ខេត្តកំពង់ឆ្នាំង ៖ បុរសចំណាស់ជាកម្មករថែទាំសត្វក្រពើម្នាក់ បានត្រូវសត្វក្រពើព្រួតគ្នាត្របាក់ខាំហែកស៊ីជាចំណីបណ្ដាលឱ្យរងរបួសធ្ងន់ធ្ងរដាច់ដៃទាំងពីរ និងដាច់សាច់ភ្លៅទាំងសងខាង ខណៈដែលបុរសចំណាស់រូបនោះបានចុះក្នុងអាងចិញ្ចឹមក្រពើដើម្បីបេះផ្លែក្រូចឆ្មារ។ ហេតុការណ៍ដ៏រន្ធត់នេះបានកើតឡើងនៅវេលាម៉ោង៩និង៣០នាទីព្រឹក
ខេត្តកំពង់ឆ្នាំង ៖ បុរសចំណាស់ជាកម្មករថែទាំសត្វក្រពើម្នាក់ បានត្រូវសត្វក្រពើព្រួតគ្នាត្របាក់ខាំហែកស៊ីជាចំណីបណ្ដាលឱ្យរងរបួសធ្ងន់ធ្ងរដាច់ដៃទាំងពីរ និងដាច់សាច់ភ្លៅទាំងសងខាង ខណៈដែលបុរសចំណាស់រូបនោះបានចុះក្នុងអាងចិញ្ចឹមក្រពើដើម្បីបេះផ្លែក្រូចឆ្មារ។ ហេតុការណ៍ដ៏រន្ធត់នេះបានកើតឡើងនៅវេលាម៉ោង៩និង៣០នាទីព្រឹក ថ្ងៃទី២១ ឧសភា នៅកន្លែងចិញ្ចឹមក្រពើមួយស្ថិតនៅភូមិក្ដីត្នោត ឃុំស្រែថ្មី ស្រុករលាប្អៀរ។
បុរសរងគ្រោះខាងលើមានឈ្មោះម៉ៅ អូន អាយុជាង៦០ឆ្នាំ មានទីលំនៅខេត្ដកណ្ដាល ប៉ុន្ដែបានមកធ្វើជាកម្មករថែក្រពើឱ្យថៅកែម្នាក់ដែលមានទីលំនៅក្នុងរាជធានីភ្នំពេញ និងបានមកទិញដីបង្កើតអាងចិញ្ចឹមក្រពើនៅភូមិក្ដីត្នោតនេះ។ បុរសរងគ្រោះបានមកស្នាក់នៅស៊ីឈ្នួលថែ និងចិញ្ចឹមក្រពើនៅកន្លែងកើតហេតុខាងលើជាមួយប្រពន្ធឈ្មោះម៉ុន អស់រយៈពេល៦ទៅ៧ឆ្នាំហើយ។
បើតាមការរៀបរាប់របស់ស្ដ្រីជាប្រពន្ធបានឱ្យដឹងថា នៅថ្ងៃកើតហេតុប្ដីរបស់គាត់បានចូលទៅក្នុងកន្លែងចិញ្ចឹមក្រពើដើម្បីបេះផ្លែក្រូចឆ្មារ យកមកជ្រក់។ ពេលចុះដល់ក្នុងបរិវេណនោះប្ដីគាត់ក៏បានដេញសត្វក្រពើឱ្យចុះក្នុងអាងទឹកអស់ហើយដែរទើបដើរទៅបេះផ្លែក្រូចឆ្មារ ប៉ុន្ដែទើបនឹងបេះបានមួយផ្លែ ក៏ត្រូវក្រពើចំនួន៣ក្បាលស្ទុះចេញពីទឹកមកត្របាក់ខាំប្ដីគាត់តែម្ដង។ ក្នុងសា្ថនភាពស្លន់ស្លោនោះ ប្តីគាត់បានស្រែកហៅឱ្យគេជួយ ហើយក៏មានកម្មករនៅជិតនោះ៣នាក់បានចុះទៅជួយ ដោយកាន់ដំបងម្នាក់មួយចុះទៅវាយក្រពើទាំងនោះ ដើម្បីដណ្ដើមយកប្តីគាត់ពីមាត់ក្រពើវិញ ប៉ុន្ដែទម្រាំដណ្ដើមបានមកវិញ ប្ដីគាត់ត្រូវសត្វក្រពើខាំដាច់ដៃទាំងពីរ និងរយះដាច់សាច់ភ្លៅទាំងសងខាងរបួសយ៉ាងធ្ងន់ធ្ងរ។ ទោះបីយ៉ាងណាក្រពើទាំង៣ក្បាលនោះក៏រងនឹងការវាយស្ទើរតែងាប់ដែរព្រោះតែមិនព្រមលែងប្តីគាត់ដែលពួកវាគិតថាជាចំណីនោះ។ ក្រោយពេលកើតហេតុប្តីរបស់គាត់ត្រូវបានដឹកយកទៅសង្គ្រោះនៅមន្ទីរពេទ្យជាបន្ទាន់។
នៅក្នុងមន្ទីរពេទ្យបុរសរងគ្រោះត្រូវបានគ្រូពេទ្យកាត់ដៃដែលក្រពើខាំដាច់ជាប់សល់តែស្បែកចេញ ដោយដៃខាងឆ្វេងដាច់ត្រឹមដើមដៃ និងដៃខាងស្ដាំដាច់ត្រឹមកំភួនដៃ។ គ្រូពេទ្យប្រាប់ថា ជនរងគ្រោះមានសភាពធ្ងន់ធ្ងរ និងមានសង្ឃឹមតិចតួចបំផុតដែលអាចឆ្លងផុតពីគ្រោះថ្នាក់។ បើតាមការឱ្យដឹងពីស្ដ្រីជាប្រពន្ធនិយាយថា សត្វក្រពើនោះដាច់ចំណីយូរថ្ងៃមកហើយទើបវាឃ្លានបែបនេះ៕
ចែករំលែកព័តមាននេះ