ទីក្រុងប៉េកាំង៖ ប្រទេសចិនប្រកាសថានឹងខិតខំការពារអធិបតេយ្យភាពជាតិរបស់ខ្លួនជាដាច់ខាត ហើយសូមព្រមានទៅកម្លាំងខាងក្រៅដែលចង់ជ្រៀតជ្រែកកិច្ចការផ្ទៃក្នុងរបស់ចិន។ ការថ្លែងដូច្នេះបន្ទាប់ពីអាមេរិកទើបតែដាក់ចេញយុទ្ធសាស្ត្រស្ដីពីសន្តិសុខដើម្បីកសាងកម្លាំងយោធាឱ្យបានខ្លាំងក្លាទប់ស្កាត់មិនឱ្យកើតមានជម្លោះរវាងអាមេរិក និងចិនពាក់ព័ន្ធនឹងបញ្ហាតៃវ៉ាន់។
ទីក្រុងវ៉ាស៊ីនតោនបានដាក់ចេញវិធីដោះស្រាយបញ្ហាការទូតដ៏រសើបបំផុតនៅលើពិភពលោកនៅក្នុង «យុទ្ធសាស្ត្រស្ដីពីសន្តិសុខជាតិ» ដែលចេញផ្សាយកាលពីថ្ងៃសុក្រ។ ការបញ្ចេញសំណុំឯកសារនេះធ្វើឡើងបន្ទាប់ពីប្រទេសចិនកាលពីសប្ដាហ៍មុនបានដាក់ពង្រាយនាវាចម្បាំង និងនាវាល្បាតដ៏ច្រើនសន្ធឹកសន្ធាប់នៅទូទាំងដែនសមុទ្រនៃតំបន់អាស៊ីបូព៌ាដើម្បីបង្ហាញនូវឫទ្ធានុភាពនៃកម្លាំងជើងទឹករបស់ខ្លួន។
តៃវ៉ាន់ជាបន្ទាត់ក្រហមទីមួយដែលមិនអាចដើរកន្លងបានឡើយនៅក្នុងទំនាក់ទំនងចិន-អាមេរិក។ ប្រទេសចិននឹងមិនអនុគ្រោះជាដាច់ខាតចំពោះការជ្រៀតជ្រែករបស់បរទេសនៅក្នុងបញ្ហានេះ។ ខាងលើនេះជាការថ្លែងរបស់អ្នកនាំពាក្យក្រសួងការបរទេសចិន។ លោកថ្លែងបន្តទៀតថាអាមេរិកគួរគិតគូរឱ្យបានល្អិតល្អន់បំផុតនៅក្នុងបញ្ហាតៃវ៉ាន់ ហើយគួរឈប់លើកទឹកចិត្ត និងគាំទ្រក្រុមបំបែកខ្លួនដែលចង់ប្រកាសឯករាជ្យផ្ដាច់ចេញពីប្រទេសចិនដោយកម្លាំងយោធា ឬប្រឆាំងនឹងការបង្រួបបង្រួមទឹកដីដោយកម្លាំងយោធា។
អ្នកនាំពាក្យរូបនេះថ្លែងបន្តទៀតថាប្រទេសចិនត្រៀមខ្លួនជានិច្ចដើម្បីធ្វើការជាមួយទីក្រុងវ៉ាស៊ីនតោនក្នុងការលើកកម្ពស់ទំនាក់ទំនងប្រកបដោយស្ថិរភាព។ ប៉ុន្តែទន្ទឹមនឹងនោះ ចិនក៏ត្រូវតែការពារអធិបតេយ្យភាពជាតិ, សន្តិសុខជាតិ និងផលប្រយោជន៍ជាតិរបស់ខ្លួនផងដែរ។
ជំហររបស់អាមេរិកដូចដែលមានសរសេររៀបរាប់នៅក្នុងឯកសារសន្តិសុខជាតិនោះត្រូវកោះតៃវ៉ាន់គាំទ្រយ៉ាងកងរំពង។ ប្រធានាធិបតីតៃវ៉ាន់ លោកឡៃឈីងតេ បង្ហោះសារនៅលើបណ្ដាញអ៊ិចថាលោកពេញចិត្តណាស់ដែលយុទ្ធសាស្ត្រសន្តិសុខជាតិអាមេរិកផ្ដោតការយកចិត្តទុកដាក់ទៅលើការទប់ស្កាត់ជម្លោះ (រវាងចិន និងអាមេរិក) ពាក់ព័ន្ធនឹងតៃវ៉ាន់។ រដ្ឋមន្ត្រីការពារជាតិតៃវ៉ាន់ថ្លែងថាអាមេរិកនៅតែឱ្យតម្លៃខ្ពស់ទៅលើការថែរក្សាសន្តិភាព និងស្ថិរភាពនៅក្នុងតំបន់។ ខាងលើនេះជាការដកប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