ថ្ងៃនេះមានរឿងក្ដៅៗពីប្រទេសកូរ៉េខាងជើង។ ក្រៅពីប្អូនស្រីលោកគីមជុងអ៊ុនចេញមុខច្រានចោលការចោទប្រកាន់របស់ប្រទេសខ្លះដូចជាអាមេរិក និងកូរ៉េខាងត្បូងជាដើមពាក់ព័ន្ធនឹងពាក្យចចាមអារ៉ាមថាព្យុងយ៉ាងបានផ្ដល់អាវុធទៅឱ្យប្រទេសរុស្ស៊ីដើម្បីធ្វើសង្គ្រាមនៅអ៊ុយក្រែន, នៅល្ងាចនេះ គេឮថាព្យុងយ៉ាងទើបតែបាញ់សាកល្បងគ្រាប់មីស៊ីលបន្ថែមទៀត។
ទីក្រុងព្យុងយ៉ាង៖ កូរ៉េខាងជើងទើបតែបាញ់សាកល្បងមីស៊ីលរយៈចម្ងាយខ្លីប៉ុន្មានគ្រាប់នៅថ្ងៃសុក្រចេញពីតំបន់មាត់សមុទ្រខាងកើត។ ពោលគឺ១ថ្ងៃបន្ទាប់ពីកូរ៉េខាងជើង និងអាមេរិកបើកយន្តហោះចម្បាំងដ៏មានថាមពលខ្លាំងក្លារបស់ខ្លួនដើម្បីចូលរួមនៅក្នុងសមុទ្រយោធារួមគ្នា។ សមយុទ្ធនេះនៅក្នុងក្រសែភ្នែករបស់កូរ៉េខាងជើងចាត់ទុកថាជាការត្រៀមខ្លួនធ្វើសង្គ្រាម។ ដូច្នេះ ទីក្រុងព្យុងយ៉ាងក៏ពន្លែងមីស៊ីលប៉ុន្មានគ្រាប់ទៅវិញដើម្បីបញ្ចេញប្រតិកម្ម និងដើម្បីឱ្យកុំចាញ់ប្រៀបគ្នាខ្លាំងពេក។
អគ្គសេនាធិការដ្ឋានកងទ័ពកូរ៉េខាងត្បូងឱ្យដឹងថាមីស៊ីលទាំងនោះបាញ់ចេញពីតំបន់វុនសាន (Wonsan) ហោះបានចម្ងាយ៣០០គីឡូម៉ែត្រ មុននឹងធ្លាក់ទៅក្នុងលំហសមុទ្រដែលស្ថិតនៅចន្លោះឧបទ្វីបកូរ៉េ និងប្រទេសជប៉ុន។ អ្នកនាំពាក្យជប៉ុនក៏បានបញ្ជាក់បន្ថែមថាគ្រាប់មីស៊ីលទាំងនោះធ្លាក់នៅខាងក្រៅតំបន់សេដ្ឋកិច្ចផ្ដាច់មុខរបស់ជប៉ុន។ ដូច្នេះ គ្មានបញ្ហាអ្វីទេ។
ប៉ុន្តែសម្រាប់កូរ៉េខាងត្បូងនេះជាបញ្ហា។ កូរ៉េខាងត្បូងចាត់ទុកថានេះជាការបង្កហេតុ និងជាការគំរាមកំហែងចំពោះសន្តិភាពនៅឧបទ្វីបកូរ៉េ។ អគ្គសេនាធិការដ្ឋានកងទ័ពកូរ៉េខាងត្បូងបានចេញសេចក្ដីថ្លែងការណ៍បញ្ជាក់ថាខ្លួននឹងបន្តរៀបជើងព្រួលជានិច្ចដើម្បីទប់ទល់នឹងចរិតឈ្លានពានរបស់កូរ៉េខាងជើង។ ខ្លួននឹងសហការជាមួយកងទ័ពអាមេរិកដើម្បីធ្វើកិច្ចការនេះ។
