ADផ្ទាំងផ្សព្វផ្សាយពាណិជ្ជកម្ម

Picture

កម្ពុជា​បដិសេធ​យ៉ាង​ដាច់ខាត​ចំពោះ​ការ​ចោទប្រកាន់​របស់​ថៃ​ថា កម្ពុជា​បាន​ប្រើប្រាស់​កិច្ចប្រជុំ​ហ្វ្រ​ង់​កូ​ហ្វូ​នី ដើម្បី​បង្ខូច​​កេរ្តិ៍ឈ្មោះ​ថៃ ឬ​ផ្សព្វផ្សាយ​និទានរឿង​តែ​ម្ខាង

1 ម៉ោង មុន
  • ភ្នំពេញ

រាជធានី​ភ្នំពេញ ​៖ ​កម្ពុជា​បដិសេធ​យ៉ាង​ដាច់ខាត​​ចំពោះ​ការ​ចោទប្រកាន់​ថា កម្ពុជា​បាន​ប្រើប្រាស់​កិច្ចប្រជុំ​​​ហ្វ្រ​ង់​កូ​ហ្វូ​នី​លើក​ទី​២០​ដើម្បី​បង្ខូច​កេរ្តិ៍ឈ្មោះ​ថៃ ឬ​ផ្សព្វផ្សាយ​និទានរឿង​តែ​ម្ខាង​ ។ ​នេះ​បើ​តាម​សេចក្តីថ្លែងការណ៍​របស់​អ្នកនាំពាក្យ​ក្រសួងការបរទេស​កម្ពុជា​ ។

សេចក្តីថ្លែងការណ៍​របស់​អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ​ចេញផ្សាយ​ កាលពី​ពេល​ថ្មី​ៗ​នេះ​បាន​លើក​ឡើង​ថា កម្ពុជា​បញ្ជាក់​ជា​ថ្មី​នូវ​ការ​ប្តេជ្ញា​ចិត្ត​ចំពោះ​ការ​សន្ទនា​ដោយ​សន្តិវិធី និង​ការ​គោរព​ច្បាប់​អន្តរជាតិ ក្នុង​ការ​ដោះស្រាយ​ស្ថានការណ៍​ព្រំដែន​កម្ពុជា​-​ថៃ ។

អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ​នៃ​ព្រះរាជាណាចក្រ​កម្ពុជា បាន​កត់សម្គាល់​សេចក្តីថ្លែងការណ៍​ដែល​ចេញផ្សាយ​ដោយ​ក្រសួងការបរទេស​ថៃ នៅ​ថ្ងៃ​ទី​១៦ ខែវិច្ឆិកា ឆ្នាំ​២០២៦ ទាក់ទង​នឹង​ការ​ចូលរួម​របស់​ថៃ​ក្នុង​សន្និសីទ​ថ្នាក់​រដ្ឋមន្ត្រី​ហ្វ្រ​ង់​កូ​ហ្វូ​នី​លើក​ទី​៤៨ (CMF) និង​កិច្ចប្រជុំ​កំពូល​ហ្វ្រ​ង់​កូ​ហ្វូ​នី​លើក​ទី​២០ ដែល​បាន​ប្រព្រឹត្ត​ទៅ​នៅ​រាជធានី​ភ្នំពេញ ចាប់ពី​ថ្ងៃ​ទី​១៤ ដល់​ថ្ងៃ​ទី​១៦ ខែវិច្ឆិកា ឆ្នាំ​២០២៦ ​។

