រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានបញ្ជាក់ថា កម្ពុជាត្រូវការមេដឹកនាំថៃរូបណា ដែលមានអំណាចខ្លាំង…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានបញ្ជាក់ថា កម្ពុជាត្រូវការមេដឹកនាំថៃរូបណា ដែលមានអំណាចខ្លាំង ដើម្បីចរចារកសន្តិភាពបាន ។
ការលើកឡើងរបស់សម្តេចតេជោ បន្ទាប់ពីប៉ុន្មានថ្ងៃនេះ មានការផ្សព្វផ្សាយព័ត៌មានពីរ គឺទីមួយ ទាក់ទងដល់ការផ្តល់ជំនួយដ្រូនរបស់ជប៉ុនឲ្យថៃ ការផ្តល់ដ្រូនពីចិនឲ្យកម្ពុជា និងការលក់គ្រាប់ និងយន្តហោះពីកូរ៉េខាងត្បូងឲ្យថៃ ដើម្បីធ្វើឃាដលើ ហ៊ុន សែន និង ហ៊ុន ម៉ាណែត។ ទីពីរ គឺការរៀបចំផែនការធ្វើឃាដពីសំណាក់មេដឹកនាំថៃ មកលើខ្ញុំ និងនាយករដ្ឋមន្ត្រី ហ៊ុន ម៉ាណែត ។
សម្តេចតេជោ បានលើកឡើងថា បញ្ហាទាំងពីរនេះ បើមិនមានការបកស្រាយ ឬរំលត់ទេ វានឹងក្លាយជាបញ្ហាធំសម្រាប់ថ្ងៃក្រោយ។ ដូចនេះខ្ញុំសូមធ្វើការបកស្រាយដូចខាងក្រោម ៖
១. រឿងដ្រូន និងអាវុធ ឬយន្តហោះទោះកម្ពុជា ឬថៃ បានមកពីប្រភពណា ក៏សូមមេត្តា កុំពង្រីកបញ្ហាចេញផុតពីជម្លោះរវាងកម្ពុជា និងថៃ ទៅកាន់ប្រទេសផ្សេង ក្នុងពេលប្រទេសទាំងនោះ កំពុងជួយដល់ការបញ្ឈប់ជម្លោះ និងគាំទ្រដល់ការឈប់បាញ់ និងជំរុញឲ្យមានសន្តិភាពឡើងវិញ រវាងប្រទេសទាំងពីរ កម្ពុជា-ថៃ ។
២. រឿងផែនការធ្វើឃាដរបស់មេដឹកនាំថៃមកលើរូបខ្ញុំ និងនាយករដ្ឋមន្ត្រី ហ៊ុន ម៉ាណែត រឿងនេះ ពិបាក និងជឿណាស់ បើទោះបីជាមេដឹកនាំថៃស្អប់ ឬមិនចូលចិត្តខ្ញុំ និង ហ៊ុន ម៉ាណែត ក៏ដោយ ក៏មេដឹកនាំថៃ មិនទាន់ឈានដល់កំរិតអគុណធម៌ មករៀបចំផែនការសម្លាប់ខ្ញុំ និង ហ៊ុន ម៉ាណែត នោះដែរ ។
សម្តេចតេជោ បានលើកឡើងថា ក្នុងប្រវត្តិសាស្ត្រ គេតែងតែរកវិធីសម្លាប់មេទ័ព ដែលពូកែ ដើម្បីងាយយកឈ្នះលើសង្គ្រាម តែសម័យនេះ មិនដូចសម័យមុនទេ គេត្រូវការមនុស្ស ដែលអាចនិយាយគ្នាបាន ដើម្បីកសាងសន្តិភាព ។
សម្តេចតេជោ បានគូសបញ្ជាក់ថា ៖ “កម្ពុជាក៏ត្រូវការមេដឹកនាំថៃរូបណា ដែលមានអំណាចខ្លាំង ដើម្បីចរចារកសន្តិភាពបាន។ ឯថៃ ក៏ត្រូវការមេដឹកនាំកម្ពុជាណា ដែលមានអំណាចខ្លាំង ដែលពេលនេះ គឺមានតែ ហ៊ុន សែន និង ហ៊ុន ម៉ាណែត ប៉ុណ្ណោះ ដើម្បីចរចា ដែល ហ៊ុន ម៉ាណែត ចេញមុខចរចាដោយផ្ទាល់។ យោងលើហេតុផលនេះ គឺគ្មានមូលហេតុណាមួយ ដែលមេដឹកនាំថៃ មានគម្រោងសម្លាប់ ហ៊ុន សែន និង ហ៊ុន ម៉ាណែត នោះឡើយ។ ប្រសិនបើ ហ៊ុន សែន ឬ ហ៊ុន ម៉ាណែត ស្លាប់ដោយស្នាដៃមេដឹកនាំថៃ មែន វាច្បាស់ជា នឹងកើតមាន ហ៊ុន សែន ឬ ហ៊ុន ម៉ាណែត រាប់ម៉ឺន រាប់សែន រាប់លាននាក់ នៅលើទឹកដីកម្ពុជាភ្លាម ដែលវា នឹងក្លាយជាសត្រូវសួរពូជ ពិបាករំលត់។ សម្រាប់ខ្ញុំ ក្តី ហ៊ុន ម៉ាណែត ក្តី ក៏មិនមែនជាកូនសត្វកង្កែប ដែលគេងាយនឹងសម្លាប់នោះដែរ។ ទាំងនេះ ក៏ជាការពន្យល់បន្ថែមថា មេដឹកនាំថៃ មិនរៀបចំផែនការ ដើម្បីសម្លាប់ ហ៊ុន សែន និង ហ៊ុន ម៉ាណែត នោះទេ” ។
ជាមួយគ្នានោះដែរ សម្តេចតេជោ ក៏បានគូសបញ្ជាក់ថា នៅក្នុងផែនការសម្លាប់ ហ៊ុន សែន និង ហ៊ុន ម៉ាណែត ដោយមេដឹកនាំថៃ គេលើកថា និងប្រើយន្តហោះ។ ចំណុចនេះ គួរតែប្រទេស ដែលលក់យន្តហោះ ចម្បាំងឲ្យថៃ ត្រូវរឹតបណ្តឹងលើកិច្ចសន្យាប្រើប្រាស់យន្តហោះ ព្រោះកន្លងទៅនេះ ថៃបានប្រើយន្តហោះ ដែលទិញពីអាមេរិក និងស៊ុយអែត វាយចូលជ្រៅក្នុងទឹកដីកម្ពុជា។ កម្ពុជា មិនជំទាស់នឹងការលក់យន្តហោះចម្បាំងឲ្យថៃទេ តែសូមកុំឲ្យថៃ ប្រើប្រាស់យន្តហោះវាយប្រហារចូលទឹកដីកម្ពុជា ឬទឹកដីឡាវ ឬម៉ាឡើស៊ី ឬមីយ៉ាន់ម៉ា ដែលជាប្រទេសជាប់ព្រំដែនជាមួយថៃ ៕
ចែករំលែកព័តមាននេះ