គួរកត់សម្គាល់ថាប៉ុន្មានខែចុងក្រោយនេះ កូរ៉េខាងជើងសម្រុកធ្វើតេស្តមីស៊ីល, កាំភ្លើងធំ និងអាវុធដទៃទៀតយ៉ាងខ្លាំងក្លា។ ប្រទេសនេះក៏ខិតខំធ្វើទំនើបកម្មឃ្លាំងអាវុធរបស់ខ្លួនផងដែរនៅពេលទំនាក់ទំនងការទូតជាមួយកូរ៉េខាងត្បូង និងអាមេរិកជាប់គាំង។ កាលពីសប្ដាហ៍មុន ប្រមុខដឹកនាំកូរ៉េខាងជើងបានចុះពិនិត្យមើលការបាញ់សាកល្បងគ្រាប់កាជ្រួចហ្វូងស៊េរីថ្មី។
កូរ៉េខាងជើងបកស្រាយថាការដែលខ្លួនពង្រឹងសមត្ថភាពគ្រាប់មីស៊ីល និងនុយក្លេអ៊ែរនោះគឺធ្វើឡើងទាំងបង្ខំចិត្ត។ ខ្លួនត្រូវតែធ្វើដូច្នេះដោយជៀសមិនរួចដើម្បីទប់ទល់នឹងអាមេរិកដែលចេះតែបង្កអរិភាពនឹងគ្នា។ ជាក់ស្ដែងកូរ៉េខាងត្បូង និងអាមេរិកបន្តធ្វើសមយុទ្ធយោធាទ្រង់ទ្រាយធំបំពាក់សុទ្ធតែអាវុធស៊េរីទំនើបរបៀបដូចជាការត្រៀមខ្លួនវាយលុកចូលកូរ៉េខាងជើង។
ទោះជាបែបនេះក្ដី ក្រុមអ្នកជំនាញការខាងអាវុធយល់ឃើញថារបបក្រុងព្យុងយ៉ាងយកបញ្ហាធ្វើសមយុទ្ធយោធានេះធ្វើជាលេសតែប៉ុណ្ណោះ។ ធាតុពិតកូរ៉េខាងជើងមានផែនការរួចហើយដើម្បីពង្រីកឃ្លាំងអាវុធរបស់ខ្លួនឱ្យកាន់តែធំដើម្បីងាយស្រួលទៅអនាគតបើមានការចរចាគ្នាជាមួយអាមេរិក ខ្លួនអាចនឹងមានទឹកមាត់ប្រៃនៅក្នុងការតថ្លៃគ្នាផ្នែកនយោបាយ។
នៅក្នុងព្រឹត្តិការណ៍មួយទៀត តាំងពីព្រឹកព្រលឹមថ្ងៃសុក្រ ប្អូនស្រីលោកគីមជុងអ៊ុនដែលជាស្ត្រីដ៏មានឥទ្ធិពលបំផុតនៅកូរ៉េខាងជើងនោះច្រានចោលការចោទប្រកាន់ដែលថាកូរ៉េខាងជើងបញ្ជូនអាវុធទៅឱ្យរុស្ស៊ី។ លោកស្រីថ្លែងថានេះជាការចោទប្រកាន់ឥតសមហេតុផល។ លោកស្រីសូមបញ្ជាក់ឱ្យបានភ្លឺភ្នែកទាំងអស់គ្នាថាកូរ៉េខាងជើងមិននាំអាវុធទៅណាទេ។ កូរ៉េខាងជើងកំពុងពន្លឿនការធ្វើតេស្ត និងផលិតអាវុធមែន។ ប៉ុន្តែគោលដៅធំទុកសម្រាប់ចាត់ការកូរ៉េខាងត្បូងតែប៉ុណ្ណោះ៕
ចែករំលែកព័តមាននេះ