ក្នុង​ន័យ​នេះ កម្ពុជា​សូម​ធ្វើការ​បំភ្លឺ ដូច​ខាងក្រោម ៖

ទី​១-កម្ពុជា​បដិសេធ​យ៉ាង​ដាច់ខាត​ចំពោះ​ការ​ចោទប្រកាន់​ថា កម្ពុជា​បាន​ប្រើប្រាស់​កិច្ចប្រជុំ​ទាំងនេះ ដើម្បី​បង្ខូច​កេរ្តិ៍ឈ្មោះ​ថៃ ឬ​ផ្សព្វផ្សាយ​និទានរឿង​តែ​ម្ខាង ​។ ការ​លើក​ឡើង​របស់​កម្ពុជា​អំពី​ស្ថានការណ៍​ព្រំដែន​កម្ពុជា​-​ថៃ មាន​បំណង​ទាញ​ចំណាប់អារម្មណ៍​លើ​ការ​វិវត្តន៍​នៅ​លើ​ដី និង​ផលវិបាក​មនុស្សធម៌ ព្រមទាំង​សង្កត់​ធ្ងន់​លើ​សារសំខាន់​នៃ​ការ​សន្ទនា ការ​បន្ធូរ​ភាព​តានតឹង និង​ការ​ដោះស្រាយ​វិវាទ​ដោយ​សន្តិវិធី​ ។ គោលបំណង​ទាំងនេះ ស្រប​តាម​គោលការណ៍​របស់​អង្គការ​អន្តរជាតិ​ហ្វ្រ​ង់​កូ​ហ្វូ​នី (OIF) និង​មូលបទ​នៃ​កិច្ចប្រជុំ​កំពូល​​លើក​ទី​២០ គឺ​«​រួម​គ្នា​បន្ត​កសាង​សន្តិភាព ដើម្បី​វិបុលភាព​រួម និង​ស្ថិរភាព​យូរ
អង្វែង​»​​។

ទី​២-ក្នុង​នាម​ជា​ម្ចាស់ផ្ទះ និង​ជា​ប្រធាន​កិច្ចប្រជុំ​កំពូល​ហ្វ្រ​ង់​កូ​ហ្វូ​នី​លើក​ទី​២០ កម្ពុជា​បាន​បំពេញ​ការ​ទទួលខុសត្រូវ​របស់​ខ្លួន​ដោយ​ភាព​មិន​លំអៀង តម្លាភាព និង​ការ​គោរព​ច្បាប់ និង​នីតិវិធី​របស់​អង្គការ OIF ។ កម្ពុជា​ក្នុង​នាម​ជា​សមាជិក​ពេញ​សិទ្ធិ​របស់ OIF មាន​សិទ្ធិ​ស្របច្បាប់​ក្នុង​ការ​សម្តែង​នូវ​កង្វល់​របស់​ខ្លួន​លើ​បញ្ហា ដែល​ប៉ះពាល់​ដល់​អធិបតេយ្យ បូរណភាព​ទឹកដី និង​សុខុមាលភាព​របស់​ប្រជាជន ​។ ការ​ចូលរួម​បែប​នេះ មិន​គួរ​ត្រូវ​បាន​យល់​ខុស​ថា ជា​ការ​ប៉ុនប៉ង​ធ្វើ​ឱ្យ​ខូច​ទំនាក់ទំនង​ទ្វេភាគី ឬ​កិច្ច​ខិតខំ​ប្រឹងប្រែង​ដែល​កំពុង​បន្ត​ដើម្បី ដោះស្រាយ​ការ​វិវាទ​ដោយ​សន្តិវិធី​ឡើយ​។

ទី​៣-កង្វល់​របស់​កម្ពុជា​ទាក់ទង​នឹង​ស្ថានការណ៍​ព្រំដែន គឺ​ផ្អែក​លើ​ការ​វិវត្តន៍​ដែល​ប៉ះ ពាល់​ទឹកដី និង​ប្រជាជន​របស់​ខ្លួន​ ។ ការ​វិវត្តន៍​ទាំងនេះ​ រួម​មាន​ការ​ប៉ះទង្គិច​ប្រដាប់​អាវុធ​រវាង​ប្រទេស​ទាំង​ពីរវត្តមាន​នៃ​កងកម្លាំងប្រដាប់អាវុធ​ថៃ​នៅ​ក្នុង​តំបន់​ដែល​កម្ពុជា​ចាត់​ទុក​ថា​ស្ថិត​ក្នុង​ដែន​អធិបតេយ្យ​របស់​ខ្លួន​បន្ទាប់​ពី​បទ​ឈប់​បាញ់​នៅ​ថ្ងៃ​ទី​២៧ ខែធ្នូ ឆ្នាំ​២០២៥ ការ​ខូចខាត​ដល់​បេតិកភណ្ឌ​វប្បធម៌​កម្ពុជា​និង​ការ​ផ្លាស់​ទីលំនៅ​របស់​ប្រជាពលរដ្ឋ​ភៀស​សឹក​កម្ពុជា​ប្រមាណ ២០,០០០ នាក់ ដែល​នៅ​តែ​មិន​អាច​វិល​ត្រឡប់​ទៅផ្ទះសម្បែង​ និង​ប្រកប​មុខរបរ​របស់​ពួក​គាត់​វិញ​ ។ កង្វល់​មនុស្សធម៌ និង​សន្តិសុខ​ដ៏​ធ្ងន់ធ្ងរ​ទាំងនេះ មិន​អាច​ត្រូវ បាន​បដិសេធ​ថា​ជា​ការ​ចោទប្រកាន់​គ្មាន​មូលដ្ឋាន​ឡើយ​។

