ខេត្តសៀមរាប ៖ កម្លាំងជំនាញនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានកោះហៅយុវតីម្នាក់ឈ្មោះ លឹម ចាន់សុផាន់ណា អាយុ២១ឆ្នាំ ជាអ្នកលក់អនឡាញ រស់នៅភូមិសាលាកន្សែង…
ខេត្តសៀមរាប ៖ កម្លាំងជំនាញនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានកោះហៅយុវតីម្នាក់ឈ្មោះ លឹម ចាន់សុផាន់ណា អាយុ២១ឆ្នាំ ជាអ្នកលក់អនឡាញ រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប ដែលបានប្រើពាក្យសម្ដីតាមការ(Live) ដៀលអ្នកខេត្តសៀមរាបថា ខ្លួនជាន់ផ្អៀង គ្មានអ្នកណាគេហ៊ានប៉ះ ពីព្រោះថា ខ្លួនតូចខ្សែធំ ថែមទាំងជេរប្រមាថគ្នាក្នុងហ្វេសប៊ុក ដែលមានគណនីឈ្មោះ So Phanna ។
ករណីដែលសមត្ថកិច្ចកោះហៅយុវតីរូបនេះមកធ្វើការអប់រំ និងឱ្យធ្វើកិច្ចសន្យាបញ្ឈប់រាល់សកម្មភាពនោះ នៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប កាលពីថ្ងៃទី៧ ខែសីហា ឆ្នាំ២០២៥ ។ បើតាមលោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប បានបញ្ជាក់យ៉ាងច្បាស់ថា កម្លាំងជំនាញនគរបាល បានកោះហៅយុវតីរូបនោះហើយ នៅថ្ងៃទី៨ ខែសីហា ឆ្នាំ២០២៥ បានមកដល់ស្នងការដ្ឋាននគរបាលខេត្តសៀមរាប ហើយកម្លាំងជំនាញកំពុងធ្វើការសួរនាំ ។
ប្រភពពីកម្លាំងនគរបាលជំនាញបានបញ្ជាក់ថា យុវតីដែលកម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប កោះហៅមកធ្វើការអប់រំនេះ និងឱ្យធ្វើកិច្ចសន្យាផងដែរ ដើម្បីបញ្ឍប់សកម្មភាពជេរប្រមាថដល់ប្រជាពលរដ្ឋ និងសមត្ថកិច្ចនោះ បានឱ្យត្រឡប់ទៅផ្ទះវិញហើយ ខណៈបុគ្គលរូបនេះ ព្រមព្រៀងតាមការដាក់លក្ខខណ្ឌ ជាមួយសមត្ថកិច្ចរួចរាល់ ។ ប្រសិនបើមានថ្ងៃក្រោយ ឈ្មោះ លឹម ចាន់សុផាន់ណា ភេទស្រី អាយុ២១ឆ្នាំ ជាអ្នកលក់អនឡាញធ្វើសកម្មភាពខុសឆ្គង សុខចិត្តទទួលខុសត្រូវចំពោះមុខច្បាប់ ៕
ចែករំលែកព័តមាននេះ