ទីក្រុងឌុយបៃ៖ កប៉ាល់មួយគ្រឿងដែលចាកចេញដំណើរពីប្រទេសអារ៉ាប់រួមត្រូវបានស្ទាក់ចាប់ និងដឹកទៅប្រទេសអ៊ីរ៉ង់ ចំណែកមួយគ្រឿងទៀតជាប្រភេទកប៉ាល់ដឹកទំនិញដែលចតក្បែរសមុទ្រប្រទេសអូម៉ង់ត្រូវបានបាញ់ពន្លិច។ នេះបើយោងតាមការរាយការណ៍របស់អាជ្ញាធរ។ ហេតុការណ៍នេះកើតឡើងចំពេលដែលភាពតានតឹងកំពុងឡើងកម្ដៅខ្លាំងនៅច្រកសមុទ្រហ័រម៉ូស។
គេមិនទាន់ដឹងច្បាស់ថាតើនរណាជាអ្នកនៅពីក្រោយការវាយប្រហារទាំងនេះទេ។ ប៉ុន្តែព្រឹត្តិការណ៍នេះកើតឡើងចំពេលដែលមន្ត្រីជាន់ខ្ពស់របស់អ៊ីរ៉ង់បញ្ជាក់ជាថ្មីថាប្រទេសរបស់ខ្លួនជាអ្នកគ្រប់គ្រង់ច្រកសមុទ្រមួយនេះ។ ចំណែកមន្ត្រីម្នាក់ទៀតថ្លែងថាប្រទេសរបស់ខ្លួនមានសិទ្ធិរឹបអូសកប៉ាល់ដឹកប្រេងដែលមានសម្ព័ន្ធភាពជាមួយអាមេរិក។ ភាពរញ៉េរញ៉ៃនៅច្រកសមុទ្រហ័រម៉ូសក្លាយជាបញ្ហាស្មុគស្មាញអស់ជាច្រើនសប្ដាហ៍មកហើយនៅក្នុងការចរចាគ្នារវាងអាមេរិក និងអ៊ីរ៉ង់ដើម្បីរកដំណោះស្រាយបញ្ចប់សង្គ្រាម។
បញ្ហាអស្ថិរភាពនៅទីនោះកើតឡើងចំពេលដែលលោកដូណាល់ត្រាំជួបប្រធានាធិបតីចិននៅទីក្រុងប៉េកាំង។ សេតវិមានថ្លែងថាលោកទាំង២បានឯកភាពថាច្រកសមុទ្រហ័រម៉ូសត្រូវតែបើកទូលាយសម្រាប់ការធ្វើនាវាចរណ៍។ កាលពីសប្ដាហ៍មុន ភាពតានតឹងកើតឡើងមួយសាហើយនៅពេលយោធាអាមេរិកបាញ់តម្រង់ទៅរកនាវាដឹកប្រេងរបស់អ៊ីរ៉ង់ដែលព្យាយាមចាកចេញពីកំពង់ផែរបស់ខ្លួន។ អាមេរិកចាត់ទុកថានាវានោះរំលោភលើវិធានការបិទខ្ទប់។ ការវាយប្រហារនោះធ្វើឱ្យកប៉ាល់អ៊ីរ៉ងខូចខាត។
អង់គ្លេសអះអាងថាខ្លួនទទួលបានរបាយការណ៍ថាកប៉ាល់ដែលត្រូវអ៊ីរ៉ង់រឹបអូសនោះត្រូវបានចូលកាន់កាប់ដោយបុគ្គលិកដែលមិនទទួលបានសិទ្ធិដើម្បីធ្វើដូច្នេះឡើយ។ ពេលនោះ កប៉ាល់ស្ថិតនៅចម្ងាយ៧០គីឡូម៉ែត្រភាគខាងឦសានកំពង់ផែអារ៉ាប់រួមដែលជាទីកន្លែងស្តុកទុកប្រេងដ៏សំខាន់ និងដែលរងការវាយប្រហារជាច្រើនដងរួចមកហើយ។ អង់គ្លេសមិនបានបញ្ជាក់ថាកប៉ាល់នោះឈ្មោះអ្វីទេ និងថាខ្លួនកំពុងស៊ើបអង្កេតរឿងនេះ។ យោធាអង់គ្លេសអះអាងថាកប៉ាល់នោះកំពុងបើកឆ្ពោះទៅកាន់ដែនសមុទ្ររបស់អ៊ីរ៉ង់៕ ប្រភព៖ AP
ចែករំលែកព័តមាននេះ