថាកុមារនោះប៉ះពាល់បេះដូង ថ្លើម និងតម្រងនោម។

ដោយឡែក កុមារដែលមានអាយុ៧ឆ្នាំក៏ចូលទៅញ៉ាំនំប៉័ងសាច់ពីហាងតែមួយ និងនៅថ្ងៃតែមួយជាមួយកុមារអាយុ៦ឆ្នាំនេះដែរ។ ញ៉ាំមិនបានប៉ុន្មានផង កុមារនេះចាប់ផ្ដើមក្អួតចង្អោរ រាគរូស និងចុកពោះ។ មុនដំបូងគេបញ្ជូនគាត់ទៅមន្ទីរពេទ្យក្រុងឡុងខាញ់ និងបញ្ជូនបន្តទៅមន្ទីរពេទ្យកុមារជាតិខេត្តដុងណាយ។ នៅពេលនោះគាត់អស់កម្លាំងខ្លាំង និងមានសម្ពាធឈាមធ្លាក់ចុះ។ ត្រឹមព្រឹកថ្ងៃសុក្រគាត់បានធូរជាងមុន។ សម្ពាធឈាមធម្មតា, បេះដូងធម្មតា ហើយអាចបត់ជើងតូចខ្លួនឯងបាន។

គេដឹងថានៅថ្ងៃដែលពុលនំប៉័ងសាច់នោះ, ហាងឈ្មោះបាង (Bang) ស្ថិតនៅលើវិថីក្វាងឌឿ (Quang Dieu)ទីក្រុងឡុងខាញ់បានលក់នំប៉័ងអស់១១០០ដើម។ ញ៉ាំបានមួយថ្ងៃ ស្អែកឡើងអតិថិជនចាប់ផ្ដើមក្អួត, រាគរូស, ក្ដៅខ្លួន និងចុកពោះជាបណ្ដើរៗ។ តាមពិតករណីពុលនំប៉័ងនៅហាងនោះអាចពុលគ្រប់គ្នាទាំងអស់។ គ្រាន់តែថាអ្នកខ្លះមានប្រព័ន្ធការពារខ្លួនខ្លាំងគ្រាន់ល្ងាក់ល្ងើរបន្តិចបន្តួច ឬធេងធោងបន្តិចបន្តួចក៏បានទៅវិញ។ ប៉ុន្តែភាគច្រើនមិនមានសំណាងបែបនោះទេ។ គិតត្រឹមព្រឹកថ្ងៃព្រហស្បតិ៍ អ្នកញ៉ាំនំប៉័ងសាច់ធ្លាក់ខ្លួនឈឺជាង៣០០នាក់។ លុះដល់ល្ងាចថ្ងៃសុក្រធ្លាក់ខ្លួនឈឺថែមទៀតដល់ជាង៤០០នាក់។

នៅទីបំផុត ម្ចាស់ហាងនំប៉័ងចេញមុខស្រាយបំភ្លឺថាហាងរបស់គាត់បើកជាង១០ឆ្នាំហើយ។ គាត់ចេះតែដើរទិញគ្រឿងផ្សំតែពាសពីអ្នកលក់នៅទីក្រុងឡុងខាញ់នេះ។ មិនដឹងទិញពីអ្នកណាខ្លះទេ។ ម៉្លោះហើយគាត់គ្មានម៉ូយដែលស្គាល់គ្នាពិតប្រាកដ ទេ។ ដល់ពេលជួបករណីពុលបែបនេះមិនដឹងថាប្រភពផ្គត់ផ្គង់គ្រឿងផ្សំទាំងនេះបានមកពីកន្លែងណាខ្លះទេ។ ជាចំណាត់ការដំបូង អាជ្ញាធរបិទទ្វារហាងជាបណ្ដោះអាសន្នព្រោះមិនទាន់អនុវត្តឱ្យបានត្រឹមត្រូវតាមស្តង់ដារសុវត្ថិភាពចំណីអាហារ។ ចំពោះករណីពុលនំប៉័ងសាច់ និងនំប៉័ងប៉ាតេលើកនេះ គេមិនទាន់ដឹងថាបណ្ដាលមកពីមូលហេតុអ្វីពិតប្រាកដនៅឡើយទេ៕