សង្គ្រាមអ៉ីរ៉ង់ ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី ថ្លែងថា រុស្ស៊ីបានប្រើដ្រូនយ៉ាងតិច៨០០គ្រឿង វាយសន្ធាប់លើតំបន់២០របស់អ៊ុយក្រែន កាលពីថ្ងៃទី១៣ ឧសភា…
សង្គ្រាមអ៉ីរ៉ង់ ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី ថ្លែងថា រុស្ស៊ីបានប្រើដ្រូនយ៉ាងតិច៨០០គ្រឿង វាយសន្ធាប់លើតំបន់២០របស់អ៊ុយក្រែន កាលពីថ្ងៃទី១៣ ឧសភា បណ្ដាលឲ្យមនុស្សស្លាប់យ៉ាងតិច៦នាក់ និងរបួសច្រើនសិបនាក់ ។ នោះជាការវាយប្រហារទ្រង់់ទ្រាយធំក្នុងចម្ងាយឆ្ងាយរបស់រុស្ស៊ីពុំធ្លាប់មានតាំងពីចាប់ផ្ដើមសង្គ្រាមមក ។
ការវាយប្រហារចាប់ផ្ដើមពីពាក់កណ្ដាលព្រឹកទៅ និងមានរយៈពេលច្រើនម៉ោងលើក្រុងគៀវ ក្រុងល្វីវជិតប៉ូឡូញ ក្រុងកំពង់ផែអូដេសា និងលើទីក្រុងដទៃៗទៀត។ លោកហ្សេឡេនស្គីអះអាងថា កងទាហានរបស់យើងការពារអ៊ុយក្រែន តែទិសដៅពិតប្រាកដរបស់រុស្ស៊ី គឺចង់ពង្វក់កងការពារអាកាសរបស់យើង។ ការវាយប្រហារអូសបន្លាយពេលដល់ចុងរសៀល។ លោកបានព្រមានថា ការវាយប្រហារដោយមីស៊ីលបណ្ដែត និងមីស៊ីលបាលីស្ទិកអាចបន្ត បន្ទាប់ពីការវាយប្រហាររបស់ដ្រូន។ នោះជាការវាយប្រហាររយៈពេលយូរ និងខ្លាំងក្លាបំផុតមួយរបស់រុស្ស៊ីប្រឆាំងអ៊ុយក្រែន។
ការវាយប្រហារទាំងនេះ ក៏បណ្ដាលឲ្យបណ្ដាប្រទេសជិតខាងមានការព្រួយបារម្ភដែរ។ នាយករដ្ឋមន្ត្រីថ្មីហុងគ្រីលោកប៉េទ័រម៉ាក់យ៉ាគូសបញ្ជាក់ថា រដ្ឋាភិបាលថ្មីលោកបានកោះហៅឯកអគ្គរដ្ឋទូតរុស្ស៊ី មកសាកសួរពីការវាយប្រហារដោយដ្រូននៅជិតព្រំដែនហុងគ្រី ដែលកំណត់ពីការផ្លាស់ប្ដូរយ៉ាងខ្លាំងមួយបើប្រៀបធៀបទៅនឹងទំនាក់ទំនងមិត្តភាពជាមួយក្រុងមូស្គូដែលថែរក្សាដោយនាយករដ្ឋមន្ត្រីហុងគ្រីមុនលោកវិកទ័រអូបង់។ លោកប៉េទ័រម៉ាក់យ៉ាថ្លែងទៅកាន់ក្រុមអ្នកកាសែតថា រដ្ឋាភិបាលហុងគ្រីថ្កោលទោសម៉ឺងម៉ាត់ ការវាយប្រហាររបស់រុស្ស៊ីលើក្រុងត្រង់ស្កាប៉ាទី។
អាជ្ញាធរក្រុងគៀវគូសបញ្ជាក់ថា បំណែកដ្រូនបានធ្លាក់នៅតំបន់អូបូឡុនស្គីយីនៃក្រុងគៀវ តែមិនបណ្ដាលឲ្យមានជនរងគ្រោះទេ។ អភិបាលក្រុងគៀវលោកវីតាលីគ្លីតស្កូគូសបញ្ជាក់ថា ផ្នែកសង្គ្រោះបន្ទាន់បានធ្វើអន្តរាគមន៍នៅតាមកន្លែងនានា។ ស្នូរផ្ទុះលាន់ឮគ្រប់ទីកន្លែងក្នុងទីក្រុងនាព្រឹកព្រលឹមថ្ងៃទី១៣ ឧសភា។ មនុស្ស៣នាក់ បានត្រូវស្លាប់ក្នុងការវាយប្រហារដោយដ្រូនមួយលើតំបន់RIVNE ភាគខាងលិចក្រុងគៀវ ។
ការវាយប្រហាររបស់រុស្ស៊ីប្រឆាំងអ៊ុយក្រែនធ្វើឡើងមិនឈប់ឈរ ក៏ទោះបីអ៊ុយក្រែនអះអាងពីជោគជ័យខាងយោធារបស់ខ្លួនក្ដី និងក្នុងពេលដែលប្រធានាធិបតីអាមេរិក លោកដូណាល់ត្រាំ និងសមភាគីរុស្ស៊ីលោកវ្ល៉ាឌីមៀរពូទីនអះអាងដោយគ្មានភស្ដុតាងថា សង្គ្រាមអាចឈានទៅជិតចប់
ក្ដី។
កាលពីថ្ងៃទី១២ ឧសភា ប្រធានាធិបតីអ៊ុយក្រែនអះអាងថា តំបន់១៤របស់អ៊ុយក្រែនរងការវាយប្រហារ មុនការវាយប្រហារនាពេលយប់ សំដៅបណ្ដាហេដ្ឋារចនាសម្ព័ន្ធស៊ីវិល និងថាមពលព្រមទាំងផ្លូវដែកអ៊ុយក្រែន។ ពេលលោកចេញពីសេតវិមានមកកាន់ក្រុងប៉េកាំង លោកត្រាំថ្លែងទៅកាន់ក្រុមអ្នកកាសែតថា ខ្ញុំពិតជាយល់ថា សង្គ្រាមនៅអ៊ុយក្រែនជិតចប់ហើយ។ ជឿឬមិនជឿតែសង្គ្រាមជិតចប់ហើយ ៕
ចែករំលែកព័តមាននេះ