រាជធានីភ្នំពេញ ៖ «ប្រទះឃើញសព២នាក់ប្តី-ប្រពន្ធវ័យក្មេងដេកគងលើគ្នាក្នុងបន្ទប់ខ្ទាស់គន្លឹះពីខាងក្នុង» សពបុរស-ស្ត្រី២នាក់ប្តី-ប្រពន្ធមួយគូត្រូវបានគេប្រទះឃើញដេកស្លាប់គងលើគ្នាគួរឱ្យភ្ញាក់ផ្អើលដោយសារតែមានជះក្លិនអសោចិ៍ចេញមកក្រៅធ្វើឱ្យមនុស្សម្នាដែលទៅចោមរោមមើលពិបាកដកដង្ហើមពន់ពេកណាស់ ហើយការស្លាប់ទាំងគូបែបនេះត្រូវអ្នកជិតខាងនិយាយថា គឺផ្តើមឡើងដោយការប្រចណ្ឌ ព្រោះប្រពន្ធមានវ័យក្មេងជាងប្តីរហូតដល់១០ឆ្នាំឯណោះ ហើយស្អាតផូរផង់ទៀតផង។ សពបុរស-ស្ត្រីដែលត្រូវបានគេអះអាងថា ជាប្តី-ប្រពន្ធនេះគឺដេកស្លាប់នៅក្នុងផ្ទះជួលបន្ទប់លេខ៨ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ ហើយត្រូវបានគេប្រទះឃើញកាលពី វេលាម៉ោង១២ថ្ងៃត្រង់ ថ្ងៃទី២៦ ឧសភា ២០១១។
សពបុរសរងគ្រោះឈ្មោះផុន ថាត់ អាយុ២៩ឆ្នាំ រីឯសពស្ត្រីឈ្មោះពេជ្រ ស្រីនាង អាយុ១៩ឆ្នាំ អ្នកទាំង២ត្រូវបានគេស្គាល់ថា ជាកម្មកររោងចក្របានដេកស្លាប់គងលើគ្នា ដោយមានឈាមកកជាប់ខ្លួន និងហូរទៅកកលើកម្រាលឥដ្ឋ ហើយនៅក្នុងបន្ទប់ដែលពួកគេដេកស្លាប់នេះត្រូវបានគេសង្កេតឃើញថា មានសភាពរាយប៉ាយ និងខ្ទាស់គន្លឹះពីខាងក្នុងជាប់ ហាក់បង្ហាញថា ពេលកើតហេតុ មានការប្រតាយប្រតប់គ្នាយ៉ាងខ្លាំង និងមិនចង់ឱ្យមានអ្នកណាចូលមកជួយ ។
ក្រោយពីសមត្ថកិច្ចធ្វើការត្រួតពិនិត្យរួច មិនទាន់ត្រូវបានគេអះអាងថា ជារឿងឃាតកម្ម ឬយ៉ាងណានោះទេ ប៉ុន្តែសន្និដ្ឋានថា ជារឿងវាយសម្លាប់ប្រពន្ធរួចហើយធ្វើអត្តឃាតចាក់សម្លាប់ខ្លួនឯងតាមក្រោយ ។ សពបានជះក្លិនស្អុយចេញមកក្រៅខ្លាំងយ៉ាងនេះធ្វើឱ្យគេគិតថា យ៉ាងហោចណាស់ក៏ស្លាប់៥ថ្ងៃដែរ ព្រោះថា មានតម្រុយពួកគេឈ្លោះគ្នាតាំងពីថ្ងៃអាទិត្យ ទី២១ ឧសភា មកម៉្លេះ ។ ដំបូងឡើយគេគិតថា ជារឿងឃាតកម្ម? ប៉ុន្តែអ្នកជិតខាងបាននិយាយថា អាចជារឿងវាយសម្លាប់ប្រពន្ធរួចហើយប្តីធ្វើអត្តឃាតតាមក្រោយ ព្រោះមុនពេលប្រទះឃើញសពទាំង២នាក់ប្តី-ប្រពន្ធនេះ គឺកាលពីថ្ងៃអាទិត្យ ទី២១ ឧសភា ២០១១ ពួកគេបានឈ្លោះគ្នាឡូឡាឮដល់អ្នករស់នៅក្បែរខាង បន្ទាប់មកក៏ស្ងាត់ទៅវិញ…គ្មានអ្នកណាចាប់អារម្មណ៍ថា ពីរនាក់ប្តី-ប្រពន្ធនេះវាយសម្លាប់គ្នា និងធ្វើអត្តឃាតនោះទេ ព្រោះពួកគេជារឿយៗតែងតែឈ្លោះគ្នា ដោយសារតែប្តីប្រចណ្ឌប្រពន្ធ រួចហើយស្ងាត់ និងបន្ទាប់មកត្រូវរ៉ូវគ្នាវិញ ដូច្នេះការឈ្លោះគ្នាកាលពីថ្ងៃអាទិត្យនោះ អ្នកជិតខាងចាត់ទុកថា ជារឿងធម្មតា ។
សពស្ត្រីជាប្រពន្ធដេកផ្ងារមានខ្សែក្រវាត់រឹត.ក និងស្នាមរយះកយ៉ាងធំ ធ្វើឱ្យគេសន្និដ្ឋានថា ប្តីបានយកខ្សែក្រវាត់រឹត.កនាងជាប្រពន្ធឱ្យស្លាប់រួចហើយយកកូនកាំបិតបុ័ងតោចិតបន្លែមកអារ.កបន្ថែម ទើបបណ្តាលឱ្យស្លាប់ មើលទៅគួរឱ្យញញើតខ្លាំងណាស់ ។ ចំណែកសពបុរសជាប្តីវិញគេពិនិត្យឃើញកាំបិតជាប់ពោះ និងស្នាមរយះកយ៉ាងខ្លាំងផងដែរ ធ្វើឱ្យសន្និដ្ឋានថា បន្ទាប់ពីសម្លាប់ប្រពន្ធរួចហើយ ប្តីអគតិនេះបានយកកាំបិតមកអារ.កខ្លួនឯង និងចាក់ពោះខ្លួនឯងមួយកាំបិត បណ្តាលឱ្យស្លាប់ផ្កាប់មុខជាប់កាំបិតក្នុងពោះតែម្តង៕
ចែករំលែកព័តមាននេះ