ខេត្តកំពង់ស្ពឺ៖ កូនប្រុសម្នាក់ត្រូវបាននគរបាលស្រុកសំរោងទងធ្វើការឃាត់ខ្លួនតាមបណ្តឹងរបស់ម្តាយ ខណៈដែលកូនតិរច្ឆានរូបនោះខឹងម្តាយស្តីបន្ទោសរឿងខ្លួនខ្ចីម៉ូតូម្តាយជិះ ក៏ក្លាយជាហិង្សាទាញកាំបិត ចបជីក បំផ្លិចបំផ្លាញសម្ភារ និងទ្រព្យសម្បត្តិរងការខូចខាតជាច្រើន។
នគរបាលស្រុកសំរោងទងបាននិយាយឱ្យដឹងថា÷ កាលពីវេលាម៉ោង១១និង៣៥នាទីព្រឹកថ្ងៃទី៤ ខែមករា ឆ្នាំ២០២៦ មានឈ្មោះ ចន សុភា ភេទស្រី អាយុ៤៥ឆ្នាំ រស់នៅក្នុងភូមិត្រពាំងវែង១ ឃុំសំបូរ ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្តឹងលើឈ្មោះ ផាត សុគន្ធ ភេទប្រុស អាយុ២៥ឆ្នាំ (ត្រូវជាកូនបង្កើត) ពីបទប្រើហិង្សា និងគំរាមសម្លាប់គាត់ជាម្តាយបង្កើត។
នគរបាលស្រុកសំរោងទងបានបន្តថា នៅវេលាម៉ោង៩និង៣០នាទី ថ្ងៃទី៤ ខែមករា ឆ្នាំ២០២៦ រូបគាត់ជាម្តាយបាននិយាយសុំសោម៉ូតូពីកូនឈ្មោះ ផាត សុគន្ធ ប៉ុន្តែកូនមិនព្រមឱ្យ ហើយ ព្រមទាំងទៅទាញយកកាំបិតបុ័ងតោ កាប់ម៉ូតូ ទាញចបជីកវាយតូបទេវតា កាប់ទ្វារផ្ទះខាងមុខ និងគំរាមអាករសម្លាប់គាត់ជាម្តាយចោលថែមទៀតផង គ្រាន់តែលឺពាក្យគំរាមកំហែងបែបនោះ ធ្វើឱ្យរូបគាត់ជាម្តាយខ្លាចមិនហ៊ាននៅផ្ទះ ដោយកូនរបស់គាត់បានកាន់កាំបិតបុ័ងតោជាប់នឹងដៃ។
នគរបាលស្រុកសំរោងទងបានបន្ថែមថា ក្រោយពីទទួលពាក្យបណ្តឹងរបស់ស្ត្រីជាម្តាយរួចមកនៅវេលាម៉ោង៦ព្រលប់ ថ្ងៃទី៤ ខែមករា ឆ្នាំ២០២៦ កម្លាំងនគរបាលជំនាញព្រហ្មទណ្ឌស្រុកសំរោងទងបានសហការ ជាមួយប៉ុស្តិ៍នគរបាលរដ្ឋបាលឃុំសំបូរបានឃាត់ឈ្មោះ ផាត សុគន្ធ(ជាកូន) មកសាកសួរ ។ នៅចំពោះមុខសមត្ថកិច្ចយុវជនជាកូនបានឆ្លើយសារភាពថា រូបគេពិតជាបានវាយបំផ្លិចបំផ្លាញសម្ភារ ទ្រព្យសម្បត្តិក្នុងផ្ទះនឹងគំរាមកាប់សម្លាប់ម្ដាយពិតប្រាកដមែន។
មូលហេតុដែលរូបគេធ្វើបែបនោះព្រោះតែ ខឹងនឹងម្តាយស្តីបន្ទោសរឿងខ្ចីគាត់មកម៉ូតូជិះ រអ៊ូរទាំច្រើនពេក។
នគរបាលស្រុកសំរោងទងបានបញ្ជាក់ថា÷ ក្រោយឃាត់ខ្លួនយុវជនវាយបំផ្លិចបំផ្លាញសម្ភារ និងទ្រព្យសម្បត្តិ នគរបាលបានដកហូតវត្ថុតាងមាន ដែកទីបមូល០១ ចបជីក០១ កាំបិតផ្គាក់០១ កាំបិតប័ុងតោ០១ និងកាំបិតស្នៀត០១ផងដែរ ។
បច្ចុប្បន្នយុវជនខាងលើកំពុងសាកសួរ និងកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