ទី​៤-ចំពោះ​ការ​លើក​ឡើង​របស់​ថៃ​អំពី​កាលៈទេសៈ​ប្រវត្តិសាស្ត្រ​នៃ​សហគមន៍​កម្ពុជា​នៅ​តំបន់​​ព្រំដែន កម្ពុជា​រក្សា​ជំហរ​ថា ការ​ទាមទារ​ទឹកដី​ដែល​ខុស​គ្នា ត្រូវ​តែ​ដោះស្រាយ​តាម​រយៈ​យន្តការ​ទ្វេភាគី​ដែល​មាន​ស្រាប់ និង​ស្រប​តាម​ច្បាប់​អន្តរជាតិ​។ កម្ពុជា​សូម​អំពាវនាវ​ជា​ថ្មី​ឱ្យ​បន្ត​ឡើង​វិញ ដោយ​មិន​ពន្យារពេល នៃ​ការងារ​គណៈ កម្ម​ការ​ចម្រុះ​ខណ្ឌសីមា​ព្រំដែន​គោក (JBC) ដើម្បី​ពិនិត្យ​ស្ថានការណ៍​ជាក់ស្តែង និង​ជំរុញ​ការ​កំណត់ព្រំដែន ស្រប​តាម​កិច្ចព្រមព្រៀង​ដែល​មាន​ស្រាប់​។

ទី​៥-កម្ពុជា​បាន​កត់សម្គាល់​ការ​លើក​ឡើង​របស់​ថៃ​អំពី​វិធានការ​កសាង​ទំនុកចិត្ត​ដែល​បាន​ពិភាក្សា​នៅ ខែតុលា ឆ្នាំ​២០២៦ និង​ការ​ព្រមព្រៀង​គ្នា​ដែល​សម្រេច​បាន​ដោយ​នាយក​រដ្ឋមន្ត្រី​ទាំង​ពីរ នៅ​ស៊ី​ប៊ូ ក្នុង​ខែឧសភា ឆ្នាំ​២០២៦​។ កម្ពុជា​បញ្ជាក់​ជា​ថ្មី​នូវ​ការ​ប្តេជ្ញា​ចិត្ត​ចំពោះ​កិច្ច​ខិតខំ​ប្រឹងប្រែង​ទាំងនេះ និង​ចំពោះ​ការ​អនុវត្ត​ពេញ លេញ និង​មាន​ប្រសិទ្ធភាព​នៃ​សេចក្តី​ប្រកាស​រួម​នៃ​កិច្ចប្រជុំ​ពិសេស​របស់​គណៈកម្មការ​ព្រំដែន​ទូទៅ (GBC) នៅ​ថ្ងៃ​ទី​២៧ ខែធ្នូ ឆ្នាំ​២០២៥​ ។ ការ​ស្តារ​ទំនុកចិត្ត​គ្នា​ទៅ​វិញ​ទៅ​មក​តម្រូវ​ឱ្យ​មាន​សកម្មភាព​ជាក់ស្តែង ការ គោរព​ការ​ប្តេជ្ញា​ដែល​បាន​ព្រមព្រៀង​គ្នា និង​ការ​បង្ក​លក្ខខណ្ឌ​អំណោយផល​សម្រាប់​ការ​វិល​ត្រឡប់​ដោយ​សុវត្ថិភាព និង​សេចក្តី​ថ្លៃថ្នូ​របស់​ជនភៀសសឹក​ស៊ី​វិល​។

