ខេត្តប៉ៃលិន ៖ រហូតមកដល់ថ្ងៃទី១៥ ខែឧសភា ឆ្នាំ២០២៦នេះ គឺអស់រយៈពេលជាង១ខែមកហើយ គេសង្កេតឃើញកសិករម្នាក់ កំពុងប្រមូលផលផ្លែត្របែកគីឡូលក់ឱ្យអតិថិជន និងម៉ូយលើកយកទៅលក់បន្តនៅក្នុងផ្សារក្នុងក្រុងប៉ៃលិន ទិញយកទៅទទួលទានជួបជុំក្រុមគ្រួសារ…
ខេត្តប៉ៃលិន ៖ រហូតមកដល់ថ្ងៃទី១៥ ខែឧសភា ឆ្នាំ២០២៦នេះ គឺអស់រយៈពេលជាង១ខែមកហើយ គេសង្កេតឃើញកសិករម្នាក់ កំពុងប្រមូលផលផ្លែត្របែកគីឡូលក់ឱ្យអតិថិជន និងម៉ូយលើកយកទៅលក់បន្តនៅក្នុងផ្សារក្នុងក្រុងប៉ៃលិន ទិញយកទៅទទួលទានជួបជុំក្រុមគ្រួសារ ដែលធ្វើឱ្យគាត់ទទួលបានថវិកាសម្រាប់ផ្គត់ផ្គង់ជីវភាពក្រុមគ្រួសារ មិនសូវព្រួយបារម្ភពីការខ្វះខាតនោះឡើយ ។
បើតាមប្រភពព័ត៌មានពីកសិករម្នាក់ ឈ្មោះ ថា សុផេត ភេទស្រី អាយុ៥៥ឆ្នាំ រស់នៅក្នុងភូមិស្រែអន្ទាក់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានរៀបរាប់ឱ្យភ្នាក់ងារយើងដឹងថា ៖ បន្ទាប់ពីមេឃបង្អុរភ្លៀងជាប់ៗគ្នា ដែលធ្វើឱ្យដំណាំត្របែកគីឡូរបស់ខ្លួន បានលូតលាស់យ៉ាងល្អ ហើយក៏បានបញ្ចេញផ្កាផ្លែជាច្រើន លុះមកដល់ពេលនេះផ្លែត្របែកចាប់ផ្តើមធំល្មមប្រមូលផលលក់ ក៏មានម៉ូយចូលទៅទិញបណ្តើរៗ អស់រយៈពេលជាង១ខែមកហើយ ពោលគឺគាត់ចាប់ផ្តើមបេះផ្លែលក់តាំងពីខែមេសាមកម្លេះ រហូតមកដល់ពេលនេះមិនទាន់អស់នៅឡើយទេ។
គាត់បន្តទៀតថា ផ្លែត្របែកគីឡូ របស់គាត់មានចំនួនជាង១០០០ដើម ដោយដាំដុះនៅលើផ្ទៃដីប្រមាណជាង៦ហិកតា អស់រយៈពេលច្រើនឆ្នាំមកហើយ ក៏បានប្រមូលផលលក់ច្រើនដងក្នុង១ឆ្នាំម្តងៗ បានថវិកាសម្រាប់ផ្គត់ផ្គង់ជីវភាពប្រចាំថ្ងៃ ។ តែនៅឆ្នាំ២០២៦នេះ ដំណាំត្របែកគីឡូរបស់គាត់ ហាក់ដូចជាមានផ្លែច្រើន ទទួលបានទិន្នផលខ្ពស់ ជាងសព្វមួយដងដោយបេះផ្លែបណ្តើរ ចេញផ្កាបណ្តើរ ក៏បេះលក់ជាបន្តបន្ទាប់រហូតមកដល់ខែនេះមិនទាន់អស់នៅឡើយទេ ។
គាត់បានបញ្ជាក់ទៀតថា ត្របែករបស់ខ្លួនផ្លែធំៗល្អ ដោយផ្លែចំនួន៣ទៅ៤ផ្លែ អាចថ្លឹងបាន១គីឡូក្រាម ហើយមានរសជាតិជូរអែម ដែលអ្នកទិញយកទៅទទួលទានតែងតែពោលសរសើរថា ជាត្របែកដែលមានរសជាតិឆ្ងាញ់គួរឱ្យចង់ញ៉ាំម្តងហើយ ម្តងទៀត ហើយគាត់លក់ក្នុង១គីឡូក្រាមតម្លៃត្រឹមតែ៣០០០ទៅ៤០០០រៀលប៉ុណ្ណោះ តែបើអតិថិជនទិញច្រើនគាត់ក៏បញ្ចុះតម្លៃថែមទៀតផងដែរ។
ម្ចាស់ចំការក៏បានបន្ថែមទៀតថា នៅក្នុងចំការដដែលនេះ គាត់មិនត្រឹមតែដាំដំណាំត្របែកគីឡូប៉ុណ្ណោះទេ គឺគាត់ដាំដំណាំផ្សេងៗមួយចំនួនទៀត ដូចជាដំណាំស្វាយខ្ទិះ ដំណាំស្ពឺផ្អែម ដំណាំមង្ឃុត ដំណាំចេកពងមាន់ និងបន្លែមួយចំនួនផងដែរ។ ការដាំច្រើនប្រភេទបែបនេះ អាចធ្វើឱ្យគាត់ប្រមូលផលលក់ដូរជាបន្តបន្ទាប់ អាចលក់ឱ្យអតិថិជនទិញយកទៅលក់ដូរបន្ត ។
គ្រួសាររបស់គាត់ ក៏មានការចិញ្ចឹមសត្វមាន់ ទា ជាលក្ខណៈគ្រួសារ សម្រាប់ធ្វើម្ហូបអាហារ និងលក់មួយចំនួនសម្រាប់យកថវិកាទិញម្ហូបអាហារ និងចាយវាយប្រចាំថ្ងៃផងដែរ៕
ចែករំលែកព័តមាននេះ