ADផ្ទាំងផ្សព្វផ្សាយពាណិជ្ជកម្ម

ក្រុមថៅកែគ្រឿងចក្រកំពុងតែសម្រុកជីកដីបឹងទំនប់ចាន់ថ្នាល យកអាចម៍ដីទៅលក់ សង្ស័យអត់ច្បាប់

16 ម៉ោង មុន

កំពង់ស្ពឺ
០៦ ខែ សីហា ឆ្នាំ ២០២៥ ម៉ោង ១០:០៣

ខេត្តកំពង់ស្ពឺ៖ គ្រឿងចក្រជាច្រើនកំពុងសម្រុកជីកក្នុងបឹងចាន់ថ្នាល ហើយក្រុមរថយន្តដឹកដីជាច្រើនគ្រឿងដឹកជញ្ជូនអាចម៍ដឹកយកទៅចាក់ទីតាំងផ្សេងចម្ងាយជិត៣គីឡូម៉ែត្រពីកន្លែងជីក មិនគ្របធ្វើឱ្យប៉ះពាល់ដល់ការធ្វើដំណើររបស់ប្រជាពលរដ្ឋ សង្ស័យគ្មានច្បាប់ សូមអាជ្ញាធរ និងជំនាញពាក់ព័ន្ធអញ្ជើញចុះទៅពិនិត្យផង។ ទីតាំងការជីកកាយពីសំណាក់ថៅរកសុីជីកដីលក់នេះ ស្ថិតនៅក្នុងទំនប់ចាន់ថ្នាល ក្នុងភូមិត្រពាំងកក់…

ទីតាំងការជីកកាយពីសំណាក់ថៅរកសុីជីកដីលក់នេះ ស្ថិតនៅក្នុងទំនប់ចាន់ថ្នាល ក្នុងភូមិត្រពាំងកក់ ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ មិនទាន់ដឹងថាថៅកែគ្រឿងចក្រឈ្មោះនៅឡើយនោះទេ គេគ្រាន់តែដឹងថាក្រុមគ្រឿងចក្រកំពុងតែសម្រុកជីកដីនៅក្នុងរណ្តៅនោះ ហើយក្រុមរថយន្តកង់៦ជាច្រើនគ្រឿងកំពុងតែដឹកជញ្ជូន ដោយមិនមានគ្របតង់នោះទេ ហើយទីតាំងខាងលើនេះគេសង្ស័យថា មិនមានច្បាប់អនុញ្ញាតិនោះទេ។ ដោសារតែគ្រឿងចក្រសម្រុកជីកកាយជិត១០ថ្ងៃមកហើយ ក្រុមរថយន្តដឹកជញ្ជូនបើកបរលឿនៗ ធ្វើឱ្យដីធ្លាក់ជ្រុះពាសពេញផ្លូវ ធ្វើឱ្យប្រជាពលរដ្ឋ កម្មករ កម្មារិនី និងសិស្សានុសិស្សពិបាកធ្វើដំណើរទៅមកខ្លាំងណាស់ នៅលើកំណាត់ផ្លូវជាតិលេខ១៤៤០ ចាប់តាំងពីចំណុចរណ្តៅដីក្នុងភូមិត្រពាំងកក់ ឃុំក្រាំងចេក ស្រុកសាមគ្គីមុនីជ័យ រហូតដល់ភូមិតាំងតាឡាត់ ឃុំព្នាយ ស្រុកសំរោងទង ដែលជាកន្លែងទីតាំងចាក់អាចម៍ដី។

ប្រជាពលរដ្ឋអ្នករស់នៅក្បែរទីតាំងចាក់ដី និងអ្នកធ្វើដំណើរលើកឡើងថា ក៏ព្រោះតែប្រយោជន៍ខ្លួនឯង ជាពិសេសក្រុមថៅកែរកសុីជីកដីលក់ មិនខ្លាចញញើតច្បាប់ ដឹកជញ្ជូនមិនគ្របតង់ ធ្វើឱ្យប៉ះពាល់ដល់ការរស់នៅ និងការធ្វើដំណើររបស់ប្រជាពលរដ្ឋ កម្មករ កម្មារិនីរោងចក្រ ជាពិសេសសិស្សានុសិស្ស ដែលធ្វើដំណើរ មានដីប្រឡាក់លើផ្លូវជាតិលេខ១៤៤០ ហើយណាមួយជារដូវភ្លៀងទៀត ខ្លាចក្រែងរអិលដួលហើយជួបគ្រោះថ្នាក់ជាយថាហេតុអ្វីមួយកើតឡើង។

ក្នុងនាមប្រជាពលរដ្ឋ និងអ្នកធ្វើដំណើរ ធ្វើការសំណូមពរដល់អស់លោកថៅកែកុំគិតពីផលប្រយោជន៍ខ្លួនឯងពេក គោរពច្បាប់ខ្លះផង គិតដល់សុខសុវត្ថិភាពប្រជាពលរដ្ឋ និង អ្នកធ្វើដំណើរឆ្លងកាត់ ជាពិសេស កម្មករ កម្មារិនីរោងចក្រ សិស្សានុសិស្ស ជិះកង់ ម៉ូតូ ទៅធ្វើការងារ និងរៀនសូត្រផង។ ហើយក៏សូមធ្វើការសំណូមពរដល់អស់លោកអាជ្ញាធរ និងជំនាញពាក់ព័ន្ធមេត្តាចុះទៅពិនិត្យ ទីតាំងកន្លែងជីក និងកន្លែងចាក់អាចម៍ដីផងទាន តើមានច្បាប់ទម្លាប់ត្រឹមត្រូវឬទេ ហើយអស់លោកថៅកែគោរពតាមកិច្ចសន្យា បទដ្ឋានបច្ចេសទេសហើយឬនៅ?

ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