ទីក្រុងប៉ារីស៖ បើសិនការប៉ាន់ស្មាននេះត្រឹមត្រូវមែន មានន័យថារុស្ស៊ីបានធ្វើពលិកម្មទាហានរបស់ខ្លួនច្រើនណាស់នៅក្នុងសង្គ្រាមអ៊ុយក្រែនជាង២ឆ្នាំកន្លងមកនេះ។ រដ្ឋមន្ត្រីការបរទេសបារាំងថ្លែងកាលពីពេលថ្មីនេះថាទាហានរុស្ស៊ីរហូតដល់១,៥សែននាក់បានស្លាប់នៅក្នុងសង្គ្រាមអ៊ុយក្រែន។ លោកថ្លែងបន្តទៀតថាបើយោងតាមការប៉ាន់ស្មានរបស់រដ្ឋាភិបាលទីក្រុងប៉ារីស ទាំងចំនួនទាហានរុស្ស៊ីដែលស្លាប់បូករួមទាំងទាហានត្រូវរបួសអាចមានចំនួនសរុបរហូតដល់កន្លះលាននាក់ឯណោះ។
អឺរ៉ុប និងប្រទេសជាដៃគូនឹងបន្តរួបរួមគ្នា និងប្ដេជ្ញាចិត្តយ៉ាងមោះមុតដើម្បីជួយអ៊ុយក្រែននៅក្នុងរយៈពេលវែង។ រដ្ឋមន្ត្រីរូបនេះយល់ថាយុទ្ធនាការយោធារបស់រុស្ស៊ីនៅអ៊ុយក្រែនចាប់ផ្ដើមបង្ហាញសញ្ញាបរាជ័យជាបណ្ដើរៗហើយតាមរយៈការស្លាប់ និងរបួសយ៉ាងរង្គាលដូចដែលបានរៀបរាប់អម្បាញ់មិញនេះ។ លោករដ្ឋមន្ត្រីបានដាក់ជាសំណួរថាតើរុស្ស៊ីនាំកងទ័ពទៅស្លាប់ និងរបួសគរជើងគ្នានៅអ៊ុយក្រែននោះដើម្បីអ្វី? លោកសូមជួយឆ្លើយជំនួសរុស្ស៊ីទៅចុះ «គ្មានដើម្បីអ្វីទេ»។
រដ្ឋមន្ត្រីការបរទេសបារាំង លោក Stephane Sejourneរហូតមកដល់ពេលនេះ រុស្ស៊ីពុំដែលបង្ហាញតួលេខពិតប្រាកដថាទាហានរបស់ខ្លួនស្លាប់ និងរបួសប៉ុន្មាននាក់ទេ។ កាលពីខែកុម្ភៈ ឆ្នាំ២០២៤ លោកហ្សេឡិនស្គីថ្លែងថាទាហានរុស្ស៊ី១,៨សែននាក់បានស្លាប់។ ចំណែកអង់គ្លេសថ្លែងថាទាហានរុស្ស៊ី៤,៥សែននាក់ស្លាប់ និងរបួស។ ទូរទស្សន៍ប៊ីប៊ីស៊ី (BBC) រាយការណ៍ថាទាហានរុស្ស៊ីជាង៥ម៉ឺននាក់បានស្លាប់ដោយយោងតាមតួលេខរបស់អ្នករាយការណ៍ព័ត៌មានរបស់ប៊ីប៊ីស៊ីផ្ទាល់ គួបផ្សំនឹងរបាយការណ៍របស់សារព័ត៌មានឯករាជ្យ និងក្រុមអ្នកស្ម័គ្រចិត្ត។
អ្នកវិភាគខាងវិស័យយោធាប្រមើលឃើញថាមិនយូរទេរុស្ស៊ីនឹងបើកយុទ្ធនាការវាយលុកជាថ្មីទៅលើខ្សែត្រៀមមុខរបស់អ៊ុយក្រែន។ ចំពោះសំណួរថាតើអឺរ៉ុបនឹងចាត់ចែងទ្រព្យសម្បត្តិរុស្ស៊ីដែលផ្អឹបទុកនៅសហភាពអឺរ៉ុបដោយរបៀបណា? រដ្ឋមន្ត្រីបារាំងរូបនេះថ្លែងថាលុយទាំងនេះអាចវេរទៅឱ្យអ៊ុយក្រែនប្រើសម្រាប់ការពារសន្តិសុខជាតិ និងស្ដារប្រទេសឡើងវិញ។
