ខេត្តបាត់ដំបង ៖ យ៉ាងហោចណាស់ យុវជន០២នាក់ត្រូវរន្ទះបាញ់ឲ្យរបួស រីឯលំនៅឋានចំនួន០៥ខ្នងបានខូចខាតដំបូល ដោយសារខ្យល់កន្ត្រាក់ជាមួយនឹងដំណាំតាង៉ែនជិត៧០ដើមទៀត ដែលបាតុភូតធម្មជាតិដីអាក្រក់នេះ បានកើតឡើងជាបន្តបន្ទាប់ កាលពីរសៀលថ្ងៃទី០៨ សីហា…
ខេត្តបាត់ដំបង ៖ យ៉ាងហោចណាស់ យុវជន០២នាក់ត្រូវរន្ទះបាញ់ឲ្យរបួស រីឯលំនៅឋានចំនួន០៥ខ្នងបានខូចខាតដំបូល ដោយសារខ្យល់កន្ត្រាក់ជាមួយនឹងដំណាំតាង៉ែនជិត៧០ដើមទៀត ដែលបាតុភូតធម្មជាតិដីអាក្រក់នេះ បានកើតឡើងជាបន្តបន្ទាប់ កាលពីរសៀលថ្ងៃទី០៨ សីហា នៅស្រុករតនមណ្ឌល ។
បើយោងតាមរបាយការណ៍បានឲ្យដឹងថា នៅក្នុងភូមិតាគ្រក់ ឃុំត្រែង រន្ទះបានបាញ់យុវជន០២នាក់បណ្ដាលឲ្យរងរបួស ម្នាក់ឈ្មោះ ឈឿន ណាន់ ភេទប្រុស អាយុ១៧ឆ្នាំ និងឈ្មោះ ឈឿន ពណ្ណរាយ ភេទប្រុស អាយុ១៥ឆ្នាំ ហើយត្រូវបានក្រុមគ្រួសារបញ្ជូនទៅមន្ទីរពេទ្យភ្លាមៗ ។
បន្ទាប់ពីរន្ទះបាញ់មនុស្ស០២នាក់ខាងលើ ខ្យល់កន្ត្រាក់បានវាយប្រហារទៅលើផ្ទះសម្បែងប្រជាពលរដ្ឋនៅឃុំអណ្តើកហែប បណ្តាលឲ្យខូចខាតដំណាំតាង៉ែនអស់ចំនួន៦៧ដើម និងរបើកដំបូលផ្ទះចំនួន០៤ខ្នង ហើយក៏បានវាយប្រហារដល់ទឹកដីឃុំស្តៅ បណ្ដាលឲ្យខូចខាតដំបូលផ្ទះអស់០១ខ្នងដែរ ។
មិនតែប៉ុណ្ណោះ បើតាមរបាយការណ៍ដដែល ដើមដូងក៏ត្រូវដួលរលំសង្កត់ពាងទឹកបែករាយពេញដីផងដែរ ដោយសារខ្យល់កន្ត្រាក់នេះ ។ មន្ត្រីមូលដ្ឋានបាននិយាយថា ភ្លៀងបានធ្លាក់យ៉ាងខ្លាំង លាយឡំទៅដោយខ្យល់កន្ត្រាក់ ផ្គរ រន្ទះ បានកើតឡើងព្រមៗគ្នា។
មន្ត្រីដដែលបានបញ្ជាក់ថា បើតាមសេចក្ដីរាយការណ៍ គឺបាតុភូតធម្មជាតិខាងលើនេះ បានកើតឡើងជាបន្តបន្ទាប់ក្នុងថ្ងៃតែមួយ ។ ប៉ុន្តែមិនមានមនុស្សស្លាប់ទេ គ្រាន់របួស០២នាក់ដោយសាររន្ទះបាញ់៕
ចែករំលែកព័តមាននេះ