រាជរដ្ឋាភិបាល ប្តេជ្ញាចិត្តធ្វើយ៉ាងណាធ្វើឲ្យប្រសើរឡើងនៅការគោរពសិទ្ធិសេរីភាពសារព័ត៌មាន
រាជធានីភ្នំពេញ ៖ នៅចំពោះមុខអ្នកសារព័ត៌មាន ប្រមាណ ៥ពាន់នាក់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់…
រាជធានីភ្នំពេញ ៖ នៅចំពោះមុខអ្នកសារព័ត៌មាន ប្រមាណ ៥ពាន់នាក់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ យ៉ាងដូច្នេះថា រាជរដ្ឋាភិបាល បានប្តេជ្ញាចិត្តធ្វើយ៉ាងណាឲ្យប្រសើរ នូវការគោរពសិទ្ធិសេរីភាពសារព័ត៌មាន នៅកម្ពុជា ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងក្នុងពិធីសំណេះសំណាល និងពិសាអាហារសាមគ្គី ជាមួយអ្នកសារព័ត៌មាន លើកទី៦ ឆ្នាំ២០២៤ នារសៀលថ្ងៃទី៣ ខែឧសភា ឆ្នាំ២០២៤ នៅសាលាសន្និបាតកោះពេជ្រ ថា សារព័ត៌មាន គឺជាអំណាចទី៤ ដែលជាមួយក្នុងការចូលរួមធ្វើការអភិវឌ្ឍប្រទេសជាតិ នៅពេលមានការផ្សព្វផ្សាយត្រឹមត្រូវ ។
សម្តេចធិបតី នាយករដ្ឋមន្ត្រី បានគូសបញ្ជាក់ថា ៖ «រាជរដ្ឋាភិបាល បានប្តេជ្ញាចិត្តធ្វើយ៉ាងណាធ្វើឲ្យប្រសើរឡើង នូវការគោរពសិទ្ធិសេរីភាពសារព័ត៌មាន ការបោះពុម្ភផ្សាយ និងការបញ្ចេញមតិ ដូចជាដែលមានចែងនៅក្នុងរដ្ឋធម្មនុញ្ញ នៃព្រះរាជាណាចក្រកម្ពុជា» ។
សម្តេចនាយករដ្ឋមន្ត្រី បានបន្ថែមអំណាចទី៤ បើនិយាយនៅក្នុងក្របខណ្ឌជាតិ គឺមិនតូចនោះទេ។ អំណាចទាំង៣ មាននីតីប្បញ្ញត្តិ នីតិប្រតិបត្តិ និងតុលាការ បង្កើតឡើង ដើម្បីរួមគ្នា ការពារជាតិ ប្រជាជន និងប្រទេស ហើយអំណាចទី៤ ក៏បានដើរតួយ៉ាងសំខាន់ផងដែរ ក្នុងការធានា ថា អំណាចទាំងអស់នឹង ធានាថានឹងទទួលខុសត្រូវក្នុងការបំរើ ប្រជាជន ។
សម្តេចធិបតី បានគូសបញ្ជាក់ថា ៖ «យើងត្រូវរួមគ្នា ដើម្បីពង្រឹងការអភិវឌ្ឍជាតិ ហើយប្រជាពលរដ្ឋ មានសិទ្ធិទទួលបានព័ត៌មាន ដែលពាក់ព័ន្ធទៅនឹងអ្វី ដែលពិតប្រាកដជុំវិញខ្លួនគាត់។ សិទ្ធិភាព ត្រូវបានធានាបាន តាមរយៈការផ្តល់ឲ្យ និងការទទួលបានព័ត៌មានដោយសេរី។ យើងមានមធ្យោបាយ ក្នុងការដាក់ចេញ ហើយម្នាក់ៗ មានសិទ្ធិក្នុងការផ្សព្វផ្សាយព័ត៌មាន អ៊ីចឹងនេះ ហើយជាអំណាចទី៤» ។
ជាមួយគ្នានោះ ដែរសម្តេចនាយករដ្ឋមន្ត្រី បានលើកឡើងថា រាជរដ្ឋាភិបាល និងថ្នាក់ដឹកនាំថ្នាក់ជាតិ ថ្នាក់ក្រោមជាតិ ត្រូវការព័ត៌មានពិត គ្រប់ជ្រុងជ្រោយ ដើម្បីដាក់ចេញ នូវវិធានការ ដែលដោះស្រាយទាន់ពេលវេលា ចំពោះ ចំគោលដៅ និងមានប្រសិទ្ធិភាពខ្ពស់។ ហើយត្រូវការព័ត៌មានពីគ្រប់ជ្រុងជ្រោយ ច្រកល្ហក ។
សម្តេចធិបតី បានអះអាងថា ក្នុងរយៈពេលប្រមាណ ៨ខែមកនេះ សម្តេចបានធ្វើការដោះស្រាយបញ្ហាជូនប្រជាពលរដ្ឋបានច្រើន ករណីនេះដោយសារសម្តេចបានទទួលព័ត៌មាន ពីប្រជាពលរដ្ឋទាន់ពេលវេលា ពីអ្នកសារព័ត៌មានពីបងប្អូនប្រជាពលរដ្ឋ ទោះបីជាមានគ្មានអាជ្ញាប័ណ្ណក៏អាចថតបង្ហោះតាមបណ្តាញសង្គមបាន ។
សម្តេចធិបតី បានចាត់ទុកការថតបង្ហោះលើបណ្តាញសង្គមរបស់ប្រជាពលរដ្ឋ នូវបញ្ហាមួយចំនួន គឺជាការងារសង្គមមួយក្នុងការជួយគ្នា ដែលជាអំពើមនុស្សធម៌ ដែលមានការផុសផុលល្អពេលកន្លងមកនេះ ។
សម្តេចធិបតី បានគូសបញ្ជាក់បន្ថែមថា ជាមួយនឹងការលើកទឹកចិត្តរបស់រាជរដ្ឋាភិបាល និងការជួយគ្នារបស់ប្រជាពលរដ្ឋក្នុងការជួយគ្នានោះគឺជាកម្លាំងសាមគ្គីមួយសំខាន់ណាស់ ៕
ចែករំលែកព័តមាននេះ