នៅក្នុងព្រឹត្តិការណ៍មួយទៀត លោកម៉ាក្រុងទំនងជាមិនចុះញ៉មនឹងការនិយាយកម្លារបស់រដ្ឋាភិបាលទីក្រុងម៉ូស្គូទេពាក់ព័ន្ធនឹងគម្រោងបញ្ជូនកងទ័ពទៅអ៊ុយក្រែន។ បើគេស្ដាប់មិនច្រឡំទេ លោកម៉ាក្រុងនិយាយយ៉ាងតិចបីដងអំពីលទ្ធភាពនៃការបញ្ជូនកងទ័ពបារាំងទៅអ៊ុយក្រែន។ លោកម៉ាក្រុងប្រហែលជាមិននិយាយលេងសើចទេបើលោកនិយាយញឹកញាប់ដល់ថ្នាក់នេះទៅហើយ។ បារាំង និងអ៊ុយក្រែនក៏ទើបតែចុះកិច្ចព្រមព្រៀងការពារគ្នាទៅវិញទៅមកនៅក្នុងគ្រាអាសន្នផងដែរ។
លោកបញ្ជាក់ថា «បារាំងមិនទាត់ចោលលទ្ធភាពនៃការបញ្ជូនកងទ័ពជើងគោកទៅអ៊ុយក្រែនទេទេដោយអនុលោមទៅតាមលក្ខខណ្ឌ២យ៉ាង ទី១-បើកងទ័ពរុស្ស៊ីវាយទម្លុះខ្សែការពាររបស់អ៊ុយក្រែននៅសមរភូមិមុខ និងទី២-បើមានសំណើពីរដ្ឋាភិបាលទីក្រុងកៀវដើម្បីបញ្ជូនកងទ័ពបារាំងទៅអ៊ុយក្រែន។ «លោកមិនលេបពាក្យសម្ដីដែលធ្លាប់និយាយទេ។
បារាំងមិនដកថយនៅក្នុងរឿងនេះជាដាច់ខាតនៅពេលភាគីម្ខាងទៀត (រុស្ស៊ី) ក៏មិនព្រមដកថយដូចគ្នា។ សហភាពអឺរ៉ុបត្រូវតែការពារខ្លួន។ រុស្ស៊ីមានចរិតគឃ្លើនសម្បើមណាស់នៅក្នុងការបង្កអស្ថិរភាពនៅក្នុងតំបន់។ ពេលខ្លះរុស្ស៊ីហ៊ានគំរាមប្រើប្រាស់អាវុធនុយក្លេអ៊ែរថែមទៀត»។ តាំងពីដំបូងដៃមកម៉្លេះ ថ្នាក់ដឹកនាំអាល្លឺម៉ង់មិនសូវហ៊ានប្រើសម្ដីខែងដូចបារាំងទេ។ អធិការបតីអាល្លឺម៉ង់ លោកអូឡាហ្វ សូល មិនដែលនិយាយពីលទ្ធភាពបញ្ជូនទ័ពសូម្បីតែ១ម៉ាត់។ លោកថាក្រុមសម្ព័ន្ធមិត្តគ្មានគោលការណ៍បញ្ជូនកងទ័ពទៅអ៊ុយក្រែនទេមិនថាពេលកន្លងមក ពេលនេះ និងពេលអនាគតនោះឡើយ។
សូម្បីតែគ្រាប់មីស៊ីលម៉ាកតូរ៉ូស (Taurus) ដែលអ៊ុយក្រែនស្នើសុំយ៉ាងទទូចក៏លោកសូលមិនហ៊ានបញ្ជូនទៅឱ្យដែរព្រោះខ្លាចអ៊ុយក្រែនយកទៅបាញ់ចូលទីក្រុងម៉ូស្គូនាំឱ្យម៉ូស្គូសងសឹកមិនត្រឹមតែទៅលើអ៊ុយក្រែនទេ។ ហេងស៊យអាចសងសឹកដាក់អ្នកបញ្ជូនគ្រាប់មីស៊ីលនេះតែម្ដង។ ទោះជាយ៉ាងណាក្ដី លោកម៉ាក្រុងយល់ថាការចាញ់សម្លុតរុស្ស៊ីបែបនេះវាជាការបង្ហាញភាពកម្សោយឱ្យគេឃើញ ហើយនាំឱ្យគេមើលងាយទៅវិញទេ។ លោកចាត់ទុកថានេះជាការចុះចាញ់មុនពេលប្រយុទ្ធ៕
ចែករំលែកព័តមាននេះ