ទីក្រុងញូយ៉ក៖ ថ្ងៃនេះ ប្រេងឆៅឡើងថ្លៃដល់១០៧,៤៩ដុល្លារក្នុងមួយបារ៉ែលតាមហាងឆេងនៅទ្វីបអឺរ៉ុប (Brent) ចំណែកតាមហាងឆេងអាមេរិក (West Texas) ប្រេងឡើងថ្លៃដល់១០៥,៤ក្នុងមួយបារ៉ែល។ មានន័យថាអឺរ៉ុបឡើងថ្លៃ៦,៣៣ដុល្លារ ខណៈដែលអាមេរិកឡើងថ្លៃ៥,២៨ដុល្លារ។…
ទីក្រុងញូយ៉ក៖ ថ្ងៃនេះ ប្រេងឆៅឡើងថ្លៃដល់១០៧,៤៩ដុល្លារក្នុងមួយបារ៉ែលតាមហាងឆេងនៅទ្វីបអឺរ៉ុប (Brent) ចំណែកតាមហាងឆេងអាមេរិក (West Texas) ប្រេងឡើងថ្លៃដល់១០៥,៤ក្នុងមួយបារ៉ែល។ មានន័យថាអឺរ៉ុបឡើងថ្លៃ៦,៣៣ដុល្លារ ខណៈដែលអាមេរិកឡើងថ្លៃ៥,២៨ដុល្លារ។ មូលហេតុដែលប្រេងឡើងថ្លៃសឹងតែស្មើដៃគ្នាទាំងអាមេរិក និងអឺរ៉ុបបន្ទាប់ពីធ្លាក់ថ្លៃជាងមួយ១ដុល្លារមុនពេលលោកត្រាំថ្លែងសុន្ទរកថានៅក្នុងសេតវិមាន។
ត្រាំថាយើងនឹងធ្វើកិច្ចការនេះឱ្យបានចប់សព្វគ្រប់ ហើយយើងនឹងធ្វើឱ្យបានឆាប់បំផុត។ ឥឡូវនេះយើងកាន់តែកៀកនឹងឈានដល់ទីបញ្ចប់ហើយ។ លោកត្រូវការពេលពីរឬបីសប្ដាហ៍ទៀតដើម្បីបង្ហើយកិច្ចការដែលនៅសល់។ ប៉ុន្តែគេមិនទាន់ដឹងថាតើលោកនឹងដកទ័ពទៅវិញដោយរបៀបណាបើរហូតមកដល់ពេលនេះគ្មានកិច្ចព្រមព្រៀងនៃបទឈប់បាញ់ ឬសន្ធិសញ្ញាសន្តិភាពជាមួយគ្នានៅឡើយផង។ អ៊ីរ៉ង់ថាលោកត្រាំនិយាយបំផ្លើសទេ អ៊ីរ៉ង់គ្មានបានស្នើសុំឱ្យមានបទឈប់បាញ់ឡើយ។
ទ្វីបអាស៊ីបន្តរងគ្រោះពីប្រេងឡើងថ្លៃ
ទីផ្សារមូលប័ត្រនៅទ្វីបអាស៊ីមិនសូវមានដំណើរការល្អប៉ុន្មានទេ។ ប្រទេសនៅអាស៊ីអាគ្នេយ៍ភាគច្រើនពឹងផ្អែកលើការនាំចូលប្រេង។ ម៉្លោះហើយនៅពេលប្រេងឡើងថ្លៃ ពួកគេត្រូវរ៉ាប់រងថ្លៃចំណាយកាន់តែខ្ពស់។ តម្លៃហ៊ុននៅផ្សារមូលប័ត្រកូរ៉េ (KOSP) ធ្លាក់ថ្លៃ៤,២%បន្ទាប់ពីបើកទ្វារលក់ដំបូងឡើងថ្លៃបាន២%។ ប្រធានាធិបតីកូរ៉េខាងត្បូង លោកលីជេម្យុងបានជំរុញឱ្យរដ្ឋសភាអនុម័តសំណើសុំថវិកា២៦,២ទ្រីលានវុន (ស្មនើនឹង១៧,៣ពាន់លានដុល្លារ) ដើម្បីជួយទ្រទ្រង់សេដ្ឋកិច្ចជាតិនៅអំឡុងពេលនៃវិបត្តិថាមពលដ៏ធ្ងន់ធ្ងរបំផុតសម្រាប់ប្រទេសមួយនេះ។
ក្រឡេកទៅមើលស្ថានភាពផ្សារមូលប័ត្រនៅសិង្ហបុរី (SGX) ក៏មិនសូវមានសញ្ញាល្អដែរ។ នៅពេលបើកទ្វារជួញដូរដំបូង តម្លៃហ៊ុនហក់ឡើងដល់កម្រិតខ្ពស់បំផុតនៅក្នុងរយៈពេល២សប្ដាហ៍ចុងក្រោយ។ មិនយូរប៉ុន្មានតម្លៃភាគហ៊ុនធ្លាក់ចុះ០,៨%។ នៅម៉ាឡេស៊ី តម្លៃភាគហ៊ុនធ្លាក់ចុះ១%, ឥណ្ឌូណេស៊ីធ្លាក់ចុះ១%, តៃវ៉ាន់ធ្លាក់ចុះ១,៤%។ នៅហុងកុង និងចិនដីគោក តម្លៃភាគហ៊ុនក៏ធ្លាក់ចុះ។ គិតត្រឹមពាក់កណ្ដាលថ្ងៃត្រង់ ហ៊ុនសៀងហៃធ្លាក់ចុះ០,៥៣%។
មានសេចក្ដីរាយការណ៍ថាមុនពេលលោកត្រាំថ្លែងសុន្ទរកថាកាលពីយប់មិញ អ៊ីរ៉ង់ធ្វើសកម្មភាពដ៏ខុសប្លែកពីប្រក្រតីដោយបានបោះដៃដោយផ្ទាល់ទៅរកអាមេរិក។ កាលនោះ អ៊ីរ៉ង់ផ្ញើលិខិតមួយច្បាប់ទៅពលរដ្ឋអាមេរិកាំងថាអ៊ីរ៉ង់គ្មានចង់ឱ្យមានរឱសឋានជាមួយអាមេរិកទេ។ អ្វីដែលខ្លួនកំពុងធ្វើរាល់ថ្ងៃនេះគឺដើម្បីការពារខ្លួនតែប៉ុណ្ណោះ។ ការថ្លែងដូច្នេះក៏ជួយធ្វើឱ្យផ្សារហ៊ុនវ៉លស្ទ្រីតរបស់អាមេរិកមានលំនឹងបន្តិចវិញ។ ប៉ុន្តែសម្រាប់ពេលនេះស្ថានភាពមិនច្បាស់លាស់ចាប់ផ្ដើមបង្កបញ្ហាសម្រាប់ទីផ្សារមូលប័ត្រជាបន្តទៀត៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