ខេត្តកំពង់ឆ្នាំង ៖ ព័ត៌មានបន្ថែមស្តីពីបុរសចំណាស់ត្រូវសត្វក្រពើព្រួតគ្នាខាំប៉ងស៊ីជាអាហារកាលពីចុងសប្តាហ៍មុននោះ ពេលនេះ គាត់បានធូរស្រាលបន្តិចហើយ ប៉ុន្តែបានក្លាយជាមនុស្សពិការដៃទាំងពីរក្នុងហេតុការណ៍វាយប្រហារដោយសត្វក្រពើចិញ្ចឹមនេះ ។ ស្ត្រីឈ្មោះហ៊ុន ម៉ុន អាយុ៤៥ឆ្នាំ ដែលត្រូវជាប្រពន្ធបុរសរងគ្រោះ
ខេត្តកំពង់ឆ្នាំង ៖ ព័ត៌មានបន្ថែមស្តីពីបុរសចំណាស់ត្រូវសត្វក្រពើព្រួតគ្នាខាំប៉ងស៊ីជាអាហារកាលពីចុងសប្តាហ៍មុននោះ «សង្គ្រាមដណ្តើមយកមនុស្សចេញពីក្នុងអាងក្រពើ ប្រយុទ្ធគ្នា៣ទល់៣ 
» ពេលនេះ គាត់បានធូរស្រាលបន្តិចហើយ ប៉ុន្តែបានក្លាយជាមនុស្សពិការដៃទាំងពីរក្នុងហេតុការណ៍វាយប្រហារដោយសត្វក្រពើចិញ្ចឹមនេះ ។
ស្ត្រីឈ្មោះហ៊ុន ម៉ុន អាយុ៤៥ឆ្នាំ ដែលត្រូវជាប្រពន្ធបុរសរងគ្រោះឈ្មោះម៉ៅ អូនអាយុ៦៧ឆ្នាំ និយាយថា គាត់បានមកធ្វើជាកម្មករថែរក្សាសត្វក្រពើនេះនៅឆ្នាំ២០០៥ គឺតាំងពីម្ចាស់ក្រពើចាស់ម៉្លេះ ប៉ុន្តែសព្វថ្ងៃបានប្តូរម្ចាស់២តំណហើយ និងសព្វថ្ងៃម្ចាស់ក្រពើជានាយឧត្តមសេនីយ៍យោធាម្នាក់នៅភ្នំពេញ ។ ពួកគាត់ទាំងពីរនាក់មានទីលំនៅភូមិទី៣ ឃុំព្រែកទន្លាប់ ស្រុកលើកដែក ខេត្តកណ្តាល ។ រូបគាត់ជាប្រពន្ធក្រោយទេ បន្ទាប់ពីប្រពន្ធ មុនរបស់ប្តីគាត់បានស្លាប់ ដោយជំងឺមហារីកដោះ ទើបមកបានគាត់ ។ នៅដើមឆ្នាំ២០០៥ គាត់បានមកធ្វើជាកម្មករថែរក្សាក្រពើនៅភូមិក្តីត្នោត ឃុំស្រែថ្មី ស្រុករលាប្អៀរ នេះ ដែលមានម្ចាស់ដើមឈ្មោះថុង ។ ប្រាក់ខែពួកគាត់ពីរនាក់ប្តីប្រពន្ធ គឺ២០ម៉ឺនរៀល ប៉ុន្តែម្ហូបអាហារ អង្ករ គឺម្ចាស់ក្រពើជាអ្នកផ្គត់ផ្គង់ទាំងអស់ ។
ស្ត្រីរូបនេះបានរំលឹកពីព្រឹត្តិការណ៍ដ៏តក់ស្លុតនៅថ្ងៃកើតហេតុថា នាព្រឹកថ្ងៃទី២១ ឧសភា នោះ ម្ចាស់ក្រពើដែលជានាយឧត្តមសេនីយ៍បានបើករថយន្តដឹកកូនមកលេងកន្លែងចិញ្ចឹមក្រពើ ហើយប្តីគាត់បានរៀបចំដាំបាយធ្វើម្ហូបទទួលម្ចាស់ក្រពើ ។ ថ្ងៃនោះប្តីគាត់ដោយខ្វះម្ជូរជ្រក់ក៏បានចុះក្នុងបរិវេណចិញ្ចឹមក្រពើដើម្បីបេះផ្លែក្រូចឆ្មារ ។ មុនពេលចុះដល់ដីនៃបរិវេណចិញ្ចឹមក្រពើ ប្តីគាត់បានយកដំបងដេញក្រពើឱ្យចុះចូលអាងទឹកអស់ហើយទើបប្តីគាត់ដើរទៅបេះផ្លែក្រូចឆ្មារ។ ខណៈពេលប្តីគាត់កំពុងបេះនោះ មានក្រពើមួយក្បាលបានវារលបមកព័ទ្ធប្តីគាត់ពីក្រោយ ហើយត្របាក់ខាំយ៉ាងសាហាវ ភ្លាមនោះក្រពើ២ក្បាលទៀតដែលនៅជិតក៏ស្ទុះមកត្របាក់ខាំបន្ថែម ហើយពួកវាទាំងបីក្បាលបានព្យាយាមអូសប្តីគាត់ចុះក្នុងអាង។
ស្ត្រីជាប្រពន្ធបន្តថា ខណៈក្រពើបីក្បាលកំពុងវាយប្រហារប្តីគាត់ ក្រពើមួយហ្វូងទៀតដែលខ្លះនៅក្នុងអាង ខ្លះនៅលើគោកបានស្ទុះស្រសំដៅរកប្តីគាត់ដែរ ។ ពេលដែលសត្វក្រពើចាប់ផ្តើមវាយប្រហារពីដំបូង ប្តីគាត់បានស្រែកឱ្យគេជួយ ពេលនោះមានម្ចាស់ក្រពើម្នាក់ កូនម្ចាស់ក្រពើម្នាក់ និងកម្មករម្នាក់ (មុននេះថាកម្មករ៣នាក់) ទាំងបីនាក់បានស្ទុះចូលទៅជួយដោយម្នាក់ៗ កាន់ដំបងវាយសំពងសត្វក្រពើទាំង៣ក្បាល ដែលបានខាំទាញប្តីគាត់ចូលដល់មាត់អាងទឹកទៅហើយ ។ ទម្រាំដណ្តើមប្តីគាត់ពីមាត់ក្រពើបាន គឺប្រើពេលមួយសន្ទុះ ដែលការវាយសង្គ្រោះនោះមិនមែនតែក្រពើ៣ក្បាលនោះទេ ក្រពើខ្លះទើបងើបឡើងចេញពីអាងក៏ត្រូវវាយសំពងឱ្យចុះទឹកវិញដែរ ។
ការសង្គ្រោះប្តីគាត់ពីមាត់ក្រពើនេះធ្វើឡើងយ៉ាងប្រថុយប្រថានខ្លាំងណាស់ ប្រសិនបើប្តីគាត់ធ្លាក់ចូលអាងពិតជាពុំអាចសង្គ្រោះបានឡើយ ហើយប្តីគាត់នឹងក្លាយជាចំណីក្រពើជាពុំខាន ។ ពេលសង្គ្រោះបានពីចង្កូមក្រពើ ប្តីគាត់បានរងរបួសដាច់ដៃទាំងពីរ ឯភ្លៅទាំងសងខាងក៏របួសដាច់សាច់ទាំងដុំដែរ ។ មកដល់ពេលនេះប្តីគាត់ដឹងខ្លួនហើយ ប៉ុន្តែមិនទាន់អាចនិយាយបានទេ ចំណែកម្ចាស់ក្រពើបានផ្តល់លុយចំនួន៣០ម៉ឺនរៀល មកគ្រួសារគាត់ ហើយប្រាប់ថា ខ្វះខាត ឬត្រូវការអ្វីប្រាប់គាត់នឹងជួយបន្ថែម ។ ចំណែកថ្លៃព្យាបាលម្ចាស់ក្រពើចេញថ្លៃសេវាអស់ហើយ។
សូមបញ្ជាក់ថា នៅបរិវេណចិញ្ចឹមក្រពើគេធ្វើរបងព័ទ្ធជុំវិញ និងខណ្ឌជាប្រឡោះ ដោយរបងថ្មមានទំហំប្រមាណ១៥ម៉ែត្រគុណ១៥ម៉ែត្រ។ នៅប្រឡោះនីមួយៗគេជីកអាងដាក់ទឹកទំហំប្រហែល៥ម៉ែត្របួនជ្រុង និងជុំវិញអាងគេដាំដើមស្វាយ ក្រូច និងដំណាំហូបផ្លែផ្សេងទៀត ដើម្បីជាម្លប់សម្រាប់សត្វក្រពើឡើងពីអាងទឹកមកដេកលើគោកក្រោមម្លប់ឈើទាំងនោះ ៕
ចែករំលែកព័តមាននេះ