ខេត្តកំពង់ស្ពឺ៖ សង្ឃវ័យក្មេងមួយអង្គត្រូវបានចាប់ផ្សឹកបញ្ជូនទៅឲ្យសមត្ថកិច្ចកសាងសំណុំរឿងបញ្ជូនទៅតុលាការខេត្តកំពង់ស្ពឺដើម្បីចាត់ការតាមផ្លូវច្បាប់ ខណៈដែលសង្ឃទ្រុស្តសីលរូបនោះពូកែខាងកុហកភូតភរ បោកប្រាស់និងឆបោកពុទ្ធបរិស័ទនិងព្រះចៅអធិការវត្តជាច្រើនកាលពីល្ងាចថ្ងៃទី០១ ខែមេសា ឆ្នាំ២០២៦។
ក្រោមការដឹកនាំបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ និងការសម្របសម្រួលនីតិវិធីពី តំណាងអយ្យការ អមសាលាដំបូងខេត្ដកំពង់ស្ពឺ កំលាំងនគរបាលនៃអធិការនគរបាលស្រុកបសេដ្ឋ បានទទួលជនសង្ស័យ ជាអតីតសង្ឃនាម (ភ័ណ្ឌ ផាត់យុទ្ធ) អាយុ ២១ឆ្នាំ អះអាងថា គង់នៅក្នុងវត្តចំបក់ ហើយមានស្រុកកំណើតនៅក្នុងភូមិឬស្សីជុក ឃុំរកា ស្រុកពារាំង ខេត្តព្រៃវែង ។
នគរបាលខេត្តកំពង់ស្ពឺបាននិយាយដឹងថា ដំណើររឿងដោយមានករណីឆបោកបន្លំយកគ្រឿងអលង្ការ មានតម្លៃជាច្រើន ទ្រព្យសម្បត្ដិដាក់ក្នុងផ្លូវអរូបិពិធីបណ្ដេញខ្មោចព្រាយបិសាចដែលជាការភូតកុហកពីបុគ្គលសង្ឃខាងលើ ជាមួយនិងញោមម្ដាយព្រះសង្ឃមួយអង្គទៀតដែលបានជួបគ្នាក្នុងពិធីសាសនាមួយនៅក្នុងវត្ដនៅផ្សារស្លាបលែង ស្រុកបសេដ្ឋ នាពេលមួយកន្លងទៅក្នុងខែកុម្ភៈ ឆ្នាំ២០២៦ ដោយបានបន្លំយកគ្រឿង អលង្ការរត់ចោលពិធីទាំងយប់អាធាត្រ ទាំងដែលខ្មោច ព្រាយបិសាចមិនទាន់ចេញផង ។
នគរបាលខេត្តកំពង់ស្ពឺបានបន្តទៀតថាសមត្ថកិច្ចបានទទួលបណ្ដឹង និងនាំមកធ្វើការសាកសួរជនសង្ស័យខាងលើបានឆ្លើយសារភាពទទួលស្គាល់កំហុសទាំងអស់និងប្រាប់ថាពិតបានយកគ្រឿងអលង្ការទៅលក់នៅតូបមួយកន្លែងនៅជិតម្ដុំផ្សារ ៧មករា ។
តាមលទ្ធផលជាក់ស្ដែងបុគ្គលឈ្មោះ ភ័ណ្ឌ ផាត់យុទ្ធ នេះកាលនៅជាព្រះសង្ឃ បានរៀនសូត្រធម៌វិន័យជ្រៅជ្រះនិងបានបន្លំខ្លួនទៅនៅវត្ដល្បីៗ ដែលមានព្រះសង្ឃចេញចូលច្រើនរួចទាក់ទងទំនាក់ទំនងមកលេងវត្ដនិងអួតបញ្ចុះបញ្ចូលថាខ្លួនមានបារមីកាន់ពូកែនិងមានកូនសិស្សគុណសុទ្ធតែឯកឧត្ដម លោកជំទាវ ឧកញ៉ាដែលចូលចិត្ដនិងជឿជាក់ជួយឧបត្ថម្ភនូវបច្ច័យដើម្បីកសាងទីសក្ការៈសាលាបាលី ។ ល។ បើវត្ដត្រូវការចាំខ្លួនជួយឱ្យកូនសិស្សគណផ្ដល់បច្ច័យឱ្យមកកសាង តែមុនឱ្យ រកលេសភរនោះ សុំខ្ចីលុយដើម្បីយកធ្វើនេះធ្វើនោះ រហូតបោកប្រាស់ព្រះចៅអធិការវត្ដមួយចំនួនបានប្រាក់ជាច្រើនរួចរត់គេចមិនត្រឡប់ទៅវិញជាច្រើនវត្ដ ការឆបោកមកពីការលង់ជឿចង់បានផលប្រយោជន៍ពីឈ្មោះ ភ័ណ្ឌ ផាត់យុទ្ធថា ជួយកសាងឱ្យវត្ដ ។
នគរបាលខេត្តកំពង់ស្ពឺបានបញ្ជាក់ឲ្យដឹងថា ចំពោះជនសង្ស័យខាងលើ កម្លាំងជំនាញបានឃាត់ខ្លួនបញ្ជូនទៅកាន់ការិយាល័យប្រឆាំងភេរវកម្មនិងឧក្រឹដ្ឋកម្មឆ្លងដែន នៃស្នងការដ្ឋាននគរបាលខេត្ដ និងកសាងសុំណុំរឿងបញ្ជូនទៅសាលាដំបូងខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ។
ព័ត៌មានបន្តនឹងមានផ្សាយនៅលើទំព័រកោះសន្តិភាព ៕
ចែករំលែកព័តមាននេះ