G7 យល់ព្រមប្រើទ្រព្យបង្កករុស្ស៊ី ៥០ពាន់លានដុល្លារ ជួយអ៊ុយក្រែនប្រឆាំងសង្គ្រា.មឈ្លានពា.ន
ប្រទេសអ៊ីតាលី ៖ យោងតាមប្រភពពីសារព័ត៌មាន BBC នៅថ្ងៃទី១៤ ខែមិថុនា ឆ្នាំ២០២៤ បានរាយ
ប្រទេសអ៊ីតាលី ៖ យោងតាមប្រភពពីសារព័ត៌មាន BBC នៅថ្ងៃទី១៤ ខែមិថុនា ឆ្នាំ២០២៤ បានរាយ
ប្រទេសអ៊ីតាលី ៖ យោងតាមប្រភពពីសារព័ត៌មាន BBC នៅថ្ងៃទី១៤ ខែមិថុនា ឆ្នាំ២០២៤ បានរាយការណ៍ថា មេដឹកនាំក្រុមប្រទេសអភិវឌ្ឍន៍ទាំង៧ ឬ G7 បានព្រមព្រៀងគ្នា ប្រើប្រាស់ទ្រព្យបង្កករុស្ស៊ីចំនួន ៥០ពាន់លានដុល្លារអាមេរិក ប្រែក្លាយជាប្រាក់កម្ចីផ្តល់ទៅប្រទេសអ៊ុយក្រែន សម្រាប់ការប្រយុទ្ធប្រឆាំងនឹងសង្គ្រាមឈ្លានពានរបស់កងកម្លាំងរុស្ស៊ី។
ប្រភពពី BBC បានបន្តទៀតថា ប្រាក់បង្កករុស្ស៊ីចំនួន ៥០ពាន់លានដុល្លារអាមេរិក ដែលប្រែជាប្រាក់កម្ចី នឹងមិនត្រូវបានរំពឹងថាដល់ដៃអ៊ុយក្រែនភ្លាមៗនោះទេ រហូតដល់ដំណាច់ឆ្នាំនេះ ប៉ុន្តែវាត្រូវបានមើលឃើញថា គឺជាដំណោះស្រាយដ៏សំខាន់រយៈពេលវែង ដើម្បីជួយគាំទ្រដល់ការធ្វើសង្គ្រាម និងសេដ្ឋកិច្ចរបស់អ៊ុយក្រែន។
នៅក្នុងកិច្ចប្រជុំកំពូល G7 ធ្វើឡើងនៅក្នុងប្រទេសអ៊ីតាលី ដែលចាប់ផ្តើមនៅថ្ងៃទី១៣ រហូតដល់ថ្ងៃទី១៥ ខែមិថុនា ឆ្នាំ២០២៤ នោះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelensky) និងប្រធានាធិបតីសហរដ្ឋអាមេរិក ចូ បៃដិន (Joe Biden) បានចុះហត្ថលេខាលើកិច្ចព្រមព្រៀងសន្តិសុខទ្វេភាគីរយៈពេល១០ឆ្នាំរវាងអ៊ុយក្រែន និងអាមេរិក ដែលត្រូវបានសាទរដោយទីក្រុងគៀវ (Kyiv) ថា កិច្ចព្រមព្រៀងជាប្រវត្តិសាស្ត្រ។ កិច្ចព្រមព្រៀងនេះ រំពឹងថានឹងផ្តល់ជំនួយផ្នែកយោធា និងហ្វឹកហ្វឺនរបស់អាមេរិកដល់អ៊ុយក្រែន ប៉ុន្តែពុំមានការបញ្ជូនកងទ័ពអាមេរិកទៅប្រយុទ្ធ ដើម្បីសម្ព័ន្ធមិត្តរបស់ខ្លួននោះទេ។
គួរបញ្ជាក់ថា ទ្រព្យសម្បត្តិរុស្ស៊ីចំនួន ៣២៥ពាន់លានដុល្លារអាមេរិក ដែលក្នុងរួមទាំងទ្រព្យបុគ្គល និងអង្គការរុស្ស៊ី ត្រូវបានបង្កកដោយក្រុមប្រទេស G7 រួមនឹងសហភាពអឺរ៉ុប បន្ទាប់ពីរុស្ស៊ីបានបើកការលុកលុយយ៉ាងពេញទំហឹងលើអ៊ុយក្រែន នៅក្នុងឆ្នាំ ២០២២ ខណៈដែលទ្រព្យសកម្មនេះ កំពុងបង្កើតការប្រាក់បានប្រហែល៣ពាន់លានដុល្លារក្នុង១ឆ្នាំ។ នៅក្រោមផែនការ G7 ទឹកប្រាក់៣ពាន់លានដុល្លារ នឹងត្រូវបានប្រើប្រាស់ជាប្រយោជន៍ ដើម្បីសងការប្រាក់ប្រចាំឆ្នាំលើប្រាក់កម្ចីចំនួន ៥០ពាន់លានដុល្លារសម្រាប់អ៊ុយក្រែន។
ថ្លែងនៅក្នុងសន្និសីទសារព័ត៌មានរួមមួយ នៅឯកន្លែងប្រជុំកំពូល G7 ស្ថិតនៅតំបន់ Puglia ភាគខាងត្បូងប្រទេសអ៊ីតាលី លោក បៃដិន បានថ្លែងថា «ប្រាក់កម្ចីចំនួន ៥០ពាន់លានដុល្លារ សម្រាប់ប្រទេសអ៊ុយក្រែន ហើយផ្ញើការក្រើនរំលឹកមួយផ្សេងទៀតទៅប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) ថា ពួកយើងមិនដកខ្លួនទេ»។ មេដឹកនាំសហរដ្ឋអាមេរិកវ័យ៨១ឆ្នាំរូបនេះ បានសង្កត់ធ្ងន់ទៀតថា «លោក ពូទីន មិនអាចរង់ចាំយើងដកខ្លួននោះទេ ហើយក៏មិនអាចបំបែកពួកយើងបាននោះដែរ យើងនឹងនៅជាមួយអ៊ុយក្រែន រហូតដល់ពួកគេឈ្នះសង្រ្គាមនេះ»។
ក្រុមប្រទេស G7 ដែលរួមមាន កាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាមេរិក គឺជាអ្នកគាំទ្រផ្នែកហិរញ្ញវត្ថុ និងយោធាដ៏សំខាន់របស់អ៊ុយក្រែន សម្រាប់ការប្រយុទ្ធទប់ស្កាត់ការកាន់កាប់ដោយកងកម្លាំងរុស្ស៊ី។ មេដឹកនាំ G7 ផ្សេងទៀតក៏បានសាទរកិច្ចព្រមព្រៀងប្រាក់កម្ចីចំនួន ៥០ពាន់លានដុល្លារនេះផងដែរ។ ប្រាក់កម្ចីដ៏សំខាន់នេះ គឺជាសក្តានុពលនៃកញ្ចប់ជំនួយដ៏ធំមួយផ្សេងទៀត បើប្រៀបធៀបជាមួយនឹងជំនួយយោធាអាមេរិកចំនួន ៦១ពាន់លានដុល្លារ ដែលត្រូវបានព្រមព្រៀងគ្នាចុងក្រោយ កាលពីខែឧសភា កន្លងទៅថ្មីៗនេះ៕ (ប្រភព ៖ BBC)
ចែករំលែកព័តមាននេះ