ខេត្តកោះកុង ៖ កាលពីថ្ងៃទី០៨ ខែសីហា ឆ្នាំ២០២៥ មានប្រជាពលរដ្ឋដើរទៅនេសាទបានប្រទះឃើញវ៉ាលីសមួយ ទំនងមានសាកសពនៅក្នុងនោះ ព្រោះមានក្លិនស្អុយសាយភាយ ដែលត្រូវជនមិនស្គាល់អត្តសញ្ញាណយកទៅទម្លាក់ចោលអណ្តែតក្នុងទឹកក្រោមស្ពានព្រែកកន្ទួត ស្ថិតនៅភូមិជីមាល…
ខេត្តកោះកុង ៖ កាលពីថ្ងៃទី០៨ ខែសីហា ឆ្នាំ២០២៥ មានប្រជាពលរដ្ឋដើរទៅនេសាទបានប្រទះឃើញវ៉ាលីសមួយ ទំនងមានសាកសពនៅក្នុងនោះ ព្រោះមានក្លិនស្អុយសាយភាយ ដែលត្រូវជនមិនស្គាល់អត្តសញ្ញាណយកទៅទម្លាក់ចោលអណ្តែតក្នុងទឹកក្រោមស្ពានព្រែកកន្ទួត ស្ថិតនៅភូមិជីមាល ឃុំអណ្តូងទឹក ស្រុកបទុមសាគរ ខេត្តកោះកុង សង្ស័យជាករណីឃាតកម្ម ។
ក្រោយពេលប្រជាពលរដ្ឋជាអ្នកនេសាទប្រទះឃើញវ៉ាលីសអណ្តែកទឹកក្រោមស្ពានព្រែកកន្ទួត ទំនងមានសាកសពនោះ ព័ត៌មានក៏បានលេចឮដល់សមត្ថកិច្ច បន្ទាប់មកទើបឃើញកម្លាំងសមត្ថកិច្ចគ្រប់ជំនាញ នៃស្នងការដ្ឋាននគរបាលខេត្តកោះកុង និងគ្រូពេទ្យពិនិត្យសាកសព បានចុះទៅសហការជាមួយនគរបាលស្រុកបទុមសាគរ ក្រោមការសម្របសម្រួលពីស្ថាប័នអយ្យការអមសាលាដំបូងខេត្តកោះកុង ដើម្បីពិនិត្យកន្លែងកើតហេតុ ។
ពិតដូចការសន្និដ្ឋានជាដំបូងមែន នៅក្នុងវ៉ាលីសនោះ គឺមានសាកសពបុរសម្នាក់ មិនទាន់ស្គាល់អត្តសញ្ញាណ អាចជាជនបរទេស អាយុប្រហែល៣០ឆ្នាំ ត្រូវឃាតករសម្លាប់ពីកន្លែងផ្សេងញាត់ចូលក្នុងវ៉ាលីស ហើយដឹកយកទៅទម្លាក់ចោលនៅទីនោះ ។
បន្ទាប់ពីសមត្ថកិច្ចពិនិត្យ និងធ្វើកោសលវិច័យលើសាកសពតាមជំនាញរួចរាល់ហើយ សាកសពជនរងគ្រោះ ត្រូវបានសមត្ថកិច្ចប្រគល់ឲ្យអាជ្ញាធរមូលដ្ឋាន យកទៅបញ្ចុះនៅចំណុចដីទំនេរមួយកន្លែង ដើម្បីស្វែងរកសាច់ញាតិ និងក្រុមគ្រួសារ ។
ក្នុងនោះទៀត សមត្ថកិច្ចបាននិងកំពុងដៃដុតដុតជើង បន្តការស្រាវជ្រាវវែកមុខឃាតករលើករណីឃាតកម្មនេះ និងនាំមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