អ្នកនាំពាក្យ​បាន​បញ្ជាក់​ថា «​កម្ពុជា​បដិសេធ​យ៉ាង​ដាច់អហង្ការ​ចំពោះ​ការ​ចោទប្រកាន់​ថា កម្ពុជា​ជា​ប្រធាន​អង្គប្រជុំ មាន​ចេតនា​មិន​ផ្តល់​ឱកាស​ឱ្យ​ថៃ​បាន​ថ្លែងសេចក្តី​ក្នុងអំឡុងពេល​សន្និសីទ​ថ្នាក់​រដ្ឋមន្ត្រី​ហ្វ្រ​ង់​កូ​ហ្វូ​នី​លើក​ទី​៤៨​។ ដោយសារ​កិច្ចប្រជុំ​នេះ​ប្រព្រឹត្ត​ទៅ​យឺត​ពេល​ជាង​កាលវិភាគ​កំណត់​ជាង​ពីរ​ម៉ោង កម្ពុជា​ជា​ប្រធាន​អង្គប្រជុំ ដោយ​បាន​ពិគ្រោះ​យោបល់​ជាមួយ​លេខា​ធិការដ្ឋាន​អង្គការ OIF បាន​ឯកភាព​ផ្តល់​អាទិភាព​ថ្លែងសេចក្តី​ដល់អ្នក​សង្កេតការណ៍​ដែល​មាន​តំណាង​ក្នុង​កម្រិត​រដ្ឋមន្ត្រី​ ។

អ្នក​ផ្សេង​ទៀត​ត្រូវ​បាន​អញ្ជើញ​ឱ្យ​ដាក់​សេចក្តីថ្លែងការណ៍ ជា​លាយលក្ខណ៍អក្សរ ដើម្បី​បញ្ចូល​ក្នុ​ង​កំណត់​ត្រា​ផ្លូវការ​នៃ​កិច្ចប្រជុំ​។ ការ​រៀបចំ​នេះ បាន​អនុវត្ត​ដូច​ៗ​គ្នា ចំពោះ​គណៈប្រតិភូ​ពាក់ព័ន្ធ​ទាំងអស់ ដោយ​មិនមែន​ផ្តោត​ទៅ​លើ​គណៈប្រតិភូ​ថៃ​នោះ​ឡើយ​»។

កម្ពុជា​នៅ​តែ​ប្តេជ្ញា​យ៉ាង​មុតមាំ​ក្នុង​ការ​ដោះស្រាយ​វិវាទ​របស់​ខ្លួន​ជាមួយ​ថៃ តាម​រយៈ​ការ សន្ទនា ការទូត និង​មធ្យោបាយ​សន្តិវិធី ស្រប​តាម​ច្បាប់​អ ន្ត​រ​ជាតិ ធម្មនុញ្ញ​អង្គការសហប្រជាជាតិ និង​ធម្មនុញ្ញ​អាស៊ាន​។ កម្ពុជា​ត្រៀមខ្លួន​ជា​ស្រេច​ក្នុង​ការ​សហការ​ប្រកបដោយ​ស្ថាបនា​ជាមួយ​ថៃ តាម​រយៈ​យន្តការ​ទ្វេភាគី ដែល​មាន​ស្រាប់ ដើម្បី​ស្តារ​ទំនុកចិត្ត​គ្នា​ទៅ​វិញ​ទៅ​មក ធានា​ការ​គោរព​អធិបតេយ្យ និង​បូ​រណ​ភា ព​ទឹកដី និង សម្រេច​បាន​សន្តិភាព និង​ស្ថិរភាព​យូរអង្វែង​នៅ​តាម​បណ្តោយ​ព្រំដែន​រួម​របស់​ប្រទេស​ទាំង​ពីរ​។

កម្ពុជា​ជឿជាក់​យ៉ាង​មុតមាំ​ថា ភាព​ជា​អ្នក​ជិតខាង​ល្អ​ពិតប្រាកដ ត្រូវ​តែ​មាន​មូលដ្ឋាន​លើ​ការ​គោរព​គ្នា​ទៅ​វិញ​ទៅ​មក ការ​អនុវត្ត​ដោយ​ស្មោះត្រង់​នូវ​ការ​ប្តេជ្ញា​ដែល​បាន​ព្រមព្រៀង​គ្នា និង​​ការ​ការពារ​សុវត្ថិភាព និង​សុខុមាលភាព​របស់​ប្រជាជន​នៅ​សងខាង​ព្រំដែន​៕